ކޮންމެ ގައިދީ އަކަށް، މަހެއްގެ މައްޗަށް 27،000 އެއްހާ ރުފިޔާ ހޭދަވޭ: އިޙްސާން

ޖަލު ބަންދުގައި ބަހައްޓާފައި ހުންނަ ކޮންމެ ގައިދީ އަކަށް، މަހެއްގެ މައްޗަށް 27،000 އެއްހާ ރުފިޔާ ހޭދަވާ ކަމަށް ދާޚިލީ ސަލާމަތާ ބެހޭ ވަޒީރު ޢަލީ އިހްސާން ވިދާޅުވެއްޖެއެވެ.

ސަރުކާރަށް އަހަރު ފުރުމާއި ގުޅިގެން ސަންގު ޓީވީން ގެނެސްދިން ޕްރޮގްރާމްގައި ވާހަކަ ދައްކަވަމުން އިހްސާން ވިދާޅުވީ ރާއްޖޭގައި، ޖަލުތައް ހެދިގެން އައީ ޖަލުހަދާ އުސޫލުން ނޫން ކަމަށެވެ. އެގޮތުން އެކި ކަންކަމަށް ބެހެއްޓިފައި ހުރި ގުދަން ތަކުގައި ކުށްވެރިން ބައިތިއްބަން ފަށައި، އެތަންތަން އިތުރަށް ތަރައްގީ ވަމުން އައިސްފައިވާ ކަމަށް ވިދާޅުވިއެވެ. އަދި އެކަމަށް ޖުމްލަ ހައްލެއް ގެނައުމުގެ މަސައްކަތް އެއްވެސް އިރެއްގައި ކޮށްފައި ނުވާ ކަމަށެވެ.

ރައީސް މުޢިއްޒު ވެރިކަމާއި ހަވާލުވެވަޑައިގެން ވަރަށް ކުރީ ކޮޅުގައި ނެންގެވި އެއް ޑިޒިޝަނަކީ ރާއްޖޭގައި ސެންޓަރަލް އެއްޖަލު އެޅުމަށް.

ވަޒީރު ވިދާޅުވިގޮތުގައި ސެންޓްރަލް ޖަލެއް އެޅުމުގެ އެންމެ މުހިންމު ބޭނުމަކީ، ގައިދީން އެކި ރަށް ރަށުގައި ބައިތިއްބަން ޖެހުމުން ގައިދީއެއްގެ ބޮލަށް ކުރަންޖެހޭ ޚަރަދު ބޮޑުވުން ކަމަށެވެ.

ދިވެހި ދައުލަތުން މިހާރުވެސް އެބަ ޚަރަދުކުރޭ 27،000 އަކަށް ރުފިޔާ ކޮންމެ ބޮލަކަށް މަހަކު. މިއީ ވަރަށް ބޮޑު އަދަދެއް. އެވްރެޖް ރައްޔިތަކު 24 ގަޑިއިރު މަސައްކަތް ކޮށްގެން އެއްމަސް ދުވަހުގެ މަސައްކަތަށް މި ލިބެނީ މަހަކު 15،000 ރުފިޔާ. އެހެންވީމާ އަޅުގަނޑުމެން 27،000 ޚަރަދުލުރަންޖެހޭ ސަބަބެއް ނެތް. އަޅުގަނޑުމެން މިއަށް މޮޑެލް އަކަށް ބަލާލިއިރުގައި، ސިންގަލް ޕްރިޒަން ކޮމްޕެލެކްސް އެއް އަޅައިގެން މި ޚަރަދު ވަރަށް ބޮޑުތަނުން ކުޑަ ކުރެވޭ

ވަޒީރު ޢަލީ އިހްސާން

މީގެ އިތުރުން، ގައިދީން ސެކިޔުރިޓީއަށް ބަލައިގެން، ނުވަތަ ކުށް ތަކަށް ބަލައިގެން ނޫނީ، އަންހެން، ފިރިހެން، ކުޑަކުދިން އަދި ބިދޭސީން ގޮތަށް ބަލައިގެން ބަހާލަން ބެލި ނަމަވެސް ސިންގަލް ޕްރިޒަން ކޮމްޕްލެކްސް އަކީ މުހިންމު ކަމެއް ކަމަށް އިހްސާން ވިދާޅުވިއެވެ.

ހަމައެއާއެކު، ނަފްސާނީ މައްސަލަ ހުންނަ ގައިދީންނަށްވެސް ފަރުވާ ދެވޭނެ ނިޒާމެއް ހޯދަންޖެހޭ ކަމަށާ، ރާއްޖެއިން ބައިވެރިވެފައިވާ ބައިނަލްއަގުވާމީ މުއާހަދާ ތަކުގައި އެކަށައަޅާފައިވާ މިންގަނޑުތައްވެސް ޖަލުގައި ބެހެއްޓުން މުހިންމު ކަމަށްވާއިރު، އައު ޖަލު އެޅެނީ އެ ހުރިހާ ކަންކަމަށް ބަލައިގެން ކަމަށްވެސް އިހްސާން ވިދާޅުވިއެވެ.