ރާއްޖޭގައި 6 އެއާޕޯޓާއި، އައްޑޫގައި ހައުސިން މަޝްރޫއެއް ހިންގަން ޔޫއޭއީގެ ކުންފުންޏަކުން ސަރުކާރަށް ހުށައަޅައިފި

ރާއްޖޭގައި 6 ޑޮމެސްޓިކް އެއާޕޯޓާއި، އައްޑޫގައި 500 އަށްވުރެ ގިނަ ސްމާޓު ހައުސް އެޅުމުގެ ހައުސިން މަޝްރޫއެއް ހިންގަން ޔޫއޭއީގެ ކުންފުންޏަކުން ސަރުކާރަށް ހުށައަޅައިފިއެވެ.

އިއްޔެ ބޭއްވި އިންވެސްޓްމަންޓް ފޯރަމަށް ފަހު، ދިވެހި ނޫސްވެރިންނަށް މައުލޫމާތު ދެއްވަމުން، ޔޫއޭއީގެ ފުރަތަމަ ޚާރިޖީވަޒީރު އަޙްމަދު ބިން ޚަލީފާ އައްސުވައިދީގެ އާއިލީ ވިޔަފާރިއެއްކަމަށްވާ ޔުނައިޓެޑް ސްޓާސް ގުރޫޕުގެ ސީއީއޯ ނިޕުނާ ވަހަލަތަންތަރިގެ ވިދާޅުވީ އޭނާގެ ކުންފުނީގެ ސަބްސިޑިއަރީ ކުންފުންޏަކުން މި މަޝްރޫއުތައް ހިންގަން ޝައުގުވެރިކަން ފާޅުކޮށް ސަރުކާރަށް ޕްރޮޕޯޒަލް ހުށައަޅާފައިވާ ކަމަށެވެ.

މިގޮތުން ނިޕުނާ ވަހަލަތަންތަރިގެ ވިދާޅުވީ  ރާއްޖޭގައި 6 އެއާޕޯޓެއް ތަރައްޤީކުރުމަށް ރީޖަނަލް އެއާޕޯޓްސް ކުންފުންޏަށް ޕްރޮޕޯޒަލެއް ހުށަހަޅައި އެކަމުގެ މަޝްވަރާތައް ކުރަމުން އަންނަ ކަމަށެވެ.

މީގެ އިތުރުންވެސް، އޭނާ ވިދާޅުވީ ރާއްޖޭގައި ޑްރޯން ބޭނުންކުރުމަށްޓަކައި ބޭނުންވާ ޔޫޓީއެމް ނުވަތަ ޔުނިވާސަލް ޓްރާންސްވާސް މާކޭޓާ ކޯޑިނޭޓް ސިސްޓަމް ރާއްޖޭގައި ޤާއިމުކުރުމުގެ މަޝްވަރާތައް ރީޖަނަލް އެއާޕޯޓްސް ކުންފުންޏާއި ޓުއަރިޒަމް މިނިސްޓްރީއާއެކު ކުރަމުންދާކަމަށެވެ. މި ގޮތުން މި ޓެކްނޮލޮޖީ އީޖާދުކުރި ސުވިޑެންގެ ކުންފުނީގެ މަންދޫބުންވެސް އިއްޔެ އޮތް ފޯރަމުގައި ބައިވެރިވެފައިވާ ކަމަށް ވެސް އޭނާ ވިދާޅުވިއެވެ.

އައްޑޫގައި 500 އަށް ވުރެ ގިނަ ސްމާޓް ހައުސް އެޅުމުގެ މަޝްރޫއާއި ބެހޭގޮތުން އޭނާ ވިދާޅުވީ އެޗްޑީއެފްސީ މެދުވެރިކޮށް މި މަޝްރޫއަށް ފަންޑިން ފޯރުކޮށްދިނުމާ ގުޅޭ ގޮތުން ރައީސުލްޖުމްހޫރިއްޔާގެ އޮފީހާ ވާހަކަދައްކަވަމުންދާ ކަމަށެވެ. ނިޕުނާ ވަހަލަތަންތަރިގެ ވިދާޅުވީ މި ހައުސިން ޔުނިޓް ތައް އެޅުމަށް ބޭނުންވާ ފައިސާ އޭނާގެ ކުންފުނިން ގެނެސްދެނީ ސަރުކާރަށް ބުރަ އެންމެ ކުޑަވާނެ ގޮތަކަށް ކަމަށާއި އެ ފައިސާ ހަމަޖައްސަނީ ބަދަލުގައި ސަރުކާރުން ކޮލަޓެރަލްއެއް ދޭންނުޖެހޭނެ ގޮތަށް ކަމަށެވެ.

އައްޑޫގައި 504 ސްމާޓު ހައުސް ބިނާކުރުމަށްޓަކައި 100 މިލިއަން ޑޮލަރު ފޯރުކޮށްދިނުމާމެދު މިހާރުވެސް މަޝްވަރާކުރަމުންދާ ކަމަށާއި މި ފައިސާ ދެއްކުން 20 އަހަރަށް ދަންމައިލެވޭނެ ކަމަށް ނިޕުނާ ވަހަލަތަންތަރިގެ ވިދާޅުވިއެވެ.

މީގެ ކުރިންވެސް މިފަދަ ވަރަށް ގިނަ ހުށައެޅުންތަކެއް އެ ކުންފުނިން ހުށައެޅިނަމަވެސް އޭރު ރާއްޖޭގައި އޮތް ސަރުކާރުން އެކަމަށް މާބޮޑު ޝައުގުވެރިކަމެއް ފާޅުނުކުރި ނަމަވެސް، މި ސަރުކާރުން މި ކަމާއި މެދު މަޝްވަރާކޮށް، ވަޒީރުން ވަރަށް ބޮޑަށް އިސްނަގައިގެން މަސައްކަތްކުރައްވަމުންދާ ކަން ނިޕުނާ ވަހަލަތަންތަރިގެ ފާހަގަކުރެއްވިއެވެ.