ޑރ. ޝަހީމުގެ ސުވާލެއް ސަރުކާރަށް: ރިސޯޓުތަކުގެ މުވައްޒަފުން އަނބިމީހާ ކައިރިއަށް ނިދަން ފޮނުވަނީ ތިގޮތަށްތޯ

ހދ. ހޮނޑައިފުށީގައި ސާވިސްޗާޖުގެ ގޮތުގައި މިދިޔަ މަހު 11 ޑޮލަރު ދިން ކަމަށް މުވައްޒަފަކު ބުނުމުން، އޭނާ ވަޒީފާއިން ވަކިކޮށް، ރަށުން ބޭރުކުރި މައްސަލައިގައި ކުރީގެ އިސްލާމިކް މިނިސްޓަރު ޑރ. މުހައްމަދު ޝަހީމު އަލީ ސައީދު ސަރުކާރަށް ފާޑުވިދާޅުވެއްޖެއެވެ.

ހޮނޑައިފުށީގައި ސެކިއުރިޓީ އޮފިސަރެއްގެ ގޮތުން ހަރަކާތްތެރިވާ ހަމައެކަނި ފަރާތްކަމުގައިވާ އަހުމަދު ޝިމްހާޒް ވަކިކޮށްފައިވަނީ ވަޒީފާގެ ގާނޫނާ ހިލާފަށެވެ. އެގޮތުން އެއް މަސް ދުވަހުގެ މުސާރަ ދިނުމަށްފަހު، އޭނާ ވަނީ ވަޒީފާއިން ވަކިކޮށް، ހދ.ހަނިމާދޫއަށް ފޮނުވާލާފައިވަނީ ރޭ މެންދަމު ކަމަށް މައުލޫމާތު ލިބިފައި ވެއެވެ.

ތ. އަތޮޅަށް ނިސްބަތްވާ އެޒުވާނާއަށް އެހީތެރިވީ ޓުއަރިޒަމް އެމްޕްލޯޔީސް އެސޯސިއޭޝަން އޮފް މޯލްޑިވްސް އާއި އޭނާގެ ރަހުމަތްތެރި އެކެވެ.

އެކަމަށް ވަރަށް ބޮޑަށް ފާޑުވިދާޅުވެ، ޑރ. ޝަހީމު ކުރެއްވި ޓުވީޓެއްގައި ވިދާޅުވީ، އެޖެންޑާ 19 އަށް ވޯޓް ދިނީމަ ރިސޯޓް މުވައްޒަފުންނަށް އަނބިމީހާ ކައިރިއަށް ދެވޭނެ އޭ ބުނި އަޑުވެސް އިވުނު ކަމަށެވެ.

"އެޖެންޑާ 19 އަށް ވޯޓު ދިނީމަ ރިސޯޓް މުވައްޒަފުންނަށް ނިދަން އަނބިމީހާ ކައިރިއަށް ދެވޭނެ އޭ ބުނި އަޑުވެސް އިވުނު. މިއީތަ އެގޮތަކީ؟ މި ކުއްޖާގެ ހައްގުތައް ހިމާޔަތް ކުރަން ޖެހޭ. ޓްއަރިޒަމް މިނިސްޓަރ އަލީ ވަހީދު މިކަމަށް ފިޔަވަޅު އަޅުއްވާ." ޝަހީމް ވިދާޅުވިއެވެ.

އެޖެންޑާ 19 ގެ ދަށުން ރިސޯޓުތަކުގައި ތިބޭ މުވައްޒަފުންނަށް އަނބިމީހާ ކައިރިއަށް ނިދަން ދެވޭނެ ގޮތް ހެދުމަކީ ސަރުކާރުގެ އަމާޒެއް ކަމަށް މަޖިލީހުގެ ރައީސް މުހައްމަދު ނަޝީދު ތަކުރާރުކޮށް ވިދާޅުވެފައި ވެއެވެ.

އެގޮތުން ލ.އަތޮޅު މާވަށުގައި އޮތް އެމްޑީޕީގެ ކެމްޕޭން ޖަލްސާއެއްގައި ނަޝީދު ވިދާޅުވީ އެޖެންޑާ 19 ގެ އަމާޒަކީ ފިރިން ރަށަށް ގެނެސްދިނުން ކަމަށެވެ.

އެނގިފައިވާ ގޮތުގައި ޝިމްހާޒު ހަނިމާދޫއަށް ފޮނުވާލީ، ހަނިމާދޫ އިން ގެސްޓް ހައުސް އެއް ހަމަޖައްސައިދޭނެ ކަމަށް ބުނެފައެވެ. ނަމަވެސް ރިސޯޓުގެ ލޯންޗެއްގައި އޭނާ އެ ރަށަށް ގެންދިއުމަށްފަހު، ފުރައިގެން ދިޔައީ އެއްވެސް ކަމެއް ހަމަޖައްސައި ނުދީއެވެ.