އައިޖީއެމްއެޗް ހަދާފައި އެތަނުގެ ޑޮކްޓަރުންނަށްވެސް އައީ ބޭރުގެ ސިފައިން: ރައީސް މުޢިއްޒު

އިންޑިޔާ ސަރުކާރުގެ އެހީގައި އެޅުނު، އިންދިރާ ގާންދީ މެމޯރިއަލް ހޮސްޕިޓަލް، އައިޖީއެމްއެޗް، ހަދާފައި އެތަނުގެ ޑޮކްޓަރުންނަށްވެސް އައީ ބޭރުގެ ސިފައިން ކަމަށް ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ވިދާޅުވެއްޖެއެވެ.

ދިވެހިރާއްޖޭގެ ޖުމްހޫރީ ދުވަހުގެ މުނާސަބަތުގައި ދަރުބާރުގޭގައި ރޭ ބޭއްވި ރަސްމީ އިޙުތިފާލުގައި، ޤައުމާ މުޚާޠަބު ކުރައްވައި ވާހަކަފުޅުދައްކަވަމުން ރައީސް މުޢިއްޒުވަނީ މި އަހަރުގެ މެއި މަހުގެ 10 ވަނަ ދުވަހު، މަޝްވަރާގެ ރިވެތި އުސޫލުގެ ތެރެއިން ރާއްޖޭގައި ތިބި ބޭރުގެ ހުރިހާ ސިފައިން ބޭރުކޮށްފައިވާކަން ފާހަގަކުރައްވާފައެވެ. އަދި މިހާރު މިގައުމުގައި އެއްވެސް ގައުމެއްގެ ބޭރުގެ ސިފައިން ގާއިމްވެ ނުތިބޭނެ ކަމަށް އެމަނިކުފާނު ވިދާޅުވިއެވެ.

ޔުނީފޯމެއްނޫން، އެއްވެސް އެއްޗެއް ނޫން. އެއްވެސް ކަހަލަ ތަފާތު ކުރުމެއް އޮޅުވާލުމެއް އޮތް ވާހަކައެއް ނޫން ސާފު ސީދާ ވާހަކައެއް މިއީ

ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު

މިއާއެކު ރައީސް މުޢިއްޒު ވިދާޅުވީ، ބައެއް ފަރާތްތަކުން އެކި ސިޔާސީ މަގުސަދުގައި ރާއްޖޭގައި މިހާރުވެސް އިންޑިޔާ ސިފައިން ތިބި ވާހަކަ ދައްކަމުންދާ ކަމަށެވެ.

ތެދެއްމެ، އައިޖީއެމްއެޗް ހެދި ޒަމާނުންފެށިގެން، އައިޖީއެމްއެޗް ހަދާފައި އެތަނުގެ ޑޮކްޓަރުންނަށްވެސް އައީ ބޭރުގެ ސިފައިން. ސީދާ އެކްޓިވް މިލިޓަރީ ބޭފުޅުން. ޑޮކްޓަރުން. އޭރު އެންމެ ގިނައިންވެސް ތިބީ އެގައުމުގެ ޑޮކްޓަރުން. މިލިޓަރީ ބޭފުޅުން. އޭރުން ފެށިގެން މިއަދާ ހަމައަށް. ސެނަހިޔާ އުފެދުނު ދުވަހުން ފެށިގެންވެސް. އެކި އަހަރު އެކި ވަރަށް ޑޮކްޓަރުންނާއި ޓެކްނީޝަނުން، މިލިޓަރީ ބޭފުޅުން ތިއްބަވާނެ. އެވާހަކަ އެއްވެސް ބޭފުޅަކު މި މައުޟޫއަކު ނުގެނެއޭ. މިހާރުވެސް ތިއްބަވާނެ

ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު

ރައީސް މުޢިއްޒު ވިދާޅުވި ގޮތުގައި، ”އިންޑިޔާ އައުޓް“ ކެންޕެއިންގައި މުޒާހަރާ ކުރީ ސެނަހިޔާއާއި އެނޫން ތަންތަނުގައި އިންޑިޔާ ޑޮކްޓަރުން ތިބެގެނެއް ނޫނެވެ. އަދި ރާއްޖޭގައި ތިބި ބޭރުގެ ސިފައިން ގެންގޮސް ނިމިއްޖެ ކަމަށާ، މިހާރު އެއްވެސް ގައުމެއްގެ ސިފައިން މި ގައުމުގައި ނެތް ކަމަށެވެ.