މިއަދުން ފެށިގެން މަސްކިލޯއެއް ގަންނަ އަގު 20 ރުފިޔާއަށް

މިއަދުން ފެށިގެން މަސް ކިލޯއެއް ގަންނަ އަގު 20 ރުފިޔާއަށް ބަދަލުކުރުމަށް ސަރުކާރުން ނިންމައިފިއެވެ.

މަސްވެރިކަމާއި ބެހޭ ވުޒާރާގެ ޑެޕިއުޓީ މިނިސްޓަރު އަހުމަދު ޝާފިއު މައުލޫމާތު ދެއްވަމުން ވިދާޅުވެފައި ވަނީ މާދަމާއިން ފެށިގެން މަސް ގަންނަ އަގު 25 ރުފިޔާއިން 20 ރުފިޔާއަށް ކުޑަކުރުމަށް ނިންމާފައިވާ ކަމަށެވެ.

"އިކޮނޮމިކް ކައުންސިލުން ނިންމާފައިވަނީ އެގޮތަށް މަހުގެ އަގު ކުޑަކުރަން 20 ރުފިޔާއަށް،"

ޝާފިއު އާއި ހަވާލާ ދެއްވާ ބައެއް މީޑިޔާތަކުގައި ހާމަކޮށްފައިވެއެވެ.

ސަރުކާރުން ރައީސުލްޖުމުހޫރިއްޔާ އެކުލަވާލައްވާފައިވާ އިކޮނޮމިކް ކައުންސިލުގެ ނިންމުންތަކަށް އަމަލުކުރާނީ، ރައީސުލްޖުމްހޫރިއްޔާ އެ ނިންމުމެއް ބަލައިގެންފި ނަމައެވެ.

މިއަދުން ފެށިގެން މަސް ގަންނަ އަގު 20 ރުފިޔާއަށް ބަދަލުކުރަން ނިންމާފައިވާއިރު މިހާރު މަސްގަންނަމުން ދާއަގުކަމަށް ވާ 25 ރުފިޔާގެ އަގަކީ ނިމިދިޔަ ސަރުކާރުގެ އެންމެ ފަހު ދުވަސްކޮޅު ރައީސް އިބުރާޙިމް މުޙައްމަދު ޞާލިޙް ހަމަ ކުއްލިއަކަށް އިއުލާނު ކުރެއްވި އަގެކެވެ.

ރައީސް ޞާލިޙްގެ މި ކުއްލި ނިންމެވުމާއި ގުޅިގެން ، މަސް ބަންދުކުރުމުގައި ހަރަކާތްތެރިވާ އަމިއްލަ ބައެއް ކުންފުނިތަކުން ވަނީ ކަންބޮޑުވުން ފާޅުކޮށްފައެވެ. އަދި މާކެޓު އަގަށްވުރެ ބޮޑު އަގުގައި މަސް ގަންނަން ޖެހޭތީ ކަމަށް ބުނެ އެންސިސް ފިޝަރީޒް އިން ވަނީ މަސް ގަތުން ހުއްޓާލައި، ދަޅުގައި މަސް ބަންދުކުރާ ފެކްޓަރީ ވެސް ބަންދު ކޮށްފައެވެ.

މި ސަރުކާރު ވެރިކަމާއި ހަވާލުވުމުގެ ކުރިންވެސް އަދި ވެރިކަމާއި ހަވާލުވުމަށް ފަހުވެސް ބުނަމުން ގޮސްފައި ވަނީ 25 ރުފިޔާއަށް ކިލޯއެއްގެ ރޭޓުން މަސް ގަތުމަކީ ދެމެހެއްޓެނިވި ގޮތެއްގައި ކުރެވޭނެ ކަމެއް ނޫން ކަމަށެވެ. ހަމަ މިއާއި އެކު ސަރުކާރުން ބުނެފައިވަނީ މަސްކިލޯއެއް ގަންނަ އަގު މި ސަރުކާރުން 20 ރުފިޔާއަށް ވުރެ ދަށް ނުކުރާނެ ކަމަށެވެ.