އަޅުގަނޑުމެން ވެރިކަމުގައި ތިބި ނަމަ، މި ޖޫން މަސް އަންނައިރު މުޅި ރާއްޖެ އޮތީހީ އާރްޓީއެލްއިން ގުޅާލާފަ: ޞާލިހު

އެމަނިކުފާނު ވެރިކަމުގައި ހުންނެވި ނަމަ، މި އަހަރުގެ ޖޫން މަސް އަންނައިރު، ރާއްޖޭގެ ހުރިހާ ރަށެއް އާރްޓީއެލް ފެރީއިން ގުޅުވާލެއްވެވީސް ކަމަށް ކުރީގެ ރައީސް އަދި އެމްޑީޕީ އެޑްވައިޒަރ އިބްރާހިމް މުހައްމަދު ޞާލިހު ވިދާޅުވެއްޖެއެވެ.

ކުރިއަށް އޮތް މަޖިލިސް އިންތިޚާބުގައި، ތ.ތިމަރަފުށި ދާއިރާއަށް އެމްޑީޕީގެ ފަރާތުން ވާދަކުރައްވާ ކެންޑިޑޭޓްގެ ކެންޕެއިން ޖަލްސާގައި ރޭ ވާހަކަ ދައްކަވަމުން ރައީސް ޞާލިހު ވުދާޅުވީ، ދިވެހިރާއްޖެ ތަރައްގީ ވާނީ މުޅި ރާއްޖެ ތަރައްގީ ކޮށްގެން ކަމަށެވެ. އަދި އެމަނިކުފާނު ރާއްޖެ ތަރައްގީ ކުރައްވަމުން އައީ އެފަދައިން ކަމަށާ، އެގޮތުން މުޅި ރާއްޖެ އާރްޓީއެލް ފެރީގެ ޚިދުމަތުން ގުޅުވާލުމުގެ މަސައްކަތް ފެއްޓެވިކަން އެމަނިކުފާނު ކުރެއްވިއެވެ.

މިއާއެކު ރައީސް ޞާލިހު ވިދާޅުވީ އެމަނިކުފާނު ވެރިކަމުގައި ހުންނެވި ނަމަ، މި އަހަރުގެ ޖޫންމަހުގެ ނިޔަލަށް އާރްޓީއެލްއިން މުޅި ރާއްޖެ ގުޅުވާލެއްވީސް ކަމަށެވެ.

“ އަޅުގަނޑުމެން ފޯކަސް ކޮށްގެން ކުރަމުން އައި އަނެއް ކަމަކީ މުޅި ރަށްތަށް އާރްޓީއެލް ފެރީގެ ހިދުމަތުން ގުލާލުން. ބާރު ސްޕީޑް، ހަލުވި ސްޕީޑްގައި ދުވާ ލޯންޗު ފަހަރު ބޭނުންކޮށްގެން. އަޅުގަނޑުމެން ވެރިކަމުގައި ތިބި ނަމަ، ކަންދިމާކުރި ގޮތުން މިފަހަރު އަޅުގަނޑުމެންނެއް ނޫން މި ތިބީކީ. ތިބި ނަމަ، އިރާދަކުރެއްވިއްޔާ މި 2024 ވަނަ އަހަރުގެ ޖޫން މަސް އަންނަން ވާއިރަށް، މުޅި ރާއްޖެ އޮތީހީ، އާރްޓީއެލްގެ ޚިދުނަތުން، ލޯންޗު ފަހަރުން ގުޅާ ނިމިފައި.

ކުރީގެ ރައީސް އިބްރާހީމް މުހައްމަދު ޞާލިހު

ރައީސް ޞާލިހު ވިދާޅުވި ގޮތުގައި، މުޅި ރާއްޖެ އާރްޓީއެލް އިން ގުޅާލުމަށް ބަންނަން ބޭނުންވާ ހުރިހާ ލޯންޗު ބަނުމަށް ކުންފުންޏާއި ހަވާލު ކުރެވި، ގިނަ ލޯންޗިތައް ބަދެ ނިމިފައިވާ ކަމަށެވެ. އެހެންނަމަވެސް، މި ސަރުކާރުން އެ ޚިދުމަތްވެސް ނުފަށްޓަވައި، ހިފަހަށްޓާފައިވާ ކަމަށާ، އެކަން އެގޮތަށް ކުރަނީ ރައްޔޮތުން ލައްވާ އާދޭސް ކުރުވަން ކަމަށް އެމަނިކުފާނު ވިދާޅުވިއެވެ.

އެފަދަ ސަބަބު ތަކަށްޓަކައި، މި ސަރުކާރަށް މަޖިލީހުގެ މެޖޯރިޓީ ދިނުމަކީ ބިރުވެރި ކަމެއް ކަމަށް އެމަނިކުފާނު ވިދާޅުވިއެވެ.

މުޅި ރާއްޖެ ފެރީގެ ނިޒާމުން ގުޅައިލުމުގެ ގޮތުން ކުރީ ސަރުކާރުން އެމްޓީސީސީން އާ ހަވާލުކޮށްގެން ހިންގަންފެށި ރާއްޖެ ޓްރާންސްޕޯޓް ލިންކް (އާރްޓީއެލް) ގެ ހިދުމަތް ފެށީ މިދިޔަ އަހަރުގެ ޖޫން މަހުގައެވެ.