މިއަދު ހުއްދަ ދިން ކަށިމިޔަރުގެ މަސްވެރިކަން ކުރެވޭނީ ޑިސެމްބަރުން ޖޫންއަށް

ކަށިމިޔަރުގެ މަސްވެރިކަން ކުރެވޭނީ މީލާދީ ކޮންމެ އަހަރެއްގެ ޑިސެމްބަރު އެކަކުން ފެށިގެން އަންނަ އަހަރުގެ ޖޫން މަހުގެ ނިޔަލަށް ކަމަށް މަސްވެރިކަމާއި ބެހޭ ވުޒާރާއިން ބުނެފިއެވެ.

އެ ވުޒާރާއިން މިއަދު ކުރި އިއުލާނެއްގައި ބުނީ، ކަށިމިޔަރުގެ މަސްވެރިކަން ރާވައި ހިންގައި ބެލެހެއްޓުމާބެހޭ ގަވާއިދުގެ 20 ވަނަ މާއްދާގެ ދަށުން، އެ މިނިސްޓްރީން އެހެން ގޮތަކަށް ކަނޑައަޅައި އާންމު ކުރަންދެން، ކަށިމިޔަރުގެ މަސްވެރިކަން، ޑިސެމްބަރާއި ޖޫން މަހާ ދޭތެރެ ނޫން އެހެން މުއްދަތެއްގައި ނުކުރެވޭނެ ކަމަށެވެ.

އެ ގަވާއިދުގެ 20 ވަނަ މާއްދާގައި ވަނީ ކަށިމިޔަރުގެ މަސްވެރިކަން ކުރެވޭނީ މިނިސްޓްރީން ކަނޑައަޅާ އިއުލާންކުރާ ގޮތެއްގެ މަތީން، މީލާދީ ކޮންމެ އަހަރަކު 7 މަސް ދުވަހަށްވުރެ ދިގު ނޫން މުއްދަތަކަށް ކަމަށް ވެސް އެ އިއުލާނުގައި ބުންޏެވެ.

އެގޮތުން އިއްޔެ މަސްވެރިކަމާއި ބެހޭ ވުޒާރާއިން ވަނީ ކަށިމިޔަރުގެ މަސްވެރިކަން ރާވައި ހިންގައި ބެލެހެއްޓުމާބެހޭ ގަވާއިދުގެ ދަށުން ކަށިމިޔަރުގެ މަސްވެރިކަން މެނޭޖުކުރާނެ ގޮތުގެ ޕްލޭނު ވެސް އާންމުކޮށްފައެެވެ.

އެ ގަވާއިދުގައިވާ ގޮތުން ކަށިމިޔަރުގެ މަސްވެރިކަން ކުރުމުގެ ލައިސަންސް ދޫކުރެވޭނީ އެންމެ ގިނަވެގެން 40 އުޅަނދަށެވެ. އެ މަސްވެރިކަން ކުރުމަށް އެދި، ކަނޑައަޅައިފައިވާ އަދަދަށް ވުރެ އިތުރަށް ހުށަހަޅައިފިނަމަ، އެ ފަރާތްތައް ހުށަހެޅި ތަރުތީބުން ނަންނޯޓުކޮށް، ދަފުތަރު ކުރަން ޖެހޭނެ ކަމަށް ވަނީ ކަނޑައަޅައިފައެވެ.

ކަށިމިޔަރުގެ މަސްވެރިކަން ކުރުމުގެ ހުއްދަދިން އިރު، އެ ހުއްދަ ދެއްވާނެކަން މިދިޔަ އޮގަސްޓު މަހުގެ ތެރޭގައި އިއުލާނުކުރެއްވީ ރައީސް ޑރ. މުޙައްމަދު މުޢިއްޒުއެވެ.