އާސަހަރާގެ މަސައްކަތް ނިންމައި، އަންނަ ހުކުރުގައި ހުޅުވަނީ

އާސަހަރާގެ މަސައްކަތް އެއްކޮށް ނިންމައި، ކުރިއަށް އޮތް ހުކުރު ދުވަހު ހުޅުވޭނެކަމަށް މާލޭ ސިޓީ ކައުންސިލުން ބުނެފިއެވެ.

މާލެ ސިޓީ ކައުންސިލުން ބުނީ، އާސަހަރާގެ ހުރިހާ މަސައްކަތެއްހެން މިހާރު ނިމިފައިވާކަމަށާއި، އަމާޒަކީ އަންނަ ހުކުރު ދުވަހު އެއްކޮށް ހުޅުވާލުންކަމަށެވެ.

މާލެ ސިޓީ ކައުންސިލުން ހާމަކުރި ގޮތުގައި، އާސަހަރާ އަލުން ހުޅުވުމަށްފަހު މާލޭގައި ނިޔާވާ މީހުން ވަޅުލުމުގެ މަސައްކަތް އެތަނުގައި ކުރިއަށްދާނެއެވެ.

ސިޓީ ކައުންސިލުން ބުނީ،، މި މަސައްކަތް ނިމޭއިރު މީހުން ހިނެވުމަށް 4 ތަނެއް ހުންނާނެ ކަމަށާއި ނަމާދުކުރާ ސަރަޙައްދާއި މަޑުކޮށްލައިގެން ތިބޭ ސަރަޙައްދުވެސް ހުންނާނީ އޭސީކޮށްފައިކަމަށެވެ. އަދި އުމުރުން ދުވަސްވީ މީހުންނަށާއި ނުކުޅެދުންތެރިކަން ހުންނަ މީހުންނަށް ޚާއްސަ ފާޚާނާއާއެކު ފަސޭހަކަމާއެކު ސަހަރާތެރޭގައި އުޅެވޭނެ އިންތިޒާމުވެސް ހަމަޖެހިފައި ހުންނާނެ ކަމަށް ކައުންސިލުން ބުނެއެވެ.

އާސަހަރާ އެއްކޮށް ނިމޭއިރު ގާތްގަނޑަކަށް 3200 އަކަފޫޓަށް ބޮޑުކުރެވޭއިރު، މުޅި މަޝްރޫޢުއަށް 11.6 މިލިޔަން ރުފިޔާ ވަނީ ހޭދަކޮށްފައެވެ.