އައިޖީއެމްއެޗް މުއައްޒަފުންނަށް ދިން ލުއިތަށް އަނބުރާ އަތުލުމަށްފަހު، އަލުން ދީފި

އިންދިރާގާންދީ މެމޯރިއަލް ހޮސްޕިޓަލުގެ މާބަނޑު އަދި ޅަދަރިމައި މުއައްޒަފުންނަށް ދިން، ލުއިތައް އަބުރާ ގެންނައުމަށް ނިންމި ނިންމުން އަނބުރާ ގެންގޮސް އަނެއްކާވެސް މުއައްޒަފުންނަށް ލުއިތައް ދިނުމަށް އެ ހޮސްޕިޓަލުން ނިންމައިފިއެވެ.

އައިޖީއެމްއެޗް ހޮސްޕިޓަލުން އިއްޔެ ނެރުނު އިންޓަރނަލް މެމޯއަކުން މުއައްޒަފުންނަށް އަންގާފައިވަނީ، އެ ހޮސްޕިޓަލުގައި މަސައްކަތްކުރާ މާބަނޑު އަންހެނުންނާއި، ޅަދަރިމައިންނަށް ވަޒީފާގައި ދެމުން އައި ފްލެކްސިބަލް ޑިއުޓީ ހަމަޖައްސައި ދިނުން ހުއްޓާލުމަށް ނިންމާފައިވާކަމަށެވެ.

އައިޖީއެމްއެޗްގެ އެ ނިންމުމާ ގުޅިގެން އެ ހޮސްޕިޓަލުގެ ގިނަ އަދަދެއްގެ މުއައްޒަފުންތަކެއް ވަނީ އެކަމާ ގުޅޭގޮތުން ޝަކުވާކޮށްފައެވެ. އައިޖީއެމްއެޗުން ބުނީ ނެރުނު މެމޯއާ ގުޅިގެން މުއައްޒަފުންގެ ފަރާތުން ލިބުނު ޝަކުވާތަކާއި ކަންބޮޑުވުން އެނގިފައިވާކަމަށެވެ.

އައިޖީއެމްއެޗުން އިއްޔެ ނެރުނު މެމޯގައި ބުނީ ފްލެކްސިބަލް ޑިއުޓީ ނުދޭގޮތަށް ހަމަޖައްސަން ޖެހުނީ، އެ ހޮސްޕިޓަލަކީ 24 ގަޑިއިރު ހިދުމަތްދޭ ތަނެއްކަމުން މިވަގުތު ގިނަ އަދަދެއްގެ މުއައްޒަފުން ފްލެކްސިބަލް ޑިއުޓީ އަދާކުރަމުންދާތީވެ، ހޮސްޕިޓަލުގެ ހިދުމަތްތަކަށް ބުރޫއަރާތީ ކަމަށެވެ.

އެހެންކަމުން ސިވިލްސާވިސް ގަވާއިދުގެ 183 ވަނަ މައްދާއަށް ރިޔާއަތްކޮށް، ހޮސްޕިޓަލުގެ މެނޭޖްމަންޓުން ނިންމާފައިވަނީ ފްލެކްސިބަލް ޑިއުޓީ ހަމަޖައްސައިދިނުން ހުއްޓާލުމަށެވެ. އަދި މިވަގުތު ފްލެކްސިބަލް ޑިއުޓީގައި ތިބި މުއައްޒަފުންނަށް ދެމަސް ދުވަހުގެ މުއްދަތެއް ދިނުމަށްފަހު، ފްލެކްސިބަލް ޑިއުޓީ ދިނުން ހުއްޓާލެވޭނޭކަމަށްވެސް އައިޖީއެމްއެޗުން ވަަނީ ބުނެފައެވެ.

ސިވިލްސާވިސް ގަވާއިދުގެ 183 ވަނަ މައްދާގައި ބުނެފައިވަނީ، ސިވިލް ސާވިސްގެ މުއައްޒަފުންގެ ތެރެއިން މާބަނޑުވުމުގެ ސަބަބުންނާއި ޅަދަރިމައިވުމުގެ ސަބަބުން ކަނޑައެޅިފައިވާ ގަޑިތަކަށް އޮފީހަށް ނުކުމެ އުޅުމުގައި ދަތި އުނދަގޫވާ މުއައްޒަފުންނަށް ފްލެކްސިބަލްކޮށް މަސައްކަތް ކުރެވޭނެ މަސައްކަތު ގަޑިތަކެއް ހަމަޖައްސައިދިނުމަށް އެފަދަ މުއައްޒަފަކު އެދިއްޖެނަމަ، ޤަވާއިދުގައިވާ ގޮތުގެ މަތިން އެ އިދާރާއެއްގެ އެޗްއާރުއެމްޑީ ކޮމިޓީއަށް އެފަދަ އިންތިޒާމެއް ހަމަޖައްސައި ދެވިދާނެ ކަމަށެވެ.