ރާއްޖޭގައި ފުރަތަމަ ފަހަރަށް އިމާމުންގެ ސުލޫކީ މިންގަނޑެއް އެކުލަވާލައި، އަމަލު ކުރަން ފަށައިފި

ރާއްޖޭގައި ފުރަތަމަ ފަހަރަށް އިމާމުންނާއި މުދިމުންގެ ސުލޫކީ މިންގަނޑު ބަހައްޓަންވީ ގޮތުގެ އުސޫލެއް އެކުލާވަލައި، މިއަދު އަމަލުކުރަން ފަށައިފިއެވެ.

މިއަދު ގެޒެޓު ކުރެވުނު މި އުސޫލުގައި ބުނެފައިވާ ގޮތުން، މިފަދަ އުސޫލެއް އެކުލަވާލުމުގެ މަގުސަދަކީ، މިސްކިތްތަކުގެ އިމާމުންނާއި މުދިމުންނަކީ އިސްލާމްދީނާއި ރައްޖޭގެ ގާނޫނު އަސާސީއާއި ގަވައިދުތަކާއި އާންމު އިޖުތިމާއީ މިންގަނޑުތަކާ އެއްގޮތަށް އަމަލުކުރާ ބައެއް ކަން ކަށަވަރު ކުރުމެވެ. އަދި އެ ފަރާތްތަކަކީ ދީނީ އެއްބައިވަންތަކަމާއި ގައުމީ ވަޙްދަތު ދެމެހެއްޓުމަށް މަސައްކަތް ކުރާ ބަޔަކަށް ހެދުމެވެ.

ހަމަ އެހެންމެ، މިސްކިތްތަކުގެ އިމާމުންނާއި މުދިމުން އެމީހުންގެ ވަޒީފާގެ ޒިންމާތަކަށް ރައްކާތެރިކުރުމަށާއި ވަޒީފާއަށް ޙުރުމަތްތެރިކޮށް ހިތުމަށް ބާރުއަޅައި، މަސައްކަތުގެ ދާއިރާގައި އަމަލުކުރާނެ އެއް މިންގަނޑެއް ކަނޑައެޅުމަކީގެ މި އުސޫލުގެ މަގުސަދުތަކުގެ ތެރޭގައި ހިމެނޭ ކަންކަމެވެ.

މީގެ އިތުރުން، މިސްކިތްތަކުގެ އިމާމުންނަކީ އަޚުލާގީ ސިފަތައް ހިފަހައްޓާ، ސުލޫކު ރަނގަޅު، ނަމޫނާ ބަޔަކަށް ހެދުމާއި، އެއީ މުޖުތަމައު ބަލައިގަންނަ އާންމުން އިތުބާރު ކުރާ ބަޔަކަށް ހެދުން ކަމަށް އުސޫލުގައި ބުނެފައިވެއެވެ.

މި އުސޫލުގައި އިމާމުންނާއި މުދިމުންގެ ހެދުން ބަހައްޓަންވީ ގޮތާއި މިސްކިތުގައި ހިނގާ ނޭދެވޭ ކަންކަން ހުއްޓުވަން އަމަލުކުރަންވީ ގޮތާއި އަޅުކަމާ ގުޅުން ހުރި ކަންކަމުގައި އަމަލުކުރަން ވީ ގޮތް ހިމަނާފައިވެއެވެ.

އެގޮތުން، ރަސްމީ ގަޑީގައި އެމީހުން އަޅާ ހެދުމަކީ އިސްލާމީ މުޖުތަމަޢު ބަލައިގަންނަ އަދި އިމާމުވެ ނަމާދުކުރުމަށް އެކަށީގެންވާ ހެދުމަކަށް ވާންޖެހޭއިރު، ޖީންސް ޓީޝާޓް ފަދަ ހެދުމެއްގައި އިމާމުވެ ނަމާދު ނުކުރުމަށް ބުނެފައިވެއެވެ. އަދި ގަޔަށް ބާރު އެއްޗެއް ނުލުމާއި، ބޮލުގައި އެއްޗެއް އެޅުމަށްވެސް ސަމާލުވުމަށް ވަނީ ބުނެފައެވެ.

މީގެ އިތުރުންވެސް ގިނަ ކަންކަމުގެ ތަފްސީލު މި އުސޫލުގައި ވާއިރު، އެ އުސޫލާ ޚިލާފުވާ ކަމެއް ކޮށްގެން އިމާމެއްގެ ޝަކުވާ ހުށަހަޅައިގެން ނުވަތަ އަޚްލާގީ މިންގަނޑާ ޚިލާފު ކަމެއް މިނިސްޓްރީއަށް ފާހަގަވެގެން އެކަމެއް ތަހުގީގުކުރުމަށް ފަހުގައި ސިވިލް ސާވިސްގެ ގަވައިދުގެ ދަށުން ފިޔަވަޅު އެޅުމުގެ އިޚްތިޔާރު އިސްލާމިކް މިނިސްޓްރީއަށް ލިބިގެންވާ ކަމަށް އުސޫލުގައިވެއެވެ.

އަދި މައްސަލައިގެ ހާލަތަށް ރިއާޔަތްކުރުމަށް ފަހުގައި ސިވިލް ސާވިސްގެ ގަވައިދުގެ ދަށުން އިމާމުވެ ނަމާދުކުރުމުން ދުރުކުރުމުގެ ހުއްދަ ވެސް މިނިސްޓްރީއަށް ލިބިގެންވާ ކަމަށް ބުނެފައިވެއެވެ.