ކުރީގެ މެނޭޖުމަންޓުން، އިންޓަވިއު ކުރުމެއްނެތި ބޮޑު މުސާރަ ދޭގޮތަށް 49 މީހުންނަށް ވަނީ ވަޒީފާދީފައި: ޕޯސްޓް

މޯލްޑިވްސް ޕޯސްޓް ލިމިޓެޑްގެ ކުރީގެ މެނޭޖްމަންޓުން އިޢުލާނާއި އިންޓަވިއުއެއްވެސް ކުރުމެއް ނެތި ބޮޑު މުސާރަ ދޭ ގޮތަށް 49 މީހަކަށް ވަޒީފާ ދީފައިވާކަން ހާމަ ވެއްޖެއެވެ.

މިކަންކަމުގއ ތަފްސީލް ހާމަކޮށް މޯލްޑިވްސް ޕޯސްޓް ލިމިޓެޑުން ރޭ ނެރުނު ނޫސް ބަޔާނުގައި ބުނީ، އެ ކުންފުނީގެ ކުރީގެ މެނޭޖުމަންޓުން، އެކުންފުނީގެ ވަޒީފާއަށް އިޢުލާން ނުކޮށް، އިންޓަވިއުކުރުމެއްވެސް ނެތި، މެނޭޖިން ޑިރެކްޓަރަށް ލިބިގެންވާ ބާރުގެ ދަށުންކަމަށް ބުނެ މެރިޓް އުޞޫލުގެ ބޭރުން 49 މީހަކަށް ވަޒީފާ ދީފައިވާކަމަށެވެ. އަދި ވަޒީފާ ދިން މީހުންގެ ތެރެއިން ބައެއް މީހުންނަށް ވަރަށް ސީނިއަރ މަގާމުތައްދީފައިވާއިރު، އެއީ ކުންފުނީގެ ގިނަ ދުވަސްވީ ވެރިންނަށާއި މުވައްޒަފުންނަށް ވުރެ ބޮޑު މުސާރަ ލިބޭ މަގާމްތައްކަން ފާހަގަކޮށްފައިވެއެވެ.

ޕޯސްޓުން ބުނީ، މި ގޮތަށް ވަޒީފާ ދިނުމަކީ މެނޭޖިން ޑިރެކްޓަރަށް ލިބިގެންވާ ބާރެއް ނޫން ކަމަށާއި، މިކަން ކުރުމަށް ހިއުމަން ރިސޯސަސް ޕޮލިސީއަށް ގެނައި ބަދަލުތައް އަލުން އަނބުރާ އިސްލާޙުކުރުމަށް ޕްރައިވެޓައިޒޭޝަން އެންޑް ކޯޕަރަޓައިޒޭޝަން ބޯޑުން ކުރީގެ މެނޭޖުމަންޓަށް އެންގި ކަމަށާ، ނަމަވެސް، އެޗްއާރު ޕޮލިސީ މިދިޔަ މެނޭޖެމެންޓުން އިސްލާޙުކޮށްފައިނުވާކަމަށެވެ. އަދި ޕޮލިސީ އިސްލާޙުކުރީ މިހާރުގެ މެނޭޖްމެންޓުންކަންވެސް ބަޔާނުގައި ފާހަގަކޮށްފައިވެއެވެ.

މީގެ އިތުރުން، ވެލާނާ އިންޓަނޭޝަނަލް އެއަރޕޯޓުގައި ޤާއިމްކޮށްފައިވާ ޕޯސްޓް އޮފީހުގެ ފިހާރައަށް މުދާ ސަޕްލައިކުރުމުގެ އެއްބަސްވުމެއް ޖަމްޢިއްޔަތު ތަޙްފީޒްލް ޤުރުއާނުލް ކަރީމް ކިޔާ ޤުރުއާން ހިތުދަސްކޮށްދޭ ކުލާހަކާއެކު މިދިޔަ މެނޭޖްމެންޓުން ހަދާފައިވާކަމަށާ، ޖަމްޢިއްޔަތު ތަޙްފީޒްލް ޤުރުއާނުލް ކަރީމްއަކީ މުދާ ސަޕްލައިކޮށްދޭ ފަރާތަކަށް ނުވުމުން މިހާރުގެ މެނޭޖްމެންޓުން އެ އެއްބަސްވުން އުވާލާފައިވާކަމަށްވެސް ބަޔާނުގައި ވިދާޅުވިއެވެ.

އަދި ސަރުކާރުގެ އިދާރާތަކުގެ ސިޔާސީ އިސްވެރިން ގަޑިޖެހޭ ގަޑިއަކީ 8:31 ކަމަށާއި ގަޑި ޖެހިއްޖެނަމަ ގަޑިލާރި ނުނެގޭނެކަމަށް ބަޔާންކޮށްފައިވާ ރައީސުލްޖުމްހޫރިއްޔާގެ އޮފީހުގެ ދެންނެވުމާ ޚިލާފަށް މިދިޔަ މެނޭޖްމެންޓުގައި ސިޔާސީ މުވައްޒަފުންނަށް ގަޑި ނުޖެހުމުން ދޭ ފައިސާގެ ނަމުގައި "ގަޑި ލާރި" ދިންކަމަށް ބަޔާނުގައިވެއެވެ.

އެ ގޮތުން ކިތަންމެ ލަހުން ޑިއުޓީއަށް އަޔަސް އެޗްއާރު ސިސްޓަމްގެ ތެރެއިން ގަޑި ބަދަލުކޮށް "ގަޑި ލާރި"ދީފައިވާއިރު، އަދުގެ މެނޭޖުމަންޓުން އެކަން ބަދަލުކޮށް ޢަމަލުކުރަމުންދަނީ ރައީސް އޮފީހުގެ އެންގެވުމާ އެއްގޮތަށްކަމަށް ބަޔާނުގައިވެއެވެ.

ހަމަ އެހެންމެ، ނިމިދިޔަ މެނޭޖްމެންޓުން ސިންގަލް ސޯސްކޮށްގެން ބޮޑު އަގުގައި ކުންފުނީގެ އެއަރކޯން ސިސްޓަމް މަރާމާރުކޮށް ބެލެހެއްޓުމަށް ބޭރުގެ ކުންފުންޏަކާއެކު އެއްބަސްވުމެއް އެކުލަވާލާފައިވާކަމަށާ، އެ އެއްބަސްވުން މިއަދުގެ މެނޭޖްމެންތުން އުވާލާފައިވާކަމަށްވެސް ބަޔާނުގައިވެއެވެ. އަދި މިހާރު ވާދަވެރި ބިޑިންގެ އުޞޫލުން އެއަރކޯންގެ މަސައްކަތައް ޕްރޮކިޔުމަންޓުކުރަމުންދާކަމަށެވެ.

މީގެ އިތުރުން، ޤާބިލު ނޫން މީހުން އެކުންފުނި ހިންގާކަމަށް ބުނެކުރާ ތުހުމަތު ތަކާއި، މެނޭޖިން ޑިރެކްޓަރގެ ގާތް މުވައްޒަފުންނަށް އިންޓާނަލް ރެކްރޫމަންޓުގެ ނަމުގައި ޕްރޮމޯޝަން ދޭކަމަށް ބުނެ ދައްކާ ވާހަކަތައް އެ ބަޔާނުގައި ދޮގުކޮށްފައިވެއެވެ. އަދި މިހާރުގެ މެނޭޖިން ޑިރެކްޓަރު ކަނޑައަޅާފައިވާ އަދަދަށްވުރެ ބޮޑު މުސާރައެއް ނަގާކަމަށް ކުރާ ތުހުމަތާއި، ކުންފުނީގައި ކޮރަޕްޝަނަށް މަގުފަހިވާ ޢަމަލުތަކެއް ހިންގާކަމަށް ބުނެ އެ ފަދަ ޢަމަލުތަކެއް ވިސުލްބްލޯކުރި މީހަކު ކުންފުނިން ވަކިކުރިކަމަށް ބުނާ ވާހަކަތައްވެސް ބަޔާނުގައި ދޮގުކޮށްފައިވެއެވެ.