ހުރަވީ ސުކޫލްގެ ދަރިވަރު ނިޔާވުމާއި ގުޅިގެން ރައީސް މުޢިއްޒުގެ ތަޢުޒިޔާ އާއިލާއަށް

މިއަދު ކުއްލި ގޮތަކަށް ނިޔާވި ހުރަވީ ސްކޫލްގެ ދަރިވަރުގެ ޢާއިލާއަށް ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ތައުޒިޔާ ފޮނުއްވައިފިއެވެ.

ހުޅުމާލޭގެ ހުރަވީ ސްކޫލުގެ ދަރިވަރަކަށް "ސިއްހީ ހާލަތެއް މެދުވެރިވެގެން" ހުޅުމާލެ ހޮސްޕިޓަލަށް ގެންގޮސްފައިވާއިރު، ހޮސްޕިޓަލަށް ގެންދިޔައިރުވެސް ކުއްޖާ ނިޔާވެފައިވާކަމަށް ހޮސްޕިޓަލާ ހަވާލާދީ ފުލުހުން ވަނީ މައުލޫމާތު ދީފައެވެ.

މި ހާދިސާގައި ނިޔާވެފައިވަނީ، ހުރަވީ ސްކޫލްގެ، ޢުމުރުން 13 އަހަރުގެ އަންހެން ދަރިވަރު ފާޠިމަތު ޝިމާ މުޙައްމަދެވެ.

ދަރިވަރު ފާޠިމަތު ޝިމާ މުޙައްމަދު، ނިޔާވުމާއި ގުޅިގެން ރައީސް މުޢިއްޒު އެކްސްގައި ކުރެއްވި ޕޯސްޓެއްގައި ވިދާޅުވީ، ޝިމާ، ކުއްލި ގޮތަކަށް ނިޔާވި ޚަބަރު އަޑު އެހީ، ނުހަނު ފުން އަސަރާއި ކަންބޮޑުވުމާއިއެކު ކަމަށެވެ.

‏ލޮބުވެތި ދަރިވަރުގެ ބެލެނިވެރީންނަށާއި ޢާއިލާއަށް، އަދި ރަޙްމަތްތެރީންނަށާއި އެކުގައި ކިޔަވާ ކުދީންނަށް، އަދި ހުރަވީ ސްކޫލުގެ ހުރިހާ ދަރިވަރުންނަށާއި މުވައްޒަފުންނަށް ކުރިމަތިވި މި އުނދަގޫ ވަގުތުގައި ކެތްތެރިކަން މިންވަރުކޮށް ދެއްވުން އެދެމެވެ.

ރައީސް މުޢިއްޒު

‏މިއާއެކު ރައީސް ވަނީ، މާތްاللهގެ ތަނަވަސް ރަޙްމަތާއި ނިޢުމަތުގައި، އެ ޝިމާ ލެހެއްޓެވުން އެދި ދުޢާ ކުރައްވާފައެވެ.