ޙަލާލް ޓޫރިޒަމަށް ޚާއްސަކޮށް ރާއްޖޭގެ ބައެއް ރަށްތައް ތަރައްޤީ ކުރަނީ

ދިވެހިރާއްޖޭގެ ފަތުރުވެރިކަމުގެ ސިނާއަތު އިތުރަށް ފުޅާކޮށް، ޙަލާލް ޓޫރިޒަމްގެ ދާއިރާގައި ކުރިއަރާފައިވާ މަންޒިލަކަށް ހެދުމަށްޓަކައި، ބައެއް ރަށްތައް ހަމައެކަނި ޙަލާލް ޓޫރިޒަމަށް ޚާއްސަކޮށް ތަރައްޤީ ކުރުމަށް ނިންމާފައިވާ ކަމަށް ރައީސް ޑރ މުޙައްމަދު މުޢިއްޒު އިއުލާން ކުރައްވައިފިއެވެ.

މިއަދު އެކްސްގައި ކުރެއްވި ޕޯސްޓެއްގައި ރައީސް ވިދާޅުވީ، ދިވެހިރާއްޖެއަކީ ފަތުރުވެރިކަމުގެ ދާއިރާގައި ދުނިޔޭގެ މަގުބޫލުކަން ހޯދާފައިވާ ގައުމެއް ކަމަށެވެ.

އަދި ރާއްޖެއަކީ ދެމެހެއްޓެނިވި ގޮތެއްގައި ފަތުރުވެރިކަން ކުރިއަރުވައި، ފަތުރުވެރިންނަށް ދެވޭ ޚިދުމަތުގެ ފެންވަރު މަތިކޮށް، މެހެމާންދާރީ އަދާކުރުމުގައި ނަމޫނާ މަންޒިލެއްކަންވެސް އެމަނިކުފާނު ފާހަގަކޮށްފައިވެއެވެ.

ސަރުކާރުގެ މިހާރުގެ އަމާޒަކީ ޙަލާލް ޓޫރިޒަމްގެ ދާއިރާގެ ކުރިއަރާފައިވާ މައި މަންޒިލަކަށް ރާއްޖެ ހެދުން. އަދި ރާއްޖޭގެ ބައެއް ރަށްތައް ހަމައެކަނި ޙަލާލް ޓޫރިޒަމަށް ޚާއްސަ ކުރުމަށް ސަރުކާރުން ވަނީ ނިންމާފައި.

ރައީސް ޑރ މުޙައްމަދު މުޢިއްޒު

މި އައު މަޝްރޫއުގެ ދަށުން އިންވެސްޓަރުންނަށް ޚާއްސަ ލުއިތަކެއް ދިނުމަށް ވެސް ވަނީ ނިންމާފައިވާ ކަމަށާ، މީގެ ސަބަބުން ދިވެހިރާއްޖޭގެ ފަތުރުވެރިކަމުގެ އުފެއްދުންތައް އިތުރަށް ތަނަވަސްވެ، ފުޅާވެގެންދާނެ ކަމަށް އެމަނިކުފާނު ވިދާޅުވިއެވެ.

މި މަޝްރޫއުގެ އިތުރު ތަފްސީލްތައް ކުރިއަށް އޮތް ހަފްތާގައި ޓޫރިޒަމް މިނިސްޓްރީން ހާމަކުރާނެ ކަމަށް ރައީސް މުޢިއްޒު ވިދާޅުވުއެވެ.

މިއާއެކު ރައީސް ވަނީ، ދިވެހިރާއްޖެއަކީ އިންވެސްޓްމަންޓަށް ތައްޔާރަށް އޮތް، އަދި ދުނިޔޭގެ ހުރިހާ ކަންކޮޅުތަކުން އިންވެސްޓަރުންނަށް މަރުހަބާ ކިޔާ ޤައުމެއްކަން ފާހަގަކުރައްވާފައެވެ.