މޫސުން ރަނގަޅުކަމަށް ފެނުނަސް، މިއަދު ވެސް ވައިގަދަވެ ކަނޑުތައް ގަދަވާނެ

މިއަދުވެސް ރާއްޖެއަށް މޫސުން ގޯސް ކަމަށާއި، ވައިގަދަވެ ކަނޑުތައް ވެސް ގަދަވާނެ ކަމަށް މޫސުމާއި ބެހޭ ޤައުމީ އިދާރާ (މެޓް އޮފީސް) އިން ބުނެފިއެވެ.

މާލެ ސަރަޙައްދަށް މިއަދުގެ މޫސުން އަލިކަމަށް ދެއްކި ނަމަވެސް، މެޓުން މިއަދު ހެނދުނު 10:00 އިން ހަވީރު 04:00 އަށް ހުދު ސަމާލު ނެރެފައެވެ. އެ ސަމާލު މެޓުން ނެރެފައިވަނީ ކ. އަތޮޅުން ފެށިގެން އައްޑޫ އަތޮޅާ ހަމައަށެވެ.

އެގޮތުން މިއަދުގެ އެ ވަގުތުތަކުގައި ގަޑިއަކު 19 މޭލާއި 24 މޭލާ ދެމެދުގެ ބާރުމިނުގައި ވައިޖެހޭނެ ކަމަށް މެޓުން ލަފާކުރެއެވެ.

އެގޮތުން ކުރިޔަށް އޮތް 24 ގަޑިއިރަށް މެޓުން ލަފާކުރާ ގޮތުގައި، ދެކުނުގެ އެކި ހިސާބުތަކަށް ވިއްސާރަކުރާނެއިރު،  ބައެއް ރަށްރަށަށް ގުގުރުމާއެކު ބޯކޮށް ވާރޭވެހުން އެކަށީގެންވެއެވެ. އަދި އުތުރާއި މެދުރާއްޖެތެރޭގެ އަތޮޅުތަކަށް ކެރީގެ އަސަރު ފޯރުމާއެކު ގުގުރުން އެކަށީގެންވާކަމަށް އެ އިދާރާއިން ވަނީ ލަފާކޮށްފައެވެ.

އެގޮތުން ގަޑިއަކު 13 މޭލާއި 23 މޭލާ ދެމެދުގެ ބާރުމިނުގައި ވައި ޖެހޭނެކަމަށް ލަފާކުރެވޭއިރު، ވިލާގަނޑުގައި ގަޑިއަކު ގާތްގަނޑަކަށް 40 މޭލު ބާރުމިނަށް ވައި ގަދަވުން އެކަށީގެންވާކަމަށް ވެސް އެ އިދާރާއިން ވަނީ ލަފާކޮށްފައެވެ.

މެޓުން ވަނީ އަންނަ ހަފުތާގައި ވެސް ރާއްޖޭގެ އެކި ހިސާބުތަކަށް ވައިގަދަވެ ކަނޑުތައް ގަދަވާނެކަމަށް ލަފާކޮށްފައެވެ. އެހެން ނަމަވެސް އުތުރާއި މެދުރާއްޖެތެރޭގެ އަތޮޅުތަކަށް ވާރޭ ވެހޭނެކަމަށް ލަފާނުކުރެވޭކަމަށް އެއިދާރާއިން ވަނީ ބުނެފައެވެ.

އެހެންކަމުން ހުރިހާ ފަރާތްތަކުން މޫސުމަށް ސަމާލުވުމަށް އެ އިދާރާއިން ވަނީ އެދިފައެވެ. އަދި ޒަރޫރީ ބޭނުމެއްގައި ނޫނީ ކަނޑުމައްޗަށް ނޭރުމަށް ވެސް އެ އިދާރާއިން ވަނީ އިލްތިމާސްކޮށްފައެވެ.