ފްލައި ދުބާއީގެ ބޯޓް ހައިޖެކްކުރަން އުޅުނު ހާދިސާ: ތަހުގީގަށް ދެ ދިވެއްސަކާ ސުވާލުކުރަނީ

ފްލައި ދުބާއީގެ ބޯޓް ހައިޖެކްކުރަން އުޅުނު ހާދިސާއާ ގުޅިގެން ފަށާފައިވާ ފުޅާ ތަހުގީގަށް ދެ ދިވެއްސަކާ ސުވާލުކުރަން ފަށައިފި އެވެ.

މިއީ އެ އެއާލައިނާއި ވަރަށް ފަހުން ގުޅުނު ދެ މުވައްޒިފުންނެވެ. ރައީސް އޮފީހުގެ ތަރުޖަމާން މުހައްމަދު ހުސައިން ޝަރީފް ވިދާޅުވީ ފްލައި ދުބާއީގެ ބޯޓް ހައިޖެކްކުރަން އުޅުނު ހާދިސާއާ ގުޅިގެން ފަށާފައިވާ ތަހުގީގަށް ދެ ދިވެއްސަކު ހާޒިރުކޮށްފައިވާކަން އެނގިފައިވާ ކަމަށެވެ.

ނަމަވެސް އެ ދެ ދިވެހީން ހައްޔަރުކުރި ކަމަށް ބުނެ ފެތުރެމުންދަނީ ޔަގީން ކުރެވޭ ވާހަކަތަކެއް ނޫން ކަމަށް ތަރުޖަމާން ވިދާޅުވި އެވެ. ތަރުޖަމާން ވިދާޅުވީ އެކަމާއި ގުޅިގެން ބަލަން ޖެހޭ ކަންކަން ބަލަމުންދާ ކަމަށެވެ.

އެ ދެ މީހުންގެ މައްޗަށް އެ ހާދިސާއާ ގުޅިގެން ތުހުމަތެއް އޮތް ކަަމުގެ އިތުބާރު ހުރި އެއްވެސް މައުލޫމާތެއް ވެސް ނުލިބޭ ކަމަށް ތަރުޖަމާން ވިދާޅުވި އެވެ.

ބައެއް ރިޕޯޓްތައް ބުނާ ގޮތުގަައި އެ ދެ ދިވެހީންނަކީ, ފްލައި ދުބާއީގެ ބޯޓް ހައިޖެކްކުރަން އުޅުނު ހާދިސާގެ ތުހުމަތު އޮތް ބޯޓްގެ ކޯޕައިލެޓް, އޮމާނަށް ނިސްބަތްވާ ހައްމާމް އަލް ހަމާނިއާ އެއް ބިލްޑިންއެއްގައި ދިރިއުޅޭ ދެ މީހުންނެވެ.

ވައިގެ ދަތުރުފަތުރުގައި ހިނގި އެންމެ ނުރައްކާތެރި އެއް ހާދިސާ ކަމުގައިވާ ފްލައި ދުބާއީގެ ބޯޓް ހައިޖެކްކުރަން އުޅުނު ހާދިސާއާ ގުޅިގެން ޔޫއޭއީން ވަނީ ފުޅާ ތަހުގީގެއް ފަށާފައެވެ. މިހާތަނަށް އެނގިފައިވާ ގޮތުގައި ކޯޕައިލެޓް ވަނީ ކޯރާޑިއަކުން ޕައިލެޓަށް ހަމަލާދީފަ އެވެ.

މިއީ ބޯޓް ވައްޓާލަން ހިންގި ޓެރަރިޒަމްގެ އަމަލެއްގެ ގޮތުގައި ސިފަކޮށް ޔޫއޭއީން ވަނީ އެ މައްސަލަ ވަަރަށް ސީރިއަސް މައްސަލައެއްގެ ގޮތުގައި ބަލާ ހަރުކަށި ފިޔަވަޅު އަޅާނެ ކަމުގައި ބުނެފަ އެވެ. ރިޕޯޓްތައް ބުނާ ގޮތުގައި ހައްމާމް އަލް ހަމާނިއާ އަކީ "ހަރުކަށި" ފިކުރުގެ މީހެކެވެ.

އޭނާ އެފަދަ ކަމެއް ރޭވީ ސީދާ ކީއްވެ ކަމެއް އަދި ސާފެއް ނުވެ އެވެ. ވައްޓާލަން އުޅުނު ބޯޓްގައި ގިނައީ ފަލަސްތީނާއި ދެކޮޅަށް ޖަރީމާ ހިންގަމުންދާ އިޒްރޭލަށް ނިސްބަތްވާ ރައްޔިތުންނެވެ. ބޯޓްގައި 182 މީހަކު ދަތުރުކުރި ކަމަށް ފުލައި ދުބާއީން ބުނެ އެވެ.