ތުއްތު ކުއްޖަކު ކާރަށް ހޮޑުލީ މައްސަލާގައި ކަންވީ ގޮތް ޓެކްސީ ސެންޓަރުން ސާފުކޮށްދީފި

ކާރެއްގެ ތެރެއަށް ތުއްތު ކުއްޖަކު ހޮޑުލީ މައްސަލާގައި ޑްރައިވަރު ފައިސާއަށް ޑިމާންޑުކުރި ކަމަށް ބުނެ ސޯޝަލް މީޑިއާގައި ފެތުރެމުންދާ ވާހަކަތަކަކީ ހަޤީޤަތް އޮޅޭ ގޮތަށް ދައުރުކުރަމުންދާ ވާހަކަތަކެއް ކަމަށް ނަލަ ޓެކްސީ ސެންޓަރުން ބުނެފިއެވެ.

ކަން ހިނގިގޮތް ސާފްކޮށްދިނުމުގެ ގޮތުން އެ ސެންޓަރުން ނެރުނު ބަޔާނުގައި ބުނެފައިވަނީ، އެ ދަތުރަކީ ހުޅުމާލެ ފޭސް 2 އިން 7 ނަންބަރު ޖެޓީއަށް ނަލަ ޓެކްސީ އެޕް މެދުވެރިކޮށް ނެގި ދަތުރެއް ކަމަށެވެ. ދަތުރު މަތީން ބްރިޖް ލައިޓް ކައިރިން ތުއްތު ކުއްޖަކަށް ހޮޑުލެވުނު ކަން ކަސްޓަމަރު ޑްރައިވަރަށް އެންގީ ކާރުގެ ޝީޓަށާ އެކު ހޮޑުލެވިފައި ހުއްޓައި ކަމަށާއި، ކޮތަޅު ހުރިތޯ ކަސްޓަމަރު ސުވާލުކުރުމުން ޝީޓް ކައިރީ ކޮތަޅު ހުންނާނެ ކަމަށް ޑްރައިވަރު ބުނި ކަމަށެވެ. އަދި ޝީޓް ސާފުކުރުމަށް އާންމުކޮށް ދޭ ތަންތަނުން 1500 ރުފިޔާ ވަރު ނަގާ ކަމަށް ޑްރައިވަރު އެވަގުތު ބުނި ކަމަށް އެ ބަޔާނުގައިވެއެވެ.

އެ ހިސާބުން ކަސްޓަމަރު ފޯނުން އެހެން މީހަކަށް ގުޅައި ޑްރައިވަރާ ވާހަކަ ދެއްކުވި ކަމަށާއި އެ ފަރާތުން ބުނި ތަނަކަށް ޝީޓް ސާފުކުރުމަށް ދިޔުމަށް ބުނި ކަމަށް އެ ބަޔާނުގައި ބަޔާންކޮށްފައިވެއެވެ. ކަސްޓަމަރު ދާން ބޭނުންވި މަންޒިލަށް ގަޑިއަށް ގެންގޮސްދިނުމަށް ފަހު ޑްރައިވަރު ވަނީ ފޯނުން ވާހަކަ ދެއްކި ފަރާތް ބުނި ތަނަށް ގޮސްފައެވެ. ނަމަވެސް އެ ތަނުން ޝީޓް ސާފުކުރެވެން ނެތް ކަމަށް ބުނުމުން ޑްރައިވަރު ވަނީ ޖެހިގެން ހުރި ތަނަކުން ޝީޓް ސާފުކޮށްފައެވެ. އެ ތަނުން ފުރަތަމަ ބުނީ 1600 ރުފިޔާ ކަމަށެވެ. ނަމަވެސް ޑްރައިވަރު ވާހަކަ ދައްކައިގެން އެ އަގު 1000 ރުފިޔާއަށް ކުޑަކުރި ކަމަށް ބަޔާނުގައިވެއެވެ.

މި ހުރިހާ މަރުހަލާއެއްގައި ވެސް ކަސްޓަމަރުގެ ފަރާތުން ފޯނުން ގުޅި މީހާއާ ޑްރައިވަރު ފޯނުން ގުޅައިގެން ވާހަކަ ދައްކަމުން ގެންދިޔަ ކަމަށާއި 1000 ރުފިޔާއަށް ޝީޓް ސާފުކުރީ ދެ ފަރާތް އެއްބަސްވެގެން ކަމަށް އެ ސެންޓަރުން ބުނެފައިވެއެވެ. ސާފުކުރުމުގެ މަސައްކަތް ކުރިއަށް ދިޔައިރުގެ ފޮޓޯ ވެސް ފޯނުން ވާހަކަ ދެއްކި ފަރާތާ ހިއްސާކުރި ކަމަށާއި ޝީޓް ސާފުކުރުމަށް ފައިސާ ލިބުނު ނަމަވެސް ސާފުކުރުމުގެ ޚަރަދު ކެނޑުމުން ދަތުރުގެ އަގު ވެސް ޑްރައިވަރަށް ނުލިބޭ ކަމަށް ބަޔާނުގައި ފާހަގަކޮށްފައިވެއެވެ.

ދެ ފަރާތުން ވާހަކަ ދައްކައި ގޮތެއް ނިންމުމަށް ފަހު ޑްރައިވަރާއި ސެންޓަރުގެ އަގު ވެއްޓޭ ގޮތަށް ހަޤީޤަތް އޮޅޭ ގޮތަށް ސޯޝަލް މީޑިއާގައި ވާހަކަ ފެތުރުމަކީ އެ ސެންޓަރުން ކަންބޮޑުވާ ކަމެއް ކަމަށް ނަލަ ޓެކްސީ ސެންޓަރުން ވަނީ ބުނެފައެވެ.