ބިދޭސީން ދިރިއުޅޭ ތަނެއްގައި ރޯވެ ބޮޑެތި ގެއްލުންތަކެއް ލިބިއްޖެ

މ.މަލީޝާގެ އެއްވަނަ ފަންގިފިލާގައި ހުރި ކޮޓަރިއެއްގައި ރޯވެ ބޮޑެތި ގެއްލުންތަކެއް ލިބިއްޖެއެވެ.

މި ހާދިސާ ހިނގިކަމުގެ ރިޕޯޓް އެމްއެންޑީއެފަށް ލިބުނީ މިއަދު މެންދުރުފަހު 14:54 ހާއިރުއެވެ. ހާދިސާގެ ރިޕޯޓް ލިބުމާއެކު  އެމްއެންޑީއެފް ފަޔަރ އެންޑް ރެސްކިޔު ސަރވިސް، މާލޭ ފަޔަރ ސްޓޭޝަނުން ވަނީ އެ ސަރަހައްދަށްގޮސް ރޯވި އަލިފާންގަނޑު ނިއްވާލާފައެވެ.

https://x.com/MNDF_Official

އެމްއެންޑީއެފުން ބުނީ، ރޯވި އަލިފާންގަނޑު ނިއްވާލެވުނީ 15:24 ހާއިރުކަމަށެވެ. މި ހާދިސާގައި އެއްވެސް މީހަކަށް އަނިޔާއެއް ވިކަމުގެ ރިޕޯޓު ލިބިފައެއްނުވެއެވެ.

ވޮއިސްއަށް މައުލޫމާތު ހިއްސާކުރަމުން އެ ހިސާބުގައި ދިރިއުޅޭ މީހަކު ބުނީ ރޯވިތަނަކީ، ގިނަ އަދަދެއްގެ ބިދޭސީން އުޅެމުންދާ ތަނެއްކަމަށެވެ. އެމްއެންޑީއެފުން ހިއްސާކޮށްފައިވާ ފޮޓޯތަކަށް ބަލާއިރު، އަލިފާނުގެ ހާދިސާގައި އެތަނުގައި ދިރިއުޅެމުންދިޔަ މީހުންގެ އަންނައުނާއި، ހިފާގެންގުޅޭތަކެތި ވަނީ ވަރަށްބޮޑަށް އަލިފާނުގެ އަސަރުކޮށްފައެވެ.

މި ހާދިސާ ފުލުހުން ދަނީ ތަހްގީގްކުރަމުންނެވެ.