ރާއްޖޭގައި ތިބި އިމާމުންނަށް އިތުރު ތަމްރީނު ދިނުމަށްޓަކައި ޕްރޮގްރާމެއް ފަށަނީ

ރާއްޖޭގައި ތިބި އިމާމުންނަށް އިތުރު ތަމްރީނު ދިނުމަށްޓަކައި ޕްރޮގްރާމެއް ފަށަން އިސްލާމިކް މިނިސްޓްރީން ނިންމައިފިއެވެ.

އިސްލާމިކް މިނިސްޓްރީން ބުނީ މިއީ އިމާމުކަމުގެ ދާއިރާއިން އިތުރު ތަމްރީނު ދިނުމަށްޓަކައި ތަފާތު 11 ސަރަހައްދަކަށް ބަހާލައިގެން މުޅި ރާއްޖޭގެ ދާއިމީ އިމާމުންނަށް އަމާޒުކޮށްގެން ކުރިއަށް ގެންދާ 4 ދުވަހުގެ އިންޓެންސިވް ޓްރެއިނިން ޕްރޮގްރާމެއް ކަމަށެވެ.

ޖުމްލަ 9 މޮޑިއުލެއް ބައިވެރީންނަށް އުނގަންނައިދެވޭ މި ތަމްރީނު ޕްރޮގްރާމުގެ ކަރިކިއުލަމް ތައްޔާރުކުރައްވާފައިވަނީ އިސްލާމީކަންތައްތަކާ ބެހޭ ވަޒީރު ޑރ. މުޙައްމަދު ޝަހީމް ޢަލީ ސަޢީދުގެ ސީދާ އިރުޝާދުގެ ދަށުން ކަމަށް ވެސް އިސްލާމިކް މިނިސްޓްރީން ބުނެއެވެ.

އެ މިނިސްޓްރީން ބުނީ މި ޕްރޮގްރާމް ގެ މަޤްސަދަކީ އިމާމުކަމުގެ ދާއިރާއިން އިމާމުންނަށް އިންޓެންސިވް ތަމްރީނެއް ދިނުމާއި، މި ޒަމާނުގައި އިމާމުންނަށް ބޭނުންވާ މައުލޫމާތު ފޯރުކޮށްދީ، ގުރްއާނާއި، ތަޖުވީދުގެ ޢިލްމާއި، ތަފްސީރާއި ފިޤުހާއި ޙަދީޘާއި އަޤީދާގެ ޢިލްމުގެ ދާއިރާއިން އިމާމަކަށް ބޭނުންވާ މުހިއްމު ޢިލްމީ ކަންކަން އުނގަންނައި ދިނުމާއި، މިސްކިތްތައް ބެލެހެއްޓުމުގެ ގޮތުން އަދާކުރަންޖެހޭ މަސްއޫލިއްޔަތު އަދާކުރެވޭނެ ވަރަށް އިމާމުންގެ ޝަޚްޞިއްޔަތު ބިނާކުރުން ކަމަށެވެ.

ކޯހުގައި ކިޔަވައިދޭ މާއްދާތައް:

1. އަޤީދާއާއި އިސްލާމީ އަޚްލާޤު

2. ތަޖުވީދު: ތިއޮރީ އަދި ޕްރެކްޓިސް

3. މުޖުތަމަޢު ބިނާކުރުމުގައި މިސްކިތުގެ ދައުރު

4. އަޅުކަމުގެ ފިޤުހު: ޙުކުމްތަކާއި އަސާސުތައް

5. ކީރިތި ޤުރުއާނުގެ ތަފްސީރާއި ޤުރްއާނަށް ތަދައްބުރުކުރުން

6. ޤުރްއާނިކް ޢެރެބިކް

7. ޙަދީޘާއި އިސްލާމީ ޘަޤާފަތް

8. ޢުލޫމުލް ޤުރްއާނަށް މަގެއް

9. ދަޢުވާގެ އުޞޫލުތަކާއި ޚިޠާބާ

އިމާމުންނަށް ހާއްސަކޮށްގެން ކުރިއަށް ގެންދާ މި ޕްރޮގަރާމް ފެށުމަށް ހަމަޖެހިފައިވަނީ ކުރިއަށް އޮތް ފެބްރުއަރީ މަހުގެ 10 ވަނަ ދުވަހު ގއ. ގެމަނަފުށީގައި ކަމަށް އެ މިނިސްޓްރީން މައުލޫމާތު ދެއެވެ.