ހުޅުދޫ ޑަކް ޕާކުގެ ދިރުންތައް މަރުވަނީ، ވިހަ ދިންކަމުގެ ތުހުމަތު
އައްޑޫ ސިޓީ ހުޅުދޫގެ އަސްދޫނި ޕާކުގައި ހުރި ދިރުންތަކަށް ބަޔަކު ވިހަދީ މަރާލިކަމަށް ބުނާ މައްސަލައެއް ފުލުހަށް ހުށަހަޅައިފިއެވެ.
އެފަދަ މައްސަލައެއް ފެންމަތިވެފައިވަނީއެ ޕާކުގައި ތިބި އަސްދޫނިތަކާއި މަސްތައް މަރުވެފައިވާ މަންޒަރު ފެންނަ ފޮޓޯތަކެއް މިއަދު ފޭސްބުކްގައި ދައުރުވުމާއެކުއެވެ.
މިއަދު ހެނދުނު މީހަކު ފޭސްބުކްގައި ކުރި ޕޯސްޓެއްގައި ބުނީ އެ ޕާކުގެ ކޯރުގައި ދިރިއުޅުނު އަސްދޫނިތަކާއި މަސްތަކަށް ކޮންމެވެސް ބަޔަކު ވިހަދީ މަރާލާފައިވާ ކަމަށެވެ.
" މިކަމަކީ ވަރަށް ނާތަހުޒީބު އަމަލެއް. އެއްބަޔަކު ރަށުގެ ދުޅަހެޔޮކަމަށް މަސައްކަތް ކުރާއިރު އަނެއްބަޔަކު ދަނީ އެކަންކަން ހަލާކު ކުރަމުން. މީއީ ވަރަށް ހިތާމަ ހުރިކަމެއް. މިކަހަލަ ނާތަހުޒީބު އަމަލުތައް ހުއްޓާލަ،" އެ ޕޯސްޓުގައި ވެއެވެ.
އެނގިފައިވާ ގޮތުގައި އެ ޕާކުގައި ދިރިއުޅުނު ތަކެތިތައް މަރުވާން ފެށީ މީގެ ދެ ދުވަސްކުރިން ފެށިގެންނެވެ. އެ މައްސަލަ މިހާރު ފުލުހުންނަށް ވަނީ ހުށަހަޅާފައެވެ. އެކަން އެގޮތަށް ވާންފެށުމުން، އެތަން ސާފުކޮށް ރީތިކުރުމުގެ މަސައްކަތް އެ ރަށުގެ ރައްޔިތުންދަނީ ކުރަމުންނެވެ.
ކޮމެންޓް ކުރޭ
ކޮމެންޓްސް
މިހާތަނަށް ކޮމެންޓެއް ނެތް
