"ހައްދު ފަހަނައަޅާ ދިއުމާ ދެކޮޅަށް ވާހަކަ ދައްކަވާތީ ފައިވާނުގެ ވަދު ބުރި ކޮށްލައިފި"
ދީނުގެ ނަމުގައި ހައްދުފަހަނަޅައި ދިޔުމާއި ދެކޮޅަށް ވާހަކަ ދައްކާތީ މަގުމަތިންނާއި މިސްކިތް ދޮށުން ދިމާކޮށް ފުރައްސާރަ ކުރުމާއި، ސޯޝަލްމީޑިއާ މެދުވެރިކޮށް އިންޒާރު ދިނުން ފަދަ ކަންކަން ކުރިމަތިވާ ކަމަށް އައްޝެއިހު މުހައްމަދު އަނީލް ވިދާޅުވެއްޖެއެވެ.
އަނީލް މިއަދު ކުރެއްވި ޓްވީޓެއްގައި ވިދާޅުވީ އެބޭފުޅާއަށް އުނދަގޫ ކުރުމަށް ގިނަ އަމަލުތަކެއް ބައެއް ފަރާތްތަކުން ހިންގަމުން އަންނަ ކަމަށެވެ. އަދި ފަހަކަށް އައިސް މިކަން އިތުރުވެފައިވާ ކަމަށް ވިދާޅުވިއެވެ.
އަދި ވިދާޅުވީ ވަކިން ޖަމާއަތް ހަދައިގެން މިސްކިތުގައި ނަމާދު ކުރާ ބަޔަކު މީހުންގެ ފައިވާނުގެ ވަދު ބުރި ކުރަމުން އަންނަ ކަމަށެވެ. ޝެއިހު އަނީލް ވިދާޅުވެ ފައިވަނީ އިއްޔެ އަސުރު ނަމާދަށް ފަހު، މިސްކިތުން ނުކުންނެވިއިރު، އެބޭފުޅާގެ ފައިވާނުގެ ވަދު ބުރިކޮށްފައިވާ ކަމަށެވެ.
" މިކަން ކޮށްފައިވަނީ ޢާއްމުކޮށް މިސްކިތުގެ ޖަމާއަތް ނިމޭފަހުން މިސްކިތަށް އަރައި ވަކިން ޖަމާއަތުގައި ނަމާދު ކުރާ، ގުރޫޕެއްގެ ބަޔަކު ކަމަށް މިސްކިތަށް އެގަޑީގައި އެރި ބައެއްމީހުން ބުނި" ޝެއިހު ވިދާޅުވިއެވެ.
ޝެއިހު އިތުރަށް ވިދާޅުވީ، މިކަންތަކާއި ގުޅިގެން، އަދުގެ ސަރުކާރާއި ފުލުހުންގެ ފަރާތުން ލިބެންޖެހޭ އެއްބާރުލުން އެހީތެރިކަމާއި އެއްބާރުލުން ލިބެމުންދާކަން ޝުކުރުވެރިކަމާއެކު ފާހަގަ ކުރައްވާ ކަމަށެވެ.
ފޮޓޯ: ޝެއިހު އަނީލް/ ޓްވީޓަރ
ކޮމެންޓް ކުރޭ
ކޮމެންޓްސް
މިހާތަނަށް ކޮމެންޓެއް ނެތް
