ލޯކަލް މާރުކޭޓަށް ތަކެތި ގެނެސް ވިއްކުމުގެ ކޮންޓްރޯލް ބިދޭސީން ނަގާފައިވާތީ މޭޔަރު އާޒިމްގެ ކަންބޮޑުވުން!

ލޯކަލް މާރުކޭޓަށް ތަކެތި ގެނެސް ވިއްކުމުގެ މުޅި ނިޒާމްގެ ކޮންޓްރޯލް ބިދޭސީން ނަގާފައިވާކަމަށް ވިދާޅުވެ، އެކަމާއި ގުޅިގެން މާލެ ސިޓީ ކައުންސިލްގެ މޭޔަރ އާދަމް އާޒިމް ކަންބޮޑުވުން ފާޅުކުރައްވައިފިއެވެ.

އާޒިމް މިފަދައިން ވިދާޅުވީ މޯލްޑިވްސް ޓްރޭޑް އެސޯސިއޭޝަން އިފްތިތާހުކުރުމުގެ ރަސްމިއްޔާތު ޝަރަފުވެރިކޮށްދެއްވާ ވާހަކަދައްކަވަމުންނެވެ. އާޒިމް ވަނީ ވިޔަފާރީގެ ގޮތުން ބަލާއިރު މާލެސިޓީ ކައުންސިލްގެ ބެލުމުގެ ދަށުގައި އެ ދާއިރާ އާއި ގުޅުން ހުރި ތަންތަން އެބަހުރިކަމަށާއި މާރުކޭޓުތަކަކީ އެފަދަ ތަނެއް ކަމަށް ވިދާޅުވެ، މާލޭގެ މާރުކޭޓަށް ހެޔޮ ބަދަލުތަކެއް ގެންނަން ޖެހޭ ކަން ފާހަގަކުރައްވާފައެވެ.

މިގޮތުން އާޒިމް ވިދާޅުވީ އެތަނުގައި ތިބި ވިޔަފާރިވެރިންގެ ވަރަށް ގިނަ ޝަކުވާ ހުރިކަން ފާހަގަކުރެވޭ ކަމަށާއި މާރުކޭޓުގައި ޚިދުމަތްދޭ ވިޔަފާރިވެރިންގެ ހައްގުތައް ހޯދާދޭން މަސައްކަތް ކުރަން ޖެހޭ ކަމަށެވެ. އަދި ޕްރޮޑަކްޓް އުފެއްދުމާއި، މާލެ އަށް ގެނައުމާއި މާލެއިން މާރުކޭޓާއި ހަމައަށް ޕްރޮޑަކްޓް ފޯރުކޮށްދިނުމުގައި ވެސް ބިދޭސީން އިންތިހާ ގިނަވުމަކީ ވެސް ވިޔަފާރިވެރިންގެ ވަރަށް ބޮޑު ޝަކުވާ އެއްކަން އާޒިމް ވިދާޅުވިއެވެ.

"ޝަކުވާ ހަމައެކަނި ގޮޅިއާ ހަމައިން ކޮށްގެން ނުވާނެ. ކީތްވެހޭ އަޅުގަނޑުމެންގެ މީހާ އެ ނުއުފެއްދީ. ކީއްވެހޭ ގެންނަން އަޅުގަނޑުމެންގެ މީހާ ނެތީ. ކީއްވެހޭ ގޮޅިއަށް އެ ގެންނަން އަޅުގަނޑުމެންގެ މީހާ ނެތީ. މިކަން ފެށެންވީ ރަށާއި ހިސާބުން. ކީއްވެތޯ ޖަވާބު ބޭނުންވޭ މި ސުވާލު މި ޝަކުވާ ކުރާތާ އެތައް ދުވަހެއް ވެއްޖެ. މިކަމާ އިކޮނޮމިކް މިނިސްޓްރީންވެސް ފުލުހުންވެސް އިކޮނޮމިކް މިނިސްޓްރީން ވެސް އެބަޖެހޭ ސަމާލުވާން"

އާޒިމް ވިދާޅުވިއެވެ.

މީގެ އިތުރުންވެސް އާޒިމް ވިދާޅުވީ ރަށްރަށުގެ ދަނޑުވެރިކަން ރަނގަޅުކޮށް އެގްރިކަލްޗަރ ކުރިއަރުވަން ކުރީގެ އިކޮނޮމިކް މިނިސްޓަރ އަދި އެމްޑީޕީގެ ޗެއަރޕަރސަން ފައްޔާޒް އިސްމާއިލް މަސައްކަތްކުރައްވާފައިވާ ކަމަށެވެ. އަދި ބޭރު މީހުން ނުލާ ގައުމު ނުހިންގޭނެ ކަމަށް ޤަބޫލުކުރައްވާ ކަމަށާއި އެހެންކަމުން ބޭރުމީހުން ބެލެހެއްޓުމުގެ ނިޒާމް ހަރުދަނާކުރަން ޖެހޭ ކަމަށް އާޒިމް ވިދާޅުވިއެވެ.