ރައީސް މުޢިއްޒު ފަލަސްތީނުގެ ރައީސް މަހްމޫދު އައްބާސްއާ ބައްދަލު ކުރައްވައިފި

އދ. ގެ 79 ވަނަ އާންމު މަޖިލީހުގެ ޖަލްސާގެ ހަވާސާގެ ތެރެއިން ދިވެހިރާއްޖޭގެ ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު، ފަލަސްތީނު ދައުލަތުގެ ރައީސް ޑރ. މަހްމޫދު އައްބާސްއާ ބައްދަލުކުރައްވައިފިއެވެ.

މި ބައްދަލުވުމުގައި މަހްމޫދު އައްބާސް ވަނީ ފަލަސްތީނު ރައްޔިތުންގެ ޙާލަތާ ގުޅޭގޮތުން ދުނިޔޭގެ އެހީތެރިކަމާއި އެއްބާރުލުން ހޯދުމަށް ގޮވާލައްވާފައެވެ.

"އަޅުގަނޑުމެންނަކީވެސް އިންސާނުންކަމުން، އަޅުގަނޑުމެން ހަނގުރާމަ ހުއްޓާލުމަށް އެދެނީ" ބައިނަލްއަޤްވާމީ މުޖުތަމަޢުއަށް އައްބާސް ދެއްވި މެސެޖުގައި ވިދާޅުވިއެވެ.

މިއާއެކު، ރައީސް އައްބާސް ވަނީ ދިވެހިރާއްޖެއިން ދެމުންގެންދާ ދިގު މުއްދަތުގެ އެހީތެރިކަމަށް ޝުކުރު އަދާކުރައްވާފައެވެ.

"ފަލަސްތީނު ރައްޔިތުންނަށް ދިވެހިރާއްޖެއިން ދެއްވާ އެހީތެރިކަން އަޅުގަނޑުމެޑުމެންނަށް އަބަދުވެސް އެނގޭ، އަދި ތިޔަ ބޭފޭފުޅުންގެ ދެމިގެންވާ އެއްބާރުލުމަށް އަޅުގަނޑުމެން ވަރަށް ބޮޑަށް ޝުކުރުވެރިވަން" އައްބާސް ވިދާޅުވިއެވެ.

މީގެ އިތުރުން، ރައީސް ޑރ. މުޢިއްޒު ވަނީ ފަލަސްތީނަށް ދިވެހިރާއްޖެއިން ކުރެވެންހުރި ހުރިހާ ގޮތަކުން އެހީތެރިވެދޭނެކަން ކަށަވަރުކޮށްދެއްވާފައެވެ. އަދި ފަލަސްތީނު ރައްޔިތުންނަށް އެބައިމީހުންގެ ޙައްޤުތައް ލިބޭނެކަމުގެ އުންމީދު ފާޅުކުރައްވައި، ފަލަސްތީނަކީ މިނިވަން ޤައުމެއްގެ ގޮތުގައި ބައިނަލްއަޤްވާމީ ފެންވަރުގައި ބަލައިގަތުމަށް ދިވެހިރާއްޖެއިން މަސައްކަތްކުރާނެކަމަށް ވަޢުދުވެވަޑައިގެންނެވިއެވެ.

ހަމަ އެހެންމެ، ދެ ޤައުމުގެ ދެމެދުގައި އެއްބާރުލުން ދެވިދާނެ ދާއިރާތަކާ ބެހޭގޮތުންވެސް ދެ ރައީސުން ވަނީ މަޝްވަރާކުރައްވާފައެވެ.

މި ބައްދަލުވުން ނިމުނީ ދެ ޤައުމުގެ މަޞްލަޙަތު ހިމެނޭ ކަންކަމުގައި އެކުގައި މަސައްކަތްކުރުމަށާއި، ދިވެހިރާއްޖެއާއި ފަލަސްތީނާ ދެމެދު އޮންނަ ޑިޕްލޮމެޓިކް ގުޅުން އިތުރަށް ހަރުދަނާކުރުމަށް ދެ ރައީސުން އަލުން ވަޢުދުވެވަޑައިގަތުމާ އެކުގައެވެ.