މޫސުން ގޯސްވާނެތީ, ރައްކާތެރިކަމުގެ ފިޔަވަޅު އެޅުމަށް އެންޑީއެމްއޭ އިން އިލްތިމާސްކޮށްފި

މޫސުން ގޯސްވުމުގެ ސަބަބުން ލިބިދާނެ ގެއްލުމަކަށް ރައްކާތެރިވުމަށް ނޭޝަނަލް ޑިޒާސްޓަރ މެނޭޖްމަންޓް އޮތޯރިޓީ (އެންޑީއެމްއޭ) އިން އިލްތިމާސްކޮށްފިއެވެ.

އެންޑީއެމްއޭއިން މިއަދު ނެރުނު ބަޔާނެއްގައި، ގަދަ ވިއްސާރައަށް ތައްޔާރުވުމަށް އިލްތިމާސް ކުރައްވާފައިވަނީ، ކުރިއަށް އޮތް ފަސް ދުވަހު ރާއްޖެ ސަރަހައްދަށް މޫސުން ވަރަށް ގޯސްވާނެކަމަށް މޫސުމާ ބެހޭ ގައުމީ އިދާރާއިން ލަފާކުރުމާ ގުޅިގެންނެވެ.

އެގޮތުން އެންޑީއެމްއޭއިން ނެރުނު ބަޔާނުގައި ބުނެފައިވަނީ، ރާއްޖޭގެ ސަރަހައްދުގައި ހުޅަނގު މޫސުމުގެ ބާރު ގަދަވާނެކަމަށް ބެލެވޭތީ، މާދަމާ ރެއިން ފެށިގެން ކުރިއަށް އޮތް 5 ދުވަހު ރާއްޖެ ސަރަހައްދަށް އާންމުކޮށް ވައިބާރުވެ ކަނޑުތައް ވަރަށް ގަދަވެ، ވިލާގަނޑުގައި ގަޑިއަކު 45 މޭލާއި 50 މޭލާ ދެމެދު ވައިބާރުވާނެކަމަށާއި ދިޔަވަރު ބޮޑުވާ ވަގުތު ތަކުގައި ބައެއް ރަށްތަކަށް އުދައިގެ އަސަރުކުރާނެކަމަށް މޫސުމާ ބެހޭ ޤައުމީ އިދާރާއިން މައުލޫމާތުދޭ ކަމަށެވެ.

އެހެންކަމުން، ޢާންމު ރައްޔިތުންގެ މުދަލާއި ގެދޮރަށް ލިބިދާނެ ގެއްލުމަކުން ރައްކާތެރިވުމަށް ދުރާލާ މަސައްކަތް ކުރުމަށް އެ އޮތޯރިޓީން ވަނީ އިލްތިމާސްކޮށް، ރައްކާތެރިވުމުގެ ގޮތުން އެޅިދާނެ ބައެއް ފިޔަވަޅުތައް ހާމަކުރައްވާފައެވެ. އެގޮތުން، އެންޑީއެމްއޭއިން ފާހަގަ ކޮށްފައިވާ ބައެއް ރައްކާތެރިކަމުގެ ފިޔަވަޅުތަކަކީ:

- ފެންބޮޑުވެދާނެ ކަމަށް ތައްޔާރުވުން

- ގެއަށް ފެން ނުވަންނާނެހެން ވެލި ބަސްތާ ފަދަ ތަކެތި ޖެހުން

- ފެން ބޮޑުވެއްޖެ ހިނދެއްގައި ގެއްލުން ވާނެ ފަދަ މުދާ އުސް ތަންތަނަށް ބަދަލުކުރުން

- ގަދަ ވައިގެ ސަބަބުން އެއްލައިލަފާނެ ތަކެތި ބަނދެ ރައްކަކުރުން

- ފުރާޅު އެއްލައިލަފާނެ ކަމަށް ލަފާކުރެވޭނަމަ، ކުރިޔާލައި ފުރާޅު ހައްޔަރުކުރުން

- ކަރަންޓުން ބޭނުން ކުރާ ތަކެތި، ބޭނުން ނުކުރާ ވަގުތު ތަކުގައި ނިއްވާލާފައި ބެހެއްޓުން

- ކަނޑުދަތުރުފަތުރު ކުރާނަމަ މޫސުމަށް ބަލައިގެން ދަތުރުކުރުމަށް ސަމާލުވުން

- ދަތުރަކަށް ފުރުމުގެ ކުރިން، ސަލާމަތީ ކަންކަން ކަށަވަރުކުރުމާއި މުވާސަލާތީ ނިޒާމުގެ ފުރިހަމަކަން ޔަޤީން ކުރުން

ރާއްޖެއަށް މިހާރު ކުރަމުން ދާ ގަދަ ވިއްސާރައިގައި އެކި ރަށްރަށަށް މިހާރުވެސް އެކި ވަރުގެ ގެއްލުންތައް ވަނީ ލިބިފައެވެ. އެހެންކަމުން އެންޑީއެމްއޭގެ އިތުރުން މޫސުމާ ބެހޭ ޤައުމީ އިދާރާއިންވެސް ވަނީ، މޫސުމަށް ސަމާލުވެ ރައްކާތެރިވެ ތިބުމަށް އިލްތިމާސު ކުރައްވާފައެވެ.