ދިވެހި ކޮންމެ ރައްޔިތެއްގެ ވެސް ހުވަފެންތައް ހަގީގަތަކަށް ހަދަން ސަރުކާރުން އެއްބާރުލުން ދޭނެ: ރައީސް މުޢިއްޒު

ދިވެހި ކޮންމެ ރައްޔިތެއްގެވެސް، ޚާއްސަކޮށް ދިވެހި ޒުވާނުންނާއި އަންހެން ކަނބަލުންގެ ހުވަފެންތައް ހަގީގަތަކަށް ހަދައިދިނުމަށް، ސަރުކާރުގެ ފަރާތުން ފުރިހަމަ އެއްބާރުލުމާއި އެހީތެރިކަން ލިބޭނެ ކަމުގެ ޔަގީންކަން ރައީސުލްޖުމުހޫރިއްޔާ ޑރ މުހައްމަދު މުޢިއްޒު ދެއްވައިފި އެވެ.

ދިވެހިންނަށް މި ޔަގީންކަން އެމާނިކުފާނު ދެއްވާފައިވަނީ، ދުބާއިގައި ބާއްވާ ވޯލްޑް ގަވަމެންޓް ސަމިޓް 2024 ގައި ވާހަކަފުޅުދައްކަވަމުންނެވެ.

ރައީސް މުޢިއްޒު ވިދާޅުވިގޮތުގައި އެމަނިކުފާނުގެ ވިސްނުންފުޅަކީ ރާއްޖޭގެ ވިލުންތެރިކަމާއި، ރާއްޖެ އޮންނަ އިސްތިރާޖީ ސަރަހައްދުގެ ބޭނުން އެންމެ މަތީ ދަރަޖައަށް ކުރެއްވުން ކަމަށެވެ. އަދި އެ މަސައްކަތްޕުޅަކީ މުސްތަޤުބަލަށް ވިސްނާ، ޝާމިލު އީޖާދީ ދެމެހެއްޓެނެވި ތަރައްޤީއާއެކު ކުރިއަށްދާ ރާއްޖެއެއް އުފެއްދެވުންކަމަށް ރައީސް ވިދާޅުވިއެވެ.

"އަޅުގަނޑު ކޮންމެ ދިވެއްސަކަށްވެސް، ޚާއްސަކޮށް ދިވެހި ކަނބަލުންނާއި، ދިވެހި ޒުވާނުންނަށް ވެސް ދޭނެ ޔަގީން ކަމަކީ އެބޭފުޅުން ދެކޭ ހުވަފެންތައް ހަގީގަތަކަށް ހަދައިދޭން ސަރުކާރުން އެއްބާރުލުން ދޭނަމޭ. އެބޭފުޅުންގެ ހުނަރުތަކާއި އުފެއްދުންތަކާއި ވިޔަފާރިތަކަށް، އެހެން މީހުންނާއި ހަމައަށް ފޯރުކޮށްދިނުމަށް އެހީވާނަމޭ."

ރައީސުލްޖުމްހޫރިއްޔާ ޑރ މުހައްމަދު މުޢިއްޒު

މިއާއެކު ރައީސުލްޖުމުހޫރިއްޔާ ޑރ މުޢިއްޒު ވިދާޅުވީ، އެމަނިކުފާނުގެ ސަރުކާރުގެ އަމާޒަކީ ދިވެހިރާއްޖޭގެ އިގްތިސާދީ ހާލަތު ބަދަލު ކުރުމަށް ތަރައްގީގެ އެކިއެކި މަޝްރޫޢުތައް ކުރިއަށް ގެންދެވުން ކަމަށެވެ.

އަދި އޭގެ ތެރެއިން، ދިވެހިރާއްޖޭގެ އިގްތިސާދު ފުޅާކޮށް، ރާއްޖެ ތަރައްގީ ކުރުމަށް ދުރުރާސްތާ ޕްލޭންނަކާއި، ފިޔަވަޅު ތަކެއް އެޅުމަކީ ވެސް މުހިންމު ކަމެއް ކަމުގައި އެމަނިކުފާނު ފާހަގަކުރެއްވިއެވެ.

ރައީސުލްޖުމްހޫރިއްޔާ ބައިވެރިވެވަޑައިނުގަންނަވާ މި ވޯލްޑް ގަވަމެންޓް ސަމިޓަކީ މި މަހުގެ 12 އިން 14 އަށް ލދުބާއީގެ މަދީނަތު ޖުމެއިރާގައި ކުރިއަށްދާ ސަމިޓެކެވެ.

މިއަހަރުގެ ވަރލްޑް ގަވަރމަންޓްސް ސަމިޓްގެ ތީމަކީ "ޝޭޕިންގ ފިއުޗަރ ގަވަރމަންޓްސް" އެވެ. މި ސަމިޓުގައި ސަރުކާރުތަކުންނާއި ބައިނަލްއަޤްވާމީ އެކިއެކި ޖަމުޢިއްޔާ ޖަމާޢަތްތަކާއި ޕްރައިވެޓް ސެކްޓަރ އަދި އެކި ދާއިރާތަކަށް ޚާއްސަ ލީޑަރުން ބައިވެރިވެ މުސްތަޤްބަލަށް ހުރި ގޮންޖެހުންތަކާ ގުޅޭގޮތުން މަޝްވަރާކޮށް، ކުރިއަށް އޮތް ޖީލުތަކުގައި އަންނަ ސަރުކާރުތައް ބާރުވެރިކުރުމަށް ކުރަންހުރި ކަންކަމާ ގުޅޭގޮތުން މަޝްވަރާތައް ކުރެވޭނެއެވެ.