މަޝްރޫޢުތައް ކާމިޔާބުކަމާއެކު ނިންމާލެވޭނީ ސަރުކާރާއެކު އެއް ރޫހެއްގައި މަސައްކަތްކޮށްގެން: ސަޢުދީ

ޤައުމާއި ރައްޔިތުންގެ ލާބައަށް ކުރިއަށްގެންދާ މަޝްރޫޢުތައް ކާމިޔާބުކަމާއެކު ނިންމާލެވޭނީ ސަރުކާރާއެކު އެއް ރޫހެއްގައި މަސައްކަތްކޮށްގެން ކަމަށް އެމްޓީސީސިގެ މެނޭޖިން ޑިރެކްޓަރު އަހުމަދު ސައުދީ ވިދާޅުވެއްޖެއެވެ.

ސަޢުދީ މިހެން ވިދާޅުވީ، މާލޭ ޓެކްސީ ލައިންގެ ޚިދުމަތް ފެށުމައް ބޭއްވި ރަސްމިއްޔާތުގައި ވާހަކަދައްކަވަމުންނެއެވެ.

ރައީސުލްޖުމްހޫރިއްޔާ ރައްޔިތުންނަށް ވެވަޑައިގެންފައިވާ ވަޢުދުފުޅުތައް ހަގީގަތަކަށް ހެއްދެވުމަށް ރާއްޖޭގެ އެކިކަންކޮޅުތަކުގައި ގިނަ މަޝްރޫޢުތަކެއް އެމްޓީސީސީން މިހާރުވެސް ކުރިއަށްގެންދާ ކަމަށެވެ. އެގޮތުން، ބަނދަރުތަކާއި، ސުކޫލް ތަކާއި، ހޮސްޕިޓަލުތަކާ، މަގުތަކާއި ކުޅިވަރު ޕާކުތައް ފަދަ ތަންތަން ރަށްރަށުގެ ރައްޔިތުން އެދޭ ގޮތަށް ކުރިއަށް ގެންދިޔުމަށް އެ ކުންފުންޏާ ހަވާލުލޮށްފައިވާކަން ފާހަގަކުރެއްވިއެވެ.

”ރައީސުލްޖުމްހޫރިއްޔާގެ އިސްނެންގުވުމާއެއްގޮތަށް އެމްޓިސީސީއާ ހަވާލުކުރެވިފައިވާ ޢުމްރާނީ ތަރައްޤީގެ މަސައްކަތްތައް ނިމޭއިރު އަޅުގަނޑު ހިތަށް އަރަނީ ދެން އެހެން ސަރުކާރަކުން މި ރާއްޖޭގައި ކުރާނެ ޢުމްރާނީ ތަރައްޤީގެ މަސައްކަތެއް ނޯންނާނެއޭ. އެހާ ގިނަ މަސައްކަތްތައް އެމަނިކުފާނު އެ ގެންދަވަނީ ކުރައްވަމުން“

އެމްޓީސީސިގެ މެނޭޖިން ޑިރެކްޓަރު އަހުމަދު ސައުދީ

މިއާއެކު ސަޢުދީ ވިދާޅުވީ، ތަރައްޤީއަށް ކުރެވޭ އެފަދަ ކޮންމެ މަސައްކަތަކީ އުޖާލާ މުސްތަޤުބަލެއް ހޯދައިދިނުމަށް ކުރެވޭ މަސައްކަތް ކަމަށެވެ.

”އަޅުގަނޑު ގަބޫލުކުރާގޮތިގައި މިއިން ކޮންމެ މަޝްރޫޢުއެއް ކާމިޔާބު ކަމާއެކު ނިންމާލެވޭނީ، އަދި މިފަދަ ކޮންމެ މަޝްރޫޢުއެއްގެ ފޮނި މީރުކަން ރައްޔިތުންނަށް ހާސިލްކުރެވޭނީ، ސަރުކާރާއެކު ގުޅިގެން އެއްރޫޙެއްގައި މަސައްކަތްކޮށްގެންކަން ޔަގީން. އޭރުން އަޅުގަނޑުމެން ދެކެން ބޭނުންވާ ތަރައްޤީ ކުލަރީތި ހުވަފެންތަކުގައި ހަޤީޤީ ކުލަޖެހިގެންދާނެ. މާރީތި ދިވެހީންގެ ރާއްޖެއެއް އަޅުގަނޑުމެންނަށް ހޯދޭނެ“

އެމްޓީސީސިގެ މެނޭޖިން ޑިރެކްޓަރު އަހުމަދު ސައުދީ

ސަރުކާރުގެ ޓެކްސީ ލައިނުގައި ބޭނުންކުރާނީ، %100 ތިމާވެއްޓާ ރައްޓެހި އުޅަނދުތަކެކެވެ. މީގެތެރޭގައި 3 ސައިޒެއްގެ އުޅަނދު ހިމެނޭއިރު، މި ޚިދުމަތަކީ 24 ގަޑިއިރު ދޭނެ ޚިދުމަތެއްކަން ސަޢުދީ ވަނީ ފާހަގަކުރައްވާފައެވެ.

ޓެކްސީ ލައިންގެ ފުރަތަމަ ހަފުތާގެ ޚިދުމަތަކީ ތަޖުރިބާ ދަތުރުތަކެއްކަމަށާއި، މި މުއްދަތުގައި އެއްވެސް އަގަކާ ނުލާ ޙިދުމަތް ލިބޭނެކަމަށް މޯލްޑިވްސް ޓްރާންސްޕޯޓް އެންޑް ކޮންޓްރެކްޓިން ކޮމްޕެނީ، އެމްޓީސީސީން ބުނެފައިވެއެވެ.