ވިލިމާލެ ޓާޝަރީ ހޮސްޕިޓަލުގެ އަމަލީ މަސައްކަތް ދެ އަހަރުތެރޭ ނިމޭނެ: މުއްތަލިބު

އަންނަ އަހަރުގެ މެދުތެރޭ ވިލިމާލޭ ޓާޝަރީ ހޮސްޕިޓަލުގެ މަސައްކަތް ފަށައި، ދެ އަހަރު ދުވަހުގެ ތެރޭ އެ މަސައްކަތް ނިންމާލެވޭނެ ކަމަށް، ހައުސިން މިނިސްޓަރު ޑރ. އަބްދުالله މުއްތަލިބު ވިދާޅުވެއްޖެއެވެ.

މިނިސްޓަރު މިހެން ވިދާޅުވެފައި ވަނީ ރޭ ވިލިމާލެ ރައްޔިތުންނާއި ބައްދަލުކުރެއްވުމަށް ރައީސުލްޖުމްހޫރިއްޔާ ވިލިމާލޭގައި ބޭއްވި ހާއްސަ ބައްދަލުވުމުގައި ވާހަކަފުޅު ދައްކަވަމުންނެވެ.

މި ބައްދަލުވުމުގައި މުއްތަލިބު ވިދާޅުވީ، މަޝްރޫއުތަކުގެ އަމަލީ މަސައްކަތް ފެށޭނީ އޭގެ ކުރިން ކުރަންޖެހޭ ގިނަ މަސައްކަތްތަކެއް ކުރުމަށް ފަހުކަމަށެވެ. އެއީ މި މަޝްރޫއަކީ ޗައިނާގެ އެހީއާއިއެކު ކުރިއަށް ގެންދާ މަޝްރޫއަކަށް ވެފައި، އެގައުމުގެ ހިލޭ އެހީގެ ދަށުން ހިންގާ މަޝްރޫއުތަކުގައި ގިނަ މަރުހަލާތަކެއް އެކުލެވޭ ކަމަށްވާތީއެވެ.

އެގޮތުން މި ހޮސްޕިޓަލު މިހާރު އޮތީ ޑިޒައިން ކޮންސަލްޓަންޓެއް ޓެންޑާކުރުމަށް ބޭނުންވާ ހުރިހާ ޑޮކިއުމަންޓްތައް ފައިނަލްކުރުމަށް ބަޔަކު ހޮވާފައި ކަމަށާއި، އެ ޓީމުން އަންނަ ޑިސެމްބަރު މަހު ކަމާބެހޭ ފަރާތްތަކާ ބައްދަލުކުރުމަށްފަހު ކުރިއަށް އޮތް ފަސް މަހެއްހާ ދުވަހުގެތެރޭ އަމަލީ މަސައްކަތް ފަށާާނެކަމަށް ވެސް އޭނާ ވިދާޅުވިއެވެ.

"އެ ފަސްމަސް ދުވަސް ނިމިގެން ދާއިރު ކޮންޓްރެކްޓަރު ހުރީ އިރާދަކުރެއްވިއްޔާ މި އަންނަ އަހަރު މެދުތެރޭގަ ތިންވަނަ ކުއާޓަރަށް ދާއިރު އަމަލީ މަސައްކަތް ފެށި، އަޅުގަނޑު ގަބޫލުކުރަނީ ދެ އަހަރު ދުވަހުގެ ތެރޭ އެންމެ ގިނަވެގެން މަސައްކަތް ނިމިގެން ދާނެ ކަމަށް"

ހައުސިން މިނިސްޓަރު ޑރ. އަބްދުالله މުއްތަލިބު

'ޗައިނާ-މޯލްޑިވްސް ފްރެންޑްޝިޕް ހޮސްޕިޓަލް'ގެ ނަމުގައި އިމާރާތްކުރާ މި ހޮސްޕިޓަލުގައި 112 އެނދު ހުންނާނެ ކަމަށް ކޮންސްޓްރަކްޝަން މިނިސްޓްރީން ބުނެފައިވެއެވެ. އަދި ހޮސްޕިޓަލުގެ މަސައްކަތް ނިމޭއިރު، ޒަމާނީ ހުރިހާ ވަސީލަތެއް ގާއިމްވެފައި ހުންނާނެ ކަމުގެ ޔަގީންކަން ވެސް މުއްތަލިބު ދެއްވިއެވެ.

މި ހޮސްޕިޓަލުގެ ޑިޒައިން މަސައްކަތް ކުރުމަށް މިދިޔަ ޖޫން މަހުގެ ކުރީކޮޅު ކޮންސްޓްރަކްޝަން މިނިސްޓްރީން ޗައިނާ ސަރުކާރާއެކު ވަނީ ސޮއިކޮށްފައެވެ.