ފުލުހުން ހިންގި ބޮޑު އޮޕަރޭޝަން ނިންމާލައިފި
ގެއްލިފައިވާ މީހުންނާއި އަދި މަރާލެވިފައިވާ މީހުންގެ މައްސަލަތައް ބަލާ ކޮމިޝަންގެ ތަހުގީގަށްޓަކައި ފުލުހުން އިއްޔެއާއި މިއަދު ހިންގި އޮޕަރޭޝަން ނިންމާލައިފިއެވެ.
ފުލުހުން ބުނިގޮތުގައި މި އޮޕަރޭޝަންގައި ވަނީ މާލެއާއި އައްޑޫ ސިޓީގެ 17 ތަނަކާއި އަދި 11 މީހަކު ބަލާ ފާސްކޮށްފައެވެ. މި އޮޕަރޭޝަންއަކީ ބަލާފާސްކުރުމުގެ އޮޕަރޭޝަނެއްކަމުން އެއްވެސް މީހަކު ހައްޔަރުކޮށްފައެއް ނުވެއެވެ.
މިއީ ރިޔާސީ ކޮމިޝަނުން ފުލުހުންނަށް ހަވާލުކުރި ކޯޓު އަމުރުތަކެއް ތަންފީޒުކުރުމަށް ހިންގި އޮޕަރޭޝަނެކެެވެ.
މި އޮޕަރޭޝަންގައި ވަނީ މީހުން ދިރިއުޅޭ ތަންތަނާއި، ފިހާރަތަކާއި، ކެފޭ ރެސްޓޯރެންޓްގެ އިތުރުން ބޯޓެއްެވެސް ބަލާފާސްކޮށްފައެވެ.
މި އޮޕަރޭޝަން ކުރިއަށް ގެންދިޔައިރު، އެ ސަރަހައްދުތަކުގައި ވަނީ ސަލާމަތީ ފިޔަވަޅުތައް ވަރަށް ވަރުގަދަކޮށްފައެވެ. އެގޮތުން މިކަމުގައި ބައިވެރިވި ގިނަ ފުލުހުން މޫނު ނިވާކޮށްގެން ތިބިއިރު، ސިފައިންވެސް ވަނީ މާލޭގައި ބަޑިއާއި އެކު ހަރަކާތްތެރިވެފައެވެ.
ކޮމެންޓް ކުރޭ
ކޮމެންޓްސް
މިހާތަނަށް ކޮމެންޓެއް ނެތް
