"ވާނުވާ ބަންދު" މީހުންގެ ހައްގުގައި ވަކާލާތުކުރާ މީހުންނާއެކު ރައީސްގެ ބައްދަލުވުމެއް

"ވާނުވާ ބަންދު" ގައި ތިބި މީހުންގެ ހައްގުގައި ވަކާލާތު ކުރާ މީހުންނާއެކު ރައީސުލްޖުމްހޫރިއްޔާ ޑރ. މުހައްމަދު މުއިއްޒު، މިއަދު ބައްދަލު ވުމެއް ބާއްވަވައިފި އެވެ.

މިއަދު މެންދުރު ފަހު ރައީސުލްޖުމްހޫރިއްޔާގެ އޮފީހުގައި އޮތް ބައްދަލުކުރެއްވުމުގައި ވާހަކަފުޅު ދައްކަވަމުން "ވާނުވާ ބަންދު" ގައި ތިބި މީހުންނާއި ގުޅޭގޮތުން ވަކާލާތު ކުރާ މީހުން ބުނީ އެހެން ސަރުކާރުތަކުން މަސައްކަތްކޮށްފައިނުވާ ވަރަށް މި ސަރުކާރުން ވާނުވާ ބަންދަށް ހައްލު ހޯދައިދިނުމަށް މަސައްކަތް ކުރާކަން ފާހަގަކުރާ ކަމަށެވެ.

އަދި މި ސަރުކާރުން ކުރާ މަސައްކަތްތަކުން ރަނގަޅު ނަތީޖާއެއް ފެނުމުގެ އުންމީދު އެބައޮތް ކަމުގައި ބުނެފައިވެ އެވެ.

ސަރުކާރުން މި މައްސަލައަށް ހައްލު ހޯދުމަށް ކުރާ މަސައްކަތްތަކުގައި އެ މީހުންގެ ވިސްނުން ހުރި ގޮތްވެސް ހިއްސާ ކޮށްފައިވެ އެވެ. މިގޮތުން ހުށަހެޅުއްވި ކަންކަމުގެ ތެރޭގައި "ވާނުވާ ބަންދު" ގައި ތިބި މީހުންނަށް ވަކި ހަމައެއްގެ މަތިން މޮނިޓާ ކުރެވޭނެ އިންތިޒާމެއް، ނުވަތަ އިލެކްޓްރޯނިކް ވަސީލަތެއްގެ އެހީގައި ބެލެހެއްޓޭނެ ނިޒާމެއް ހަމަޖެއްސުމަށް ފަހު އެއް ފުރުސަތު ދިނުމަށް ފެންނަ ކަމަށް ބުންޏެވެ.

އަދި އެފަދަ މީހުންގެ މައްސަލަ އަވަހަށް ބެލޭނެ އިންތިޒާމެއް ހަމަޖެއްސުމަށް، ކޯޓުތަކަށް އިދާރީ ގޮތުންނާއި ޖާގައިގެ ގޮތުން ބޭނުންވާ ކަންކަން ފާހަގަ ކުރި އެވެ. އިންސާނީ ކަރާމާތް ގެއްލޭފަދަ ކަންކަމަށް "ވާނުވާ ބަންދު" ގައި ތިބި މީހުންނަށް ހުށަހެޅިފައިވާ ކަމަށާ އިސްލާމްދީނު ގައި މިކަންކަމަށް އޮންނަ ރިވެތި އުސޫލުތައް ވެސް އެ މީހުން ފާހަގަ ކުރި އެވެ.

މިގޮތުން އިހުސާންތެރިވުމަށާ އަދުލުވެރިކަން އިސްކުރުމަށާ އަނިޔާވެރިކަމާ ދެކޮޅަށް ދީނުގައި އައިސްފައިވާ ކަންކަން ވެސް މި ބައްދަލު ކުރުމުގައި އެ މީހުން ފާހަގަ ކުރި އެވެ.

މިއަދުގެ ބައްދަލު ކުރެއްވުމުގައި ވާހަކަފުޅު ދައްކަވަމުން ރައީސުލްޖުމްހޫރިއްޔާ ވިދާޅުވީ ފުރިހަމަ ކަފާލާތުގެ ނިޒާމެއް ގެނައުމަކީ ސަރުކާރުގެ މައި ސިޔާސަތެއް ކަމުގައެވެ. އަދި މިއަދު ޕްރޮސިކިއުޓާ ޖެނެރަލް އަދި އެޓާނީ ޖެނެރަލާ މަޝްވަރާ ކުރައްވައިގެން، މޮނިޓާ ކުރެވޭނެ ނިޒާމެއްގެ ތެރެއިން، އެއް ފުރުސަތު ދިނުމުގައި އެއްވެސް މައްސަލައެއް އުޅޭނެތޯ، ބައްލަވާނެ ކަމުގައި ރައީސުލްޖުމްހޫރިއްޔާ ވިދާޅުވި އެވެ.

އަދި ކޯޓު ކޮމްޕްލެކްސް އެޅުމަށް ތައްޔާ ރުވަމުންދާ ކަމަށާ ވަގުތީ ގޮތުންވެސް މައްސަލަތައް ބެލޭނެ އަވަސް އިންތިޒާމެއް ހަމަޖެއްސުމަށް މިހާރު ވެސް މަސައްކަތް ކުރައްވާ ކަން އެމަނިކުފާނު ފާހަގަ ކުރެއްވި އެވެ. މީގެ އިތުރުން ޖަލުތަކުގެ ހާލަތު ބައްލަވާނެ ކަމަށާއި އަދި ބައްދަލުވުމުގައި ފާހަގަކުރެއްވި އެހެނިހެން ކަންކަންވެސް، ހާއްސަ އިސްކަމެއް ދެއްވައިގެން ބައްލަވާނެ ކަމުގައި އެމަނިކުފާނު ވިދާޅުވި އެވެ.

މި ބައްދަލުކުރެއްވުމުގައި، "ވާނުވާ ބަންދު" ގައި ތިބި މީހުޖންނާއި ގުޅޭގޮތުން ވަކާލާތު ޓީމުން ވަނީ އެ މައްސަލަ އަށް މިހާރުން މިހާރަށް ގެނެވޭނެ ކަމަށް ބެލެވޭ ހައްލުތައް ހިމަނާފައިވާ ކަރުދާހެއް ވެސް ރައީސުލްޖުމްހޫރިއްޔާއަށް ހުށަހަޅާފަ އެވެ. މި ކަރުދާހުގައި "ވާނުވާ ބަންދު" ގެ ތަފާސް ހިސާބުތަކާއި، އެކި މައްސަލަތަކުގެ މައުލޫމާތު ހިމަނާފައިވެ އެވެ.