ފުލުހުންގެ ޗެކްޕޮއިންޓުން ނެއްޓެން އުޅެނިކޮށް 17 އަހަރުގެ ކުއްޖަކު އެކްސިޑެންޓް ވެއްޖެ

ހުޅުމާލެ ދެވަނަ ފިޔަވަހީގައި 17 އަހަރުގެ އަންހެން ކުއްޖަކަށް ފުލުހަކު އަނިޔާ ނުކުރާ ކަމަށާއި، ވެހިކަލް ޗެކް ޕޮއިންޓް ގައި ތިބި ފުލުހުންގެ ގައިން ނެއްޓެން އުޅެނިކޮށް ސައިކަލް ވެއްޓުނީ ކަމަށް ފުލުހުން ބުނެފިއެވެ.

އާރުޑީސީ ގެ ކުރީގެ މެނޭޖިން ޑިރެކްޓަރު މޫސާ އަލި މަނިކު (މޫކޭ) އެކްސްގައި ކުރެއްވި ޕޯސްޓެއްގައި ވިދާޅުވީ، ހުޅުމާލެ ދެވަނަ ފިޔަވަހީގައި ފުލުހަކު 17 އަހަރުގެ އަންހެން ކުއްޖަކަށް އަނިޔާ ކުރި މައްސަލައިގައި ރައްޔިތުން ދަނީ ނުރުހުން ފާޅުކުރަމުން ކަމަށެވެ.

މި މައްސަލައިގައި ކުއްޖާގެ ރައްކާތެރިކަން ކަށަވަރު ކުރުމުގެ ބަދަލުގައި ފުލުހުންގެ ކިބައިން ފެންނަނީ ފުލުސް އޮފިޝަލް ހިމާޔަތްކޮށް ހެކި ނައްތާލުމަށް މަސައްކަތްކުރާ މަންޒަރު ކަމަށް ބުނެ މޫކޭ ވަނީ ކުޑަކުދިންނަށް އަނިޔާކުރުން ހަރުކަށި އިބާރާތުން ކުށްވެރިކުރާ ކަމަށް ބުނެފައެވެ.

މިކަމާއި ގުޅިގެން ފުލުހުންގެ ތަރުޖަމާނު އަހްމަދު ޝިފާން ވިދާޅުވީ، މި ހާދިސާ އަކީ ރޭގައި 22:05 ހަާއިރު ފުލުހުން ހުޅުމާލެ ފޭސް 2 ގައި ޤާއިމްކޮށްފައިހުރި ވެހިކަލް ޗެކް ޕޮއިންޓަކާއި އަރާ ހަމަވުމުން ސައިކަލު އެކްސެލެރޭޓްކޮށް، ޗެކް ޕޮއިންޓްގެ ފަހަތުގައި ތިބި ފުލުހުންގެ ގައިން ނައްޓާ ކުރިއަށް ދިއުމަށް އުޅުމުގެ ތެރޭގައި ސައިކަލް ވެއްޓިގެން ހިނގާފައިވާ ހާދިސާއެއް ކަމަށެވެ.

ޝިފާން ވިދާޅުވީ، މި ހާދިސާގައި ސައިކަލް ދުއްވާފައިވަނީ ލައިސަންސް ނެތް ފަރާތެއް ކަމަށާއި އަނިޔާވި ފަރާތްތަކަށް ހުޅުމާލެ ހޮސްޕިޓަލުން ރޭގައި ފަރުވާ ދެވިފައިވާ ކަމަށެވެ.