މި އަހަރުގެ ތެރޭގައި މާލެއާއި ވިލިމާލޭގެ ހުރިހާ މަގެއް ތަރައްޤީކުރަން ފަށަނީ
މާލެއާއި ވިލިމާލޭގެ މަގުތައް ޒަމާނީ ފެންވަރަށް ތަރައްޤީކުރަން ޗައިނާ އާއެކު އެއްބަސްވެއްޖެއެވެ.
އިއްޔެ ޗައިނާ އާއެކު ވެވުނު 20 އެއްބަސްވުމުގެ ތެރެއިން މާލެއާއި ވިލިމާލެ މަގުތައް ތަރައްޤީކުރުމުގެ އެއްބަސްވުމުގައި ރާއްޖޭގެ ފަރާތުން ސޮއި ކުރެއްވީ އިމާރާތް ކުރުމާއި ބިނާރާ ބެހޭ ވަޒީރު ޑރ.ޢަބްދުالله މުއްޠަލިބެވެ.
މާލެ އާއި ވިލިމާލެ މަގުތައް ތަރައްގީ ކުރުމުގެ މަސައްކަތް މި އަހަރު ފަށަން ސަރުކާރުން މަސައްކަތް ފަށާފައި ވާއިރު، ސަރުކާރުގެ އަމާޒަކީ މި 5 އަހަރުތެރޭގައި މަގުތައް ހަދާ ނިންމުމެވެ.
މާލޭގެ މަގުތަކަކީ ދުވަސްވެ މަރާމާތެއް ކޮށްފައި ނެތުމުގެ ސަބަބުން ވަރަށް ބޮޑަށް ހަލާކުވެފައި އޮތްމަގުތަކެއް ކަން ފާހަގަ ކޮށްލެވެއެވެ. މިހާރު އޮތް މަގުތަކަކީ ފެންހިންދާ ރަނގަޅު ނިޒާމަކާއެކު ހަދާފައި އޮތް މަގުތަކަށް ނުވުމުގެ ސަބަބުން ދާދިފަހުން ވެސް މާލެއަށް ބޯކޮށް ވާރޭވެހި ފެންބޮޑުވެ ގޭގެއަށް ފެންވަދެ އެކި ވަރުގެ ގެއްލުންތައް ވަނީ ލިބިފައެވެ.
މިކަމާއި ގުޅިގެން ރައީސުލްޖުމްހޫރިއްޔާ ޑރ. މުޙައްމަދު މުއިއްޒު ވިދާޅުވީ މާލޭގެ ހުރިހާ މަގެއް ޒަމާނީ ފެންވަރަށް ތަރައްޤީ ކުރުމަށް ނިންމާފައިވާކަމަށެވެ. އަދި މަގުތައް ތަރައްޤީކުރާނީ ފެންހިންދާ ރަނގަޅު ނިޒާމަކާއެކުކަމަށް ވެސް އެމަނިކުފާނު ފާހަގަ ކުރެއްވިއެވެ.
ކޮމެންޓް ކުރޭ
ކޮމެންޓްސް
މިހާތަނަށް ކޮމެންޓެއް ނެތް
