ޑޮލަރުގެ ދަތިކަން ދެތިން މަސްތެރޭ އެއްކޮށް ހައްލުވާނެ: ސަޢީދު

ދިވެހި ވަޔަފާރިވެރިންނާއި ބޭރު ޤައުމުތަކުގައި ކިޔަވަމުންދާ ދަރިވަރުންގެ އެންމެ ބޮޑު ކަންބޮޑުވުމަކަށް ވެފައިވާ ޑޮލަރުގެ މައްސަލައަށް ކުރިއަށް މިއޮތް ދެތިން މަސްދުވަހެއްގެ ތެރޭގައި ހައްލު ލިބިގެންދާނެ ކަމަށް އިކޮނޮމިކް މިނިސްޓަރ މުޙައްމަދު ސައީދު ވިދާޅުވެއްޖެއެވެ.

މިނިސްޓަރ ސައީދު މިފަދައިން ވިދާޅުވެފައިވަނީ ދުބާއީގައި މިއަދު ފެށުމަށް ހަމަޖެހިފައިވާ އިންވެސްޓް މޯލްޑިވްސް ފޯރަމްގެ ކުރިން ނޫސްވެރިންނަށް މަޢުލޫމާތު ދެއްވަމުންނެވެ.

މިބައްދަލުވުމުގައި މިނިސްޓަރ ސައީދު ވިދާޅުވީ ޑޮލަރުގެ މައްސަލަ އެންމެ ބޮޑަށް ދިމާވާން މެދުވެރިވި އެއް ސަބަބަބަކީ ސޮވެރިން ޑިވެލޮޕްމަންޓު ފަންޑަށް ޖަމާކުރަމުންދިޔަ ފައިސާ ނިމިދިޔަ ސަރުކާރުން ބޭނުންކުރުމުން ކަމަށެވެ.

"އެންމެ ބޮޑު އިޝޫއަކަށް މިއުޅެނީ ސޮވެރިން ޑިވެލޮޕްމަންޓު ފަންޑަށް ކުރިން ޖަމާކުރަން ފެށި ފައިސާތަކެއް ކުރިން ނިމިދިޔަ ސަރުކާރުން ހުސްކޮށްލުން. އޭގަހުރި ފައިސާވެސް ވަނީ ނަގާފަ. އެއީ އަޅުގަނޑުމެން ޑެޓް ރީޕޭމަންޓަށް ކަލެކްޓް ކުރަމުންދިޔަ ޑިޕޮސިޓުތަކެއް. އެ ހުސްކޮށްފަ ހުރީ." މިނިސްޓަރ ސަޢީދު ވިދާޅުވިއެވެ.

ސައީދު އިތުރަށް ވިދާޅުވީ ދުނިޔޭގެ މެދުއިތުމަތީގައި ހިނގަމުންދާ ހަމަނުޖެހުންތަކާއި، ހަނގުރާމަތަކާއި ގުޅިގެން ތެލުގެ އަގަށް އަންނަމުންދާ ބަދަލާއި އެކު ރާއްޖެގެ ޑޮލަރުގެ ބާޒާރަށް އަސަރުކޮށް ޑޮލަރުގެ ކަޅުބާޒާރެއް އުފެދިފައިވާ ކަމަށެވެ. އަދި މި ޑޮލަރުގެ ކަޅުބާޒާރަށް ބައެއް ވިޔަފާރިވެރިން ބަރޯސާ ވުމަކީ ޑޮލަރުގެ ކަންތައްތައް ހައްލުކުރުމަށް ދިމާވި ގޮންޖެހުމެއް ކަމަށްވެސް މިނިސްޓަރ ފާހަގަ ކުރެއްވިއެވެ.

" މިހާރު މި އުޅޭ އިޝޫއަކީ ބްލެކް މާކެޓެއް އޮވެފައި އެ މާކެޓަށް ވިޔަފާރިތަކެއް ބަރޯސާވެގެން އުޅޭ މައްސަލަ. އެ މައްސަލަ އަޅުގަނޑުމެން ހައްލުކޮށް ކުރިއަށް އޮތް ދެތިންމަސް ތެރޭގައި ހައްލަކަށް އެޅިގެންދާނެ. އެއީ އަޅުގަނޑުމެންގެ އަމާޒަކީ،" މިނިސްޓަރ ސަޢީދު ވިދާޅުވިއެވެ.

މީގެ އިތުރުން ސައީދު ވަނީ ރާއްޖޭގެ އިޤްތިޞާދު މިއަހަރު 5.5 އިންސައްތައަށް މިއަހަރު އަރާނެކަމަށް ލަފާކުރެވޭކަމަށާ، މީގެ ކުރިން ރާއްޖެއަށް ފަތުރުވެރިން ރާއްޖެ ޒިޔާރަތް ނުކުރާ އަދަދަށް ފަތުރުވެރިންވެސް ރާއްޖެއަށް ޒިޔާރަތް ކުރަމުންދާ ކަމަށެވެ. އަދި ވަށާޖެހޭ އިޤްތިޞާދީ ހުރިހާ ހަރަކާތްތަކެއްވެސް މި ސަރުކާރުން ކުރިއަށް ގެންދަވާނެ ކަން އޭނާ ފާހަގަކުރެއްވިއެވެ.