އީދު އުފާގައި ގައުމިއްޔަތު ދިރުވައި އާލާކުރުމަކީ މުހިންމުކަމެއް: ރައީސުލްޖުމްހޫރިއްޔާ

އީދުގެ އުފާ ފާޅުކުރުމުގައި ގައުމިއްޔަތު ދިރުވައި އާލާކުރުމަކީ މުހިންމުކަމެއް ކަމުގައި ރައީސުލްޖުމްހޫރިއްޔާ އިބްރާހިމް މުހައްމަދު ސޯލިހު ވިދާޅުވެއްޖެއެވެ.

އެމަނިކުފާނު މިހެން ވިދާޅުވީ 1440 ވަނަ އަހަރުގެ އަޟްޙާ ޢީދު ދުވަހުގެ މުނާސަބަތުގައި، ދިވެހިރާއްޖޭގެ ރައްޔިތުންނަށް ފޮނުވި ތަހުނިޔާގެ ޚިތާބުގައެވެ.

ރައީސް ޞާލިހު ވިދާޅުވީ ޢީދުގެ އުފާ ފާޅުކުރުންތަކުގައި، މުޖްތަމަޢުގެ އެންމެން ބައިވެރިކޮށް، އިޖްތިމާޢީ ގުޅުންތަކާއި ޤައުމިއްޔަތުގެ ސިފަތައް ދިރުވައި އާލާކުރުމަކީ ވެސް ވަރަށް މުހިންމު ކަމެއްކަމަށެވެ.

އެމަނިކުފާނު ވިދާޅުވީ އަޟްޙާ ޢީދު އަންނަނީ ޙައްޖުގެ މަތިވެރި އަޅުކަމާ ގުޅިގެން ކަމަށްވާއިރު، އެ ޢީދުން އަޅުގަނޑުމެންގެ ހިތްތަކަށް ގެނެސްދެނީ، ކޮންމެ ކަމެއްގައިވެސް، މުޖްތަމަޢުގެ ފަރުދުންގެ މެދުގައި އޮންނަންޖެހޭ ޢަދުލުވެރިކަމާއި ހަމަހަމަކަމުގެ މަތިވެރި އުޞޫލުތައްކަމަށާއި އެކަން އަޅުގަނޑުމެންގެ ތެރޭގައި ފެތުރިގެންދާނީ، ތިމާގެ އަމިއްލަ ނަފްސަށް ހެޔޮއެދޭ ފަދައިން، އަނެކުންގެ މަޞްލަޙަތަށް އިސްކަން ދީގެންކަމަށެވެ.

"މިފަދަ ކޮންމެ ޢީދަކީ އަޅުގަނޑުމެންގެ ހީނަރުވެފައިވާ ޢާއިލީ ގުޅުންތައް، ބަދަހިކުރުމަށް ލިބޭ ވަރަށް އަގުހުރި ފުރުޞަތެކެވެ. ވަކިވަކިން ދިރިއުޅެމުންދާ އެއްބަނޑުއެއްބަފާ މީހުންނަށާއި ޢާއިލާގެ މެމްބަރުންނަށް ޒިޔާރަތްކޮށް، ޢާއިލާގެ ކުޑަކުދީންނަށް ހަދިޔާ ދީ، އުފާވެރިކަން އިޙްސާސްކޮށްދިނުމަށް ވަރަށް މުހިންމު މުނާސަބަތެކެވެ. މާމައިންނާއި ކާފައިން އަދި މައިންބަފައިންނަށް ޒިޔާރަތްކޮށް، އެމީހުންނާއެކު ވަގުތުކޮޅެއް ހޭދަކޮށްލުމަށް ނުހަނު އެކަށޭނަ ދުވަސްކޮޅެކެވެ. ޢާއިލީ މެމްބަރުންގެ ޙާލުއަހުވާލު އޮޅުންފިލުވައި، އެމީހުންނަށް އެހީތެރިކަން ފޯރުވައިދިނުމަކީ، އަޅުގަނޑުމެންގެ ކޮނޑުގައި އެޅިފައިވާ ދީނީ އަދި ޢާއިލީ ވާޖިބެއްކަން ހަނދާނުގައި ބެހެއްޓެވުންވެސް ވަރަށް މުހިންމެވެ"، ރައީސްގެ ޚިތާބުގައި ވިދާޅުވިއެވެ.