އަލުން ރާއްޖޭގައި ރާބިޠާގެ އޮފީހެއް ޤާއިމު ކުރުމަށް މަޝްވަރާކޮށްފި

މީގެ ކުރިން ރާއްޖޭގައި އޮފީހެއްގެ ގޮތުގައި ހުރި ޤާއިމުކޮށްފައިވާ ދުނިޔޭގެ މުސްލިމް ގައުމުތަކުން ބައިވެރިވާ ސައުދީ އަރައްބިއްޔާގެ ރާބިޠަތުލް އާލަމިލް އިސްލާމީގެ އޮފީހެއް އަލުން ރާއްޖޭގައި ޤާއިމުކުރުމަށް މަޝްވަރާ ކޮށްފިއެވެ.

މި މަޝްވަރާތައް ކުރިއަށް ގެންދެވިފައިވަނީ މިއަދު ހެނދުނު މައްކާގައި ހުންނަ ރާބިޠާގެ ހެޑް އޮފީހުގައި، ރާއްޖޭގެ އިސްލާމީ ކަންތައްތަކާއި ބެހޭ ވަޒީރު ޑރ. މުހައްމަދު ޝަހީމް އަލީ ސައީދު އާއި މުސްލިމު ވޯލްޑް ލީގްގެ (ރާބިޠަތުލް ޢާލަމިލް އިސްލާމީ) ޑެޕިއުޓީ ސެކްރެޓަރީ ޖެނެރަލް ޑރ. އަބްދުއްރަހްމާން ބިން އަބްދުالله ޒައިދު އާއި ދެބޭފުޅުން ބައިވެރިވެ ވަޑައިގެން ބޭއްވެވި ބައްދަލުވުމުގެ ތެރޭގައެވެ.

މި ބައްދަލުވުމަސްފަހު އިސްލާމީ ކަންތައްތަކާއި ބެހޭ ވުޒާރާއިން ވިދާޅުވީ، ރާބިޠާއާއި ރާއްޖެއާ ދެމެދު ގުޅުން އިތުރަށް ވަރުގަދަކޮށް، އެވުޒާރާއާއި ރާބިތާއާ ދެމެދު 2012-2015 އަށް ސޮއިކޮށްފައިވާ ތިން އެއްބަސްވުމަށް އަމަލުކުރަން ފަށާނެ ކަމަށާއި، ރާއްޖޭގައި ރާބިޠާގެ އޮފީސް އަލުން އިއާދަކޮށް، ރާއްޖޭގެ އިސްލާމީ ފަތުވާ ކައުންސިލް ތަރައްގީކުރުމުގައި ރާބިޠާގެ އިސްލާމީ ފިގުހު އެކަޑަމީގެ އެހީތެރިކަން ހޯދުމާމެދު ވެސް މަޝްވަރާކުރެއްވި ކަމަށެވެ.

މިއަދުގެ މި ބައްދަލުވުމުގައި ރާއްޖޭގެ އިސްލާމީ ކަންތައްތަކާއި ބެހޭ ވުޒާރާގެ އިސްބޭފުޅުން ބައިވެރިވެ ވަޑައިގެންނެވި އިރު ، ރާއްޖޭގެ އިސްމީ ކަންތައްތަކާއި ބެހޭ ވަޒީރު ޑރ. މުޙައްމަދު ޝަހީމް ޢަލީ ސަޢީދު ވަނީ ރައީސުލްޖުމްހޫރިއްޔާ ޑރ. މުހައްމަދު މުއިއްޒުގެ ސަރުކާރުގެ އިސްލާމީ ތަޞައްވުރު ޙިއްސާކުރައްވާފައެވެ.

މިއަދުގެ މި ބައްދަލުވުމުގެ އިތުރުންވެސް މިނިސްޓަރ ޝަޙީމް ވަނީ ސަޢުދީގައި ހުންނަ ތަފާތު މުއައްސަސާތަުގެ އިސްވެރިންނާއި މަޝްވަރާތައް ބާއްވަވާފައެވެ.