އެސްޓީއޯއަށް ލިބެންޖެހޭ ފައިސާ 6 ބިލިއަން ރުފިޔާއަށްވުރެ އިތުރުވެއްޖެ!

ސަރުކާރާއި ރައްޔިތުން ހިއްސާވާ ކުންފުނި އެސްޓީއޯއަށް ލިބެންޖެހޭ ފައިސާ 6 ބިލިއަން ރުފިޔާއަށްވުރެ އިތުރުވެއްޖެއެވެ.

އެސްޓީއޯއިން ނެރެ އާއްމުކޮށްފައިވާ މިއަހަރުގެ ފުރަތަމަ ކުއާޓަރުގެ މާލީބަޔާނަށް ބަލާއިރު، މާޗްމަހުގެ ނިޔަލަށް އެކުންފުނީގެ ވިޔަފާރިން ލިބެންޖެހޭ ފައިސާގެ އަދަދު ވަނީ 6.22 ބިލިއަން ރުފިޔާއަށް އަރާފައެވެ. މިއީ މިދިޔަ އަހަރުގެ ފުރަތަމަ ކުއާޓަރާ އަޅާބަލާއިރު، 435.01 މިލިއަން ރުފިޔާގެ އިތުރުވުމެކެވެ. މިދިޔަ އަހަރުގެ ފުރަތަމަ ކުއާތަރު ނިމުނުއިރު އެސްޓީއޯއަށް ލިބެންޖެހޭ ފައިސާގެ އަދަދު ހުރީ، 5.7 ބިލިއަން ރުފިޔާގައެވެ. ސަރުކާރުގެ ކުންފުނިތަކުގެ ތެރެއިން އެސްޓީއޯ ފާހަގަކުރެވެނީ އެންމެ ރިސީވްއަބަލްސް ބޮޑު ކުންފުނީގެ ގޮތުގައެވެ.

ފުރަތަމަ ކުއާޓަރުގެ ހިސާބުތަކަށް ބަލާއިރު، އެސްޓީއޯއިން އެހެން ފަރާތްތަކަށް ދައްކަންޖެހޭ ފައިސާގެ އަދަދު ވަނީ މިދިޔަ އަހަރުގެ ފަހު ކުއާޓަރާ އަދި މިދިޔަ އަހަރުގެ ފުރަތަމަ ކުއާޓަރާ އަޅާބަލާއިރު ދަށްވެފައެވެ. މިއަހަރުގެ ފުރަތަމަ ކުއާޓަރު ނިމުނުއިރު، އެސްޓީއޯއިން އެހެން ފަރާތްތަކަށް ދައްކަންޖެހޭ ރުފިޔާގެ އަދަދު ހުރީ 3.5 ބިލިއަން ރުފިޔާގައެވެ. މިދިޔަ އަހަރުގެ ފުރަތަމަ ކުއާޓަރު ނިމުނުއިރު މި އަދަދު 3.9 ބިލިއަން ރުފިޔާގައި ހުރިއިރު، ފަހު ކުއާޓަރުގައި މިއަދަދު ހުރީ 4.02 ބިލިއަން ރުފިޔާގައެވެ.

އެސްޓީއޯއިން ވަނީ މިއަހަރުެގ ފުރަތަމަ ކުއާޓަރުގައި 4.02 ބިލިއަން ރުފިޔާގެ ފައިދާއެއް ހޯދައި 169 މިލިއަން ރުފިޔާގެ ސާފްފައިދާއެއް ހޯދާފައެވެ.

މިއަހަރުގެ ފުރަތަމަ ކުއާޓަރު ނިމުނުއިރު، އެސްޓީއޯއަށް ލިބެންޖެހޭ ފައިސާގެ އަދަދު 6 ބިލިއަން ރުފިޔާ ފަހަނަ އަޅައި ގޮސްފައިވާއިރު، އެސްޓީއޯއަށް އެންމެ ގިނައިން ފައިސާ ދޭންޖެހެނީ ސަރުކާރުގެ ކުންފުނިތަކުންކަން ފާހަގަކޮށްލެވެެއެވެ. މިގޮތުން އެސްޓީއޯއަށް އެންމެ ބޮޑު އަދަދަކުން ފައިސާ ދޭންޖެހޭ އެއް ކުންފުންޏަކީ ފެނަކަ ކޯޕަރޭޝަންކަން ފާހަގަކޮށްލެވެއެވެ. އެސްޓީއޯގެ މިދިޔަ އަހަރުތަކުގެ މާލީ ބަޔާނުން ދައްކާގޮތުގައި އެސްޓީއޯގައިވާ ފެނަކައިގެ ދަރަނި 2 ބިލިއަން ރުފިޔާއަށްވުރެ އިތުރުކަމަށް ދައްކައެވެ.