މިމަހުގެ ދެވަނަ ހަފްތާގައި މާލެ ސަރަހައްދުގައި 43 އެކްސިޑެންޓު

މާލެއާއި، ސިނަމާލެ ބްރިޖް އަދި ހައިވޭ ހިމެނޭ ސަރަޙައްދުގައި މި ހިނގާ ފެބުރުވަރީ މަހުގެ ދެވަނަ ހަފްތާގެ ތެރޭގައި ޖުމްލަ 43 އެކްސިޑެންޓެއް ހިނގާފައިވާކަމަށް ފުލުހުންގެ ތަފާސްހިސާބުތަކުން ދައްކައިފިއެވެ.

ފުލުހުން އާންމުކުރި މައުލޫމާތަށް ބަލާއިރު، މިދިޔަ ހަފްތާގެ ތެރޭގައި އެންމެ ގިނަ އެކްސިޑެންޓު ހިނގާފައިވަނީ ފެބުރުއަރީ މަހުގެ 8 ވަނަ ދުވަހުއެވެ. އެ ދުވަހު އެކަނިވެސް 10 އެކްސިޑެންޓު ވަނީ ހިނގާފައެވެ. މީގެ އިތުރުން 9 ފެބުރުއަރީގައި 6 އެކްސިޑެންޓު، 10 ވަނަ ދުވަހު 8 އެކްސިޑެންޓު، 11 ވަނަ ދުވަހު 7 އެކްސިޑެންޓު، 12 އަދި 13 ވަނަ ދުވަހު ކޮންމެ ދުވަހަކު 3 އެކްސިޑެންޓު، އަދި 14 ވަނަ ދުވަހު 6 އެކްސިޑެންޓު ވަނީ ހިނގާފައެވެ.

މި އެކްސިޑެންޓުތަކުގެ ތަފްސީލަށް ބަލާއިރު، ގިނަ ހާދިސާތައް ހިނގާފައިވަނީ ދުވާލުގެ ވަގުތުތަކުގައެވެ. އެގޮތުން 31 އެކްސިޑެންޓެއް (72 އިންސައްތަ) ދުވާލު ހިނގާފައިވާއިރު، ރޭގަނޑުގެ ވަގުތުތަކުގައި ހިނގާފައިވަނީ 12 އެކްސިޑެންޓެވެ. އެއީ ޖުމްލަ ހާދިސާތަކުގެ 28 އިންސައްތައެވެ. މި ހާދިސާތަކުގައި ޖުމްލަ 50 އުޅަނދަކަށް އެކިވަރުގެ ގެއްލުން ލިބިފައިވާއިރު، 16 މީހަކަށް ވަނީ އެކިވަރުގެ އަނިޔާވެފައެވެ.

ފުލުހުން ހާމަކުރި ގޮތުގައި، މި ހަފްތާގައި ހިނގި އެކްސިޑެންޓުތަކުގެ ތެރޭގައި ހިމެނެނީ ކުދި 41 އެކްސިޑެންޓާއި ސީރިއަސް 2 އެކްސިޑެންޓެވެ. އެންމެ ގިނަ ހާދިސާ ހިނގާފައިވަނީ މާލޭގެ މަގުތަކުގައެވެ. އެގޮތުން، މާލޭގައި 37 އެކްސިޑެންޓު ހިނގާފައިވާއިރު، ސިނަމާލެ ބްރިޖާއި ހައިވޭގައި ހިނގާފައިވަނީ 6 އެކްސިޑެންޓެވެ.

މި އެކްސިޑެންޓުތަކުގައި އެންމެ ގިނައިން ހިމެނެނީ ސައިކަލުތަކެވެ. އެގޮތުން ސައިކަލާއި ސައިކަލެއް ޖެހިގެންވެސް 7 އެކްސިޑެންޓު އަދި ސައިކަލަކާއި ކާރެއް ޖެހިގެން ވެސް 7 އެކްސިޑެންޓެއް ވަނީ ހިނގާފައެވެ.

މިމަހުގެ ދުރަތަމަ ހަފްތާގައިވެސް 63 އެކްސިޑެންޓެއް ހިނގާފައިވެއެވެ. އެހެންކަމިން މިދިޔަ ހަފްތާގައި ހިނގާފައިވަނީ މިމަހުގެ ފުރަތަމަ ހަފްތާއާއި އަޅާބަލާއިރު ދަށް އަދަދެއްގެ އެކްސިޑެންޓުތަކެކެވެ.

މަގުމަތީގެ ސަލާމަތާއި ރައްކާތެރިކަން ކަށަވަރުކުރުމަށްޓަކައި، ޓްރެފިކް ގަވާއިދުތަކަށް ފުރިހަމައަށް ބޯލަނބައި، ދުއްވާއިރު ސަމާލުކަން އިތުރުކުރުމަށް ހުރިހާ ފަރާތްތަކަށް ވެސް ފުލުހުން ވަނީ އިލްތިމާސްކޮށްފައެވެ.