ދިވެހިރާއްޖެއާއި އިންޑިއާއާ ދެމެދު ސިޔާސީ ގުޅުން ގާއިމުކުރިތާ 60 އަހަރު ފުރުން އެމްއެންޔޫއިން ފާހަގަކޮށްފި

ދިވެހިރާއްޖެއާއި އިންޑިއާއާ ދެމެދު ސިޔާސީ ގުޅުން ގާއިމުކުރިތާ 60 އަހަރު ފުރުން ފާހަގަކުރުމުގެ ގޮތުން ދިވެހިރާއްޖޭގެ ގައުމީ ޔުނިވާސިޓީ (އެމްއެންޔޫ) ގެ ފެކަލްޓީ އޮފް އާޓްސް އާއި އިންޑިއާ ހައިކޮމިޝަން ގުޅިގެން ހާއްސަ ސެމިނާ އެއް ބާއްވައިފިއެވެ.

އެމްއެންޔޫއިން ބުނި ގޮތުގައި، މި ސެމިނާ އަކީ ދެ ގައުމުގެ ދެމެދުގައި އޮތް ޒަމާންވީ އެކުވެރިކަމާއި، އެއްބާރުލުމާއި، ހިއްސާކުރެވޭ ތާރީހުގެ މައްޗަށް އަލިއަޅުވާލުމަށް ބޭއްވުނު ހަރަކާތެކެވެ. މި ރަސްމިއްޔާތު ޝަރަފުވެރިކޮށްދެއްވީ އިންޑިއާއިން ދިވެހިރާއްޖެއަށް ކަނޑައަޅުއްވާފައި ހުންނަވާ ސަފީރު، ބަލަސްބްރަމާނިއަން އެވެ.

މި ސެމިނާ ފެށުމުގެ ގޮތުން ޝަރަފުވެރި މެހުމާނު ވަނީ ދެ ގައުމުގެ ގުޅުން ރަމްޒުކޮށްދޭ ހާއްސަ ފޮޓޯ މައުރަޒެއް ބައްލަވާލައްވާފައެވެ. ސެމިނާގައި ވަނީ ފާއިތުވި 60 އަހަރު ދުވަހުގެ ތެރޭގައި ދިވެހިރާއްޖެއާއި އިންޑިއާއާ ދެމެދު އެކި ދާއިރާތަކުން އޮތް ގުޅުމާ ގުޅޭގޮތުން ތަފާތު ޕްރެޒެންޓޭޝަންތައް ހުށަހަޅާފައެވެ.

އޭގެ ތެރޭގައި މޫސުމަށް އަންނަ ބަދަލުތަކާއި ދެމެހެއްޓެނިވި ތަރައްގީ، ތާރީހީ އަދި ސަގާފީ ގުޅުންތައް، ސިއްހީ ދާއިރާގެ އެއްބާރުލުން، ކާނާގެ ރައްކާތެރިކަން، އިގްތިސާދީ ތަރައްގީ އާއި ވިޔަފާރި، ތައުލީމީ ދާއިރާ އަދި އިންސާނީ ވަސީލަތް ތަރައްގީކުރުމުގެ އިތުރުން ބައިނަލްއަގުވާމީ ގުޅުންތަކާއި އުމްރާނީ ތަރައްގީގެ ދާއިރާއިން ދެ ގައުމުގެ ގުޅުން ހިމެނެއެވެ.

މި ސެމިނާގައި ވާހަކަދައްކަވަމުން އިންޑިއާގެ ސަފީރު ވަނީ ދެ ގައުމުގެ ދެމެދުގައި އޮތް ބަދަހި ރަހުމަތްތެރިކަމުގެ ގުޅުން އަލުން ކަށަވަރުކޮށްދެއްވާފައެވެ. އަދި މި ގުޅުމުގެ މައިގަނޑު އަސާސަކީ ދެ ގައުމުގެ ރައްޔިތުންގެ މެދުގައި އޮތް ގާތް ގުޅުންކަން ދަރިވަރުންނާއި ޕްރެޒެންޓަރުން ފާހަގަކުރެއްވިއެވެ.

ރަސްމިއްޔާތު ނިންމާލުމުގެ ގޮތުން ދެ ގައުމުގެ ސަގާފީ ހަރަކާތްތަކެއް ވަނީ ހުށަހަޅާފައެވެ.