ހުޅުމާލޭގެ އައު މާސްޓާ ޕްލޭން އާންމުންގެ ހިޔާލަށް ހުޅުވާލައިފި

ހުޅުމާލޭގެ ރިވައިޒްޑް މާސްޓާ ޕްލޭނަށް އާންމުންގެ ހިޔާލު ހޯދުމަށް ހުޅުވާލައިފި އެވެ.

މީގެ ދެ ދުވަސްކުރީން ހުޅުމާލޭ ފޭސް 2 ގައި ބޭއްވި ރަސްމިއްޔާތެއްގައި ހުޅުމާލެ އާ މާސްޓާ ޕްލޭން އިފްތިތާހް ކޮށްދެއްވީ ރައީސުލްޖުމްހޫރިއްޔާ ޑރ. މުހައްމަދު މުޢިއްޒެވެ.

އެޗްޑީސީން ބުނީ މާސްޓާ ޕްލޭނާ ގުޅޭ މައުލޫމާތު ޕޯޓަލްއިން މިހާރު ބަލައިލެވޭނެ ކަމަށެވެ. އަދި އާންމުންގެ ހިޔާލަށް އެދި އެ ކުންފުނިން ބުނީ އޮންލައިންކޮށް ހިޔާލު ހުށަހެޅުމުގެ ފުރުސަތު އޮންނާނެ ކަމަށެވެ.

ހިޔާލު ހުށަހެޅުމުގެ ސުންގަޑިއަކީ އަންނަ މަހުގެ 16 ވަނަ ދުވަހު އެވެ. އެޗްޑީސީން ބުނި ގޮތުގައި މާސްޓަ ޕްލޭން ފައިނަލް ކުރުމުގައި އާންމުން ހުށައަޅާ ހިޔާލުތަކަށް ބަލާނެ އެވެ.

މި އައު މާސްޓާ ޕްލޭނަކީ ހުޅުމާލޭގެ އިތުރުވަމުންދާ އާބާދީގެ ބޭނުންތަކަށް އަމާޒުކޮށް އެކުލަވާލާފައިވާ ޕްލޭނެކެވެ. އެގޮތުން އައު ޕްލޭންގެ ދަށުން ހުޅުމާލޭގެ ފޭސް 3 އާއި އިތުރަށް ހިއްކާފައިވާ ބިންތަކުގެ ބޭނުން އެންމެ އެކަށީގެންވާ ގޮތުގައި ހިފޭނެ ގޮތް ހިމަނާފައިވާނެ ކަމަށް އެޗްޑީސީން ބުނެ އެވެ.

އޭގެ ތެރޭގައި ބަނދަރު ސަރަހައްދު 36 ހެކްޓަރުން 53 ހެކްޓަރަށް ބޮޑުކުރުމާއި، ބިން ބޭނުންކުރުމުގެ ޕްލޭންގައި ރެޒިޑެންޝަލް ބޭނުންތަކަށް 29.84 އިންސައްތަ، އަދި ސްކޫލްތަކާއި މިސްކިތްތަކާއި އިދާރާތަކަށް 10.41 އިންސައްތަ ބިން ކަނޑައަޅާފައިވެއެވެ.

ހުޅުމާލެ އަކީ 2004 ވަނަ އަހަރު މީހުން އާބާދުކުރަން ފެށުނު ރާއްޖޭގެ ފުރަތަމަ ޕްލޭންޑް ސިޓީއެވެ. ފޭސް 1 ގައި އެއްލައްކަ މީހުންނަށް އަދި ފޭސް 2 ގައި ދެލައްކަ ފަންސާސް ހާސް މީހުންނަށް ދިރިއުޅެވޭ ގޮތަށް ވަނީ ތަރައްގީ ކޮށްފަ އެވެ. ފޭސް 3 ގެ މަސައްކަތް ވެސް ދަނީ ކުރިއަށެވެ.