ރައްޔިތުންގެ މަޖިލީހުގެ މެޖޯރިޓީ ބޭނުން ވަނީ ސަރުކާރަށް ދަތިކޮށް އުނދަގޫ ކުރާކަށް ނޫން: ރައީސް ޞާލިހު

އިދިކޮޅު މައި ޕާޓީ، މޯލްޑިވިއަން ޑިމޮކްރެޓިކް ޕާޓީން ރައްޔިތުންގެ މަޖިލީހުގެ މެޖޯރިޓީ ބޭނުން އުޅެނީ އަދުގެ ސަރުކާރަށް ދަތި އުނދަގޫ ކުރާން ނޫން ކަމަށް އެމްޑީޕީގެ ކުރީގެ އެޑްވައިޒަރ އަދި ކުރީގެ ރައީސް އިބްރާހިމް މުހައްމަދު ޞާލިހު ވިދާޅުވެއްޖެއެވެ.

20 ވަނަ ރައްޔިތުންގެ މަޖިލީހުގައި އެމްޑީޕީގެ ޓިކެޓްގައި މާފަންނު-ހުޅަނގު ދާއިރާއަށް ވާދަކުރައްވާ އަހުމަދު ފަލާހުގެ ކެންޕެއިން ރަސްމީކޮށް އިފްތިތާޙް ކުރުމަށް ރޭ ބޭއްވި ޖަލްސާގައި ވާހަކަ ދައްކަވަމުން ރައީސް ޞާލިހު ވިދާޅުވީ، ސަރުކާރުން ބޭނުންވާހާ ގޮތަކަށް ކަންކަން ނުވެގެން އުޅެނީ ރައްޔިތުންގެ މަޖިލީހުގެ މެޖޯރިޓީ ސަރުކާރުގެ އަތުގައި ނެތުމުން ކަމަށެވެ.

ކުރިއަށް އޮތް ރައްޔިތުންގެ މަޖިލީހުގެ އިންތިޚާބުގެ ނަތީޖާވެސް މިހާރުގެ ސަރުކާރާއި އެއްކޮޅަށް ނިމިއްޖެ ނަމަ، ހައްގުވެރިވެރިންގެ އަތުން ގޯތިތައް އަތުލާނެ. އަދި ބޭނުންވާ ފަރާތަކަށް ބަހާލާނެ ކަމުގެ އަލިގަދަ ސާފު ނިޝާންތައް މިހާރުވެސް ފެންނަމުންދަނީ.

ކުރީގެ ރައީސް އިބްރާހިމް މުހައްމަދު ޞާލިހު

ރައީސް ޞާލިހް އިތުރަށް ވިދާޅުވި ގޮތުގައި، މިސަރުކާރުގެ މިސްރާބު ވަނީ ހަމައިން ނެއްޓި މަގު އޮޅިފައި ކަމަށެވެ. އަދި ސަރުކާރުން އަންނަނީ ސަރުކާރާއި މިނިވަން މުވައްސަސާތަކަށް ނުފޫޒު ފޯރުވަމުން ކަމަށްވެސް އެމަނިކުފާނު ވިދާޅުވި އެވެ.

"އަޅުގަނޑުމެން އެހެންވެ ރައްޔިތުންގެ މަޖިލިސް މިފަހަރު މުހިންމުވާ ސަބަބަކީ. ރާއްޖޭގެ އެކި ކަންކޮޅުތަކުން އަޅުގަނޑުމެންނަށް މިފެންނަ މަންޒަރަކީ ކުރިން އެ ހެދުނު ގޯސް ރަނގަޅު ކުރަން ރައްޔިތުން ބޭނުންވެފައި ތިބިތަން. އިރާދަކުރެއްވިޔާ، މަޖިލީހުގެ މެޖޯރިޓީ އާއެކު ނުކުމެ، ސަރުކާރުވެސް ހަމަ މަގަށް އަޅުވާނަން."

އަޅުގަނޑުމެން ރައްޔިތުންގެ މަޖިލީހުގެ މެޖޯރިޓީ އެއް ބޭނުން މިވަނީއެއް ކޮންމެހެން ސަރުކާރަށް ދަތިކޮށް އުނދަގޫ ކުރާކަށް ނޫން. ޖެއްސުން ކުރާކަށް ނޫން. މި ސަރުކާރުން ރައްޔިތުންނަށް ހެޔޮ ކަމެއް ކޮށްދެއްވައި، ރަނގަޅު ކަމެއް ކޮށްދެއްވަން އުޅޭނަމަ އެކަމަށް ތާއީދު ކުރާނެ އެއް ބޭފުޅަކީ ފަލާހު.

ކުރީގެ ރައީސް އިބްރާހިމް މުހައްމަދު ޞާލިހު

ރައީސް ޞާލިހު ވިދާޅުވި ގޮތުގައި އެމްޑީޕީގެ ބޭނުމަކީ ރައްޔިތުންގެ އަޑު އަހައިގެން ރައްޔިތުންނާއި ވޭހާވެސް ގާތުން މަސައްކަތް ކުރުން ކަމަށެވެ. އަދި ވެރިކަމުގައި އޮންނަ އިރުވެސް އަދި ނޯންނައިރުވެސް އެމްޑީޕީއަށް މަޖިލީހުގެ މެޖޯރިޓީ ބޭނުންވަނީ އެ ސަބަބަށްޓަކައި ކަމަށް ޞާލިހު ވިދާޅުވި އެވެ.