ޓޫރިޒަމް ދުވަހާ ގުޅިގެން ރާއްޖެއިން ފްރީޑައިވް ވޯލްޑް ރެކޯޑެއް ހަދަނީ!

ދުނިޔޭގެ ޓޫރިޒަމް ދުވަސް ފާހަގަކުރުމުގެ ގޮތުން ރާއްޖޭގައި ފްރީޑައިވް ވޯލްޑް ރެކޯޑެއް ހަދަން ނިންމާފައިވާކަމަށް ޓޫރިޒަމް މިނިސްޓަރު އަލީ ވަހީދު ވިދާޅުވެއްޖެއެވެ.

މީޑިއާއަށް މައުލޫމާތު ދިނުމަށް މިއަދު ހޮޓެލް ޖެންގައިބޭއްވި ބައްދަލުވުމުގައި ވާހަކަދައްކަވަމުން ޓޫރިޒަމް މިނިސްޓަރު އަލީ ވަހީދު ވިދާޅުވީ ދުނިޔޭގެ ޓޫރިޒަމް ދުވަސް ފާހަގަ ކުރުމުގެ ގޮތުން ދުނިޔޭގެ ވޯލްޑް ރެކޯޑެއް މުގުރާލުމުގެ ހަރަކާތްތައް ބާއްވަން ނިންމާފައިވާކަމަށެވެ.

މިމަހުގެ 27 ގައި ބާއްވާ މި އިވެންޓުގައި 500 މީހުން ބައިވެރިވާއިރު، މި ހަރަކާތުގައި ދުނިޔޭގެ ފްރީ ޑައިވިން ޗެމްޕިއަން ވިލިއަން ޓްރޫ ބްރިޖް ބައިވެރިވާނެ ކަމަށް އަލީ ވަހީދު ވިދާޅުވިއެވެ. މި ވޯލްޑް ރެކޯޑް މިހާރު އޮތީ 280 މީހުންނާއެކު އިޓަލީގެ ވެރޯނާގައެވެ. ވެރޯނާއިން ރެކޯޑް ހަދާފައިވަނީ 11 އޮކްޓޫބަރު 2009 ގައެވެ. ރާއްޖެއިން މި ރެކޯޑް މުގުރާލުމުގެ އިވެންޓު އޮންނާނީ ބަރޮސް ފަޅުތެރޭގައެވެ.

ޓޫރިޒަމް ދުވަސް ފާހަގަކުރުމުގެ ގޮތުން ރާއްޖޭގައި މިއަހަރު ގިނަ ހަރަކާތްތަކެއް ހިންގުމަށް ވަނީ ހަމަޖެހިފައެވެ. އެގޮތުން މިމަހުގެ 27 އަދި 28 ގައި މާލޭގައި ޓޫރިޒަމް ޖޮބް ފެއާ އެއް ބާއްވާއިރު، އަންނަ މަހުގެ އެއްވަނަ ދުވަހު އަނގޮޅިތީމް، ވިޒިޓާސް ސެންޓަރު ބިންގާ އެޅުމުގެ ރަސްމިއްޔާތު ވެސް އޮންނާނެއެވެ.

ދުވަހުގެ ރަސްމީ ހަރަކާތްތައް ފެށިގެން ދާނީ މިމަހުގެ 26 ގައި ވ. އަތޮޅުގައި ބޭއްވޭ ޖަޒީރާވަންތަ ކެނޯ ރޭހަކުންނެވެ. އަދި އަންނަ މަހުގެ ދެވަނަ ދުވަހު ޓޫރިޒަމް އޯޕަން ޑޭ ފާހަގަކުރުމާއި އެމަހުގެ ތިންވަނަ ދުވަހު ކިޑްސް ފުޓްބޯޅަ ފިއެސްޓާ، އަދި ހަތަރުވަނަ ދުވަހު ޓޫރިޒަމް ކޮންފަރެންސް ގާލާ ނައިޓްވެސް އޮންނާނެއެވެ. ދުނިޔޭގެ ޓޫރިޒަމް ދުވަސް ފާހަގަ ކުރުމުގެ ގޮތުން ޓޫރިޒަމް ކޮންފަރެންސެއް ވެސް އޮންނާނެ އެވެ. ކޮންފަރެންސް އޮންނާނީ ޕެރަޑައިސް ރިސޯޓުގަ އެވެ. އަދި ޓޫރިޒަމްގެ ދުވަހާ ގުޅިގެން މާލޭގައި ހަވާ އެރުވުމުގެ ހަރަކާތެއްވެސް ކުރިއަށް ގެންދަން ވަނީ ނިންމާފައެވެ.

މިނިސްޓަރު އަލީ ވަހީދު ވިދާޅުވި ގޮތުގައި ޓޫރިޒަމް ދުވަސް ފާހަގަކުރުމަށް ހިންގާ ހުރިހާ އިވެންޓެއް ވެސް ކުރިއަށް ގެންދާނީ ޓޫރިޒަމް ސިނާއަތުގައި މަސައްކަތް ކުރާ ބައިވެރިންގެ އެހީތެރިކަމާ އެކުގައި ކަމަށާއި ހަރަދުތައް ކުރާނީ ވެސް އިންޑަސްޓްރީއާ ގުޅިގެންނެވެ.

ސްކޫލު ދަރިވަރުންނަށް ޓޫރިޒަމް މިނިސްޓްރީއަށް ޒިޔާރަތް ކުރެވޭނެ އޯޕަން ޑޭ އަކާއި މާލޭގެ ހުރިހާ ސްކޫލަކަށް ހިންގާ ކިޑްސް ފުޓްބޯޅަ ފިއެސްޓާއެއް ބާއްވާނެ އެވެ. އެ މުބާރާތުގައި ބައިވެރިވާ ކުދިންގެ ތެރެއިން ހޮވާލެވޭ ކުދިންނަށް ގައުމީ ސްކޮޑުން ޖާގަ ދެވޭނެ އެވެ.

އޭގެ އިތުރުން އެ މުބާރާތުގެ އެންމެ މޮޅު ކުޅުންތެރިޔާއަށް ދުބާއީގެ ސްޕެނިޝް ސޮކާ ސްކޫލުގައި ތަމްރީނު ހޯދުމުގެ ފުރުސަތު ލިބޭނެ އެވެ. އެކަންކަމުގައި ސްޕެއިންގެ ކުރީގެ ކުޅުންތެރިޔާ އަދި ރިއާލް މެޑްރިޑުގެ ކުރީގެ ކެޕްޓަން މިޝެލް ސަލްގާޑޯ ބައިވެރިވާނެ ކަމަށް ޓޫރިޒަމް މިނިސްޓްރީން ބުނެ އެވެ.