ގެދޮރުވެރިޔާ ސްކީމް: ހުރިހާ ފްލެޓެއް ނިންމާ ސެޕްޓެންބަރުގެ ނިޔަލަށް ހަވާލުކުރަނީ

ގެދޮރުވެރިޔާ ސްކީމުގެ ދަށުން ކުރީ ސަރުކާރުން އަޅަން ފަށާފައިވާ ހުރިހާ ފްލެޓްތަކުގެ މަސައްކަތް އަންނަ ސެޕްޓެންބަރު މަހުގެ ނިޔަލަށް ނިންމާލެވޭނެ ކަމަށް ގެދޮރުވެރިކަމާ ބެހޭ ވަޒީރު ޑރ. އަބްދުﷲ މުއްތަލިބް މިއަދު ވިދާޅުވެއްޖެ އެވެ.

ރައީސުލްޖުމްހޫރިއްޔާގެ އޮފީހުގައި މިއަދު އޮތް ނޫސްވެރިންގެ ބައްދަލްވުމުގައި ވަޒީރު ވިދާޅުވީ ސަރުކާރުން ބެލީ ވީހާވެސް އަވަހަށް ހުރިހާ ފްލެޓްތައް ނިންމުމަށް ކަމަށެވެ. އެ ގޮތުން ވަރަށް އަވަހަށް 1,000 ފްލެޓްގެ މަަސައްކަތް ނިމޭނެ ކަމަށެވެ.

އެގޮތުން ޖުލައި މަހުގެ ތެރޭގައި 1,000 ފްލެޓް މަސައްކަތް ނިމޭނެ ކަމަށް ވިދާޅުވި އެވެ. އަދި ސެޕްޓެންބަރު މަހުގެ ނިޔަލަށް ހުރިހާ ފްލެޓްތަކުގެ މަަސައްކަތް ނިންމާލެވޭނެ ކަމަށެވެ.

ވަޒީރު ވިދާޅުވީ ކުރީން އޮތީ ފްލެޓްގެ މަަސައްކަތް ނިންމާ ފެނާއި ކަރަންޓް ގުޅުން ފަދަ ކަންކަން ވަކީން ކުރިއަށް ގެންދާ ގޮތަށް ކަމަށެވެ. ނަމަވެސް ފްލެޓްތައް ނިމޭ މިންވަރަކުން ފެނާއި ކަރަންޓްގެ ކަންކަން ނިންމާ އެގްރީމަންޓްތައް ހެދުމުގެ މަސައްކަތް ކުރާނެ ކަމަށެވެ.

އާ ލިސްޓެއް ނުހަދާނެ

ގެދޮރުވެރިޔާ ސްކީމުން ފްލެޓް ލިބޭ މީހުންގެ ފައިނަލް ލިސްޓެއް މި ސަރުކާރުން ނުނެރެން ނިންމާ އެ ސްކީމުން ފްލެޓް ލިބޭ މީހުންގެ ފައިނަލް ލިސްޓަކީ ކުރީ ސަރުކާރުން ނެރުނު ލިސްޓް ކަމަށް ކަނޑައަޅާ އެކަން ސަރުކާރުން ވަނީ އިއުލާނު ކޮށްފަ އެވެ.

މުއްތަލިބު ވިދާޅުވީ އެ ގޮތަށް އަމަލު ކުރަން ނިންމި ނަމަވެސް ފްލެޓް ލިސްޓާއި ގުޅޭގޮތުން އޭސީސީން އަންގާފައިވާ އެންގުންތަކަށް ބަލާނެ ކަމަށެވެ. އެގޮތުން ފްލެޓަށް ޝަރުތު ހަމަނުވާ މީހުން ތިބި ނަމަ އެ ބަޔަކު އުނިކުރާނެ ކަމަށް ވިދާޅުވި އެވެ.

ފްލެޓް ލިސްޓުން ގިނަ ބަޔަކު އުނިވީ މާލޭގައި 15 އަހަރު އުޅުކަން ސާބިތުކޮށް ދިނުމަށް އޮތް ދަތިކަމުގެ ސަަބަބުން ކަން ފާހަގަ ކުރައްވާ މުއްތަލިބު ވިދާޅުވީ އެކަމަށް ހައްލެއް ގެނައުމުގެ ގޮތުން 2007 ވަނަ އަހަރުގެ ކުރީން މާލޭގައި އުޅެފައިވާ މީހެއްކަން ލިޔެކިޔުންތަކުން ފެންނަ ނަމަ އެ މީހަކީ ޝަރުތުހަމަވާ މީހެއް ކަމަށް ބަލާނެ ކަމަށެވެ.

އެގޮތަށް ބަލަން ނިންމީ ރަށް ދޫކޮށް މާލެއަށް ހިޖުރަކުރުމަށް ފަހު އަލުން އެނބުރި ރަށަށް ދިރިއުޅުން ބަދަލު ކުރުމަކީ ވަރަށް މަދުން ނޫނީ ނުހިނގާ ކަމަކަށްވާތީ ކަމަށެވެ. އެހެން ކަމުން ވަރަށް ގިނަ ބަޔަކު ޝަރުތު ހަމަވާނެ ކަމަށް ބެލެވޭ ކަމަށް މުއްތަލިބު މިއަދު ވިދާޅުވި އެވެ.

"މީގައި އަޅުގަނޑުމެން ބަލާނީ ވަކި ލިޔުންތަކަކަށް ނޫން. ހުށައަޅާފައިވާ ހުރިހާ ލިޔުންތަކަށް އަޅުގަނޑުމެން ބަލާނަން," މުއްތަލިބު ވިދާޅުވި އެވެ.