ހާޖީންނަށް 19 ދުވަސް، 15 ދުވަހަށް ކުރުކޮށްލި ވާހަކައަކީ ދޮގެއް: ޝަހީމް

ހައްޖުގައި ތިބޭ މުއްދަތު ސަރުކާރުން 15 ދުވަހަށް ކުރުކޮށްލި ކަމަށް ބުނެ ދައްކަމުންދާ ވާހަކަ އަކީ ހަގީގަތާ ހިލާފު ވާހަކައެއް ކަމަށާ ހުރިހާ ހައްޖާޖީން ވެސް އެއަށް ވުރެ ދިގު މުއްދަތަށް މައްކާ-މަދީނާގައި ތިބޭނެ ކަމަށް އިސްލާމިކް މިނިސްޓަރު ޑރ. މުހައްމަދު ޝަހީމް އަލީ ސަައީދު މިރޭ ވިދާޅުވެއްޖެ އެވެ.

ހައްޖުގެ އަޅުކަމަށް ދިޔަ ދިވެހީންނަށް މި ފަހަރު މައްކާ-މަދީނާގައި ތިބެވޭ މުއްދަތު ކުރުކަމުގެ ޝަކުވާ ބޮޑެވެ. އެ ޝަކުވާ ބޮޑުވެފައި ވަނިކޮށް މިނިސްޓަރު ޝަހީމް މިހެން ވިދާޅުވީ މިރޭ މީޑިއާތަކަށް ފޮނުވި މެސެޖެއްގަ އެވެ.

ޝަހީމް ވިދާޅުވި ގޮތުގައި ހުރިހާ ހައްޖާޖީން ވެސް 15 ދުވަހަށް ވުރެ ދިގު މުއްދަތަށް މައްކާ-މަދީނާގައި ތިބޭނެ  އެވެ. އެގޮތުން އެއް ފްލައިޓްގައި މައްކާއަށް އައި މީހުން 18 ދުވަހު ތިބޭނެ އެވެ. އަދި އަނެއް ތިން ފްލައިޓްގައި އައި މީހުން 19 ދުވަހު ތިބޭނެ އެވެ.

ހައްޖަށްދާ މީހުން މީގެ އަހަރުތަކެއް ކުރިން 30 ދުވަހު ތިބޭ ނަމަވެސް މި ފަހު އަހަރުތަކުގައި އާންމުކޮށް 22 އާއި 25 ދުވަހު ދެމެދު ތިބިކަން ފާހަގަ ކުރެއްވި އެވެ.

އެއީ ހައްޖު ނިންމާފައި މަދީނާއަށް އައިސް މައްކާއަށް އެނބުރިދާތީ ކަމަށް ވިދާޅުވި އެވެ. ނަމަވެސް މިފަހަރު ހައްޖު ނިންމާފައި މަދީނާއަށް އައިސް މައްކާއަށް އެނބުރި ނުގޮސް ރާއްޖެއަށް ފުރާގޮތަށް ހަމަޖައްސާފައިވަނީ ހައްޖުވެރިންގެ ރައްކާތެރިކަމާއި މަސްލަހަތާއި މޫސުމަށް ބަލައި ސިއްހަތަށް ބެލުމުގެ ގޮތުން ސައޫދީ އަރަބިއްޔާއިން ދެއްވަމުން ގެންދަވާ އިރުޝާދުތަކަށް ރިއާޔަތް ކުރުމުގެ ގޮތުން ކަމަށް ޝަހީމް ވިދާޅުވި އެވެ.

“ވީމާ ގައުމީ މިފަދަ ކަންކަމުގައި ހަގީގަތް އޮޅޭ ގޮތައް ވާހަކަ ނުދެއްކެވުން އިލްތިމާސް ކުރަން. ރައްޔިތުންގެ ކަންބޮޑުވުން އޮތް ކަމެއް ނަމަ އެކަމާމެދު މަޝްވަރާކޮށްގެން ހައްލެއް ހޯދާނެކަމުގެ ޔަގީންކަން ދެން،” ޝަހީމް ވިދާޅުވި އެވެ.