އިންޑިއާގެ ކުރީގެ މަޖިލިސް މެންބަރެއް, ސަރުކާރު ބަދަލުކުރަން ގޮވާލުން އެމްޑީޕީން ކުށްވެރިކޮށްފި

ރާއްޖެއަށް ސިފައިން ފޮނުވާ ރައީސުލްޖުމްހޫރިއްޔާ ޑރ.މުހައްމަދު މުއިއްޒުގެ ވެރިކަން ބަދަލުކުރުމަށް އިންޑިއާގެ ކުރީގެ މަޖިލިސް މެންބަރެއް ކަމަށްވާ ސުބްރަމާނިއަން ސްވާމީ ގޮވާލުމުން އިދިކޮޅު އެމްޑީޕީން އެކަން ކުށްވެރިކޮށްފި އެވެ.

ސަރުކާރު ބަދަލު ކުރުމަށް ސުބްރަމާނިއަން ސްވާމީ ގޮވާލީ ރާއްޖޭގައި ތިބި އިންޑިއާ ސިފައިން މާޗު މަހު ގެ 15 ގެ ކުރިން ބޭލުމަށް ރައީސް ޑރ.މުއިއްޒު ދެއްވި މުހުލަތާއި ގުޅިގެން ކުރެއްވި ޓްވީޓެއްގައެވެ.

މިގޮތުން އޭނާ ވިދާޅުވީ ރައީސް މުއިއްޒު، ޗައިނާއަށް ކުރެއްވި ދަތުރުފުޅަށްފަހު ރާއްޖެ ވަޑައިގެން ރާއްޖޭގައި ތިބި އިންޑިއާ ސިފައިން ގެންދަން މުހުލަތެއް ދީފައިވާ ކަމަށާއި އެގޮތަށް އަމަލު ނުކޮށްފިނަމަ ފިޔަވަޅު އަޅާނެކަމަށް ރައީސް މުއިއްޒު ވިދާޅުވެފައިވާ ކަމަށެވެ. މާޗު 15 ގެ ކުރިން އިންޑީއާ ސިފައިން ގެންދިޔުމަށް ރައީސް ޑރ.މުއިއްޒު އެންގެވި ފަދައިން އިންޑިއާގެ ބޮޑުވަޒީރު ނަރެންދުރަ މޯދީ އަމަލުކުރައްވައި އިންޑިއާގެ މޫނު މަތީގައި "މަޑް" އިން ޖަހާނީތޯ ނުވަތަ ރާޖީވް ގާންދީ ހެދިހެން، ސިފައިން ފޮނުވައި ރައީސް ޑރ. މުއިއްޒު، ވެރިކަމުން ދުރުކުރާނީތޯ ސުބްރަމަނިއަން ވަނީ ސުވާލު އުފައްދަވާފައެވެ.

މިކަމާއި ގުޅިގެން އެމްޑީޕީން ނެރުނު ބަޔާނެއްގައި ބުނީ ދެގައުމުގެ ދެމެދުގައި ނަފުރަތު އުފެދޭ ގޮތަށް އެފަދަ ވާހަކަ ދެއްކުމަކީ ޒިންމާދާރުކަން ކުޑަ އަދި ހަރުދަނާ ކަމެއް ހުރި އަމަލެއް ނޫން ކަމަށެވެ. އަދި އެމްޑީޕީން ވަނީ ސިޔާސީ މަންފާއެއް ހޯދުމަށް ރާއްޖޭގެ ދާހިލީ ކަންކަމުގެ ތެރެއަށް ނުވަނުމަށް ސުބްރަމާނިއަން ސްވާމީ އަށް އަށް ގޮވާލާފައެވެ.

މީގެ އިތުރުންވެސް އެމްޑީޕީގެ ބަޔާނުގައި ރައީސް ޑރ.މުއިއްޒު އާއި އެމަނިކުފާނުގެ އޮފިޝަލުން ދެއްކެވި ވާހަކަފުޅުތަކުގެ ސަބަބުން ރާއްޖެ އާއި އިންޑިއާގެ ޒަމާންވީ އެކުވެރިކަމަށް ހުރަސްއެޅިފައިވާ ކަމަށް ވަނީ ބުނެފައެވެ. އަދި ރާއްޖެއާއި އިންޑިއާގެ ގުޅުން އިތުރަށް ގޯސްވިޔަ ނުދީ މައްސަލަ ހައްލުކުރުން މުހިންމު ކަމަށްވެސް އެ ބަޔާނުގައި ވެއެވެ.

މީގެ ކުރިންވެސް ސުބްރަމާނިއަން ސްވާމީ  ވަނީ ކުރީގެ ރައީސް އަބްދުالله ޔާމީން ވެރިކަމުގައި ހުންނަވަނިކޮށް ވެސް އިންޑިއާ ސިފައިން، ރާއްޖެއަށް ފޮނުވުމަށް ގޮވާލުމާއި ގުޅިގެން އެފަހަރު އެ މަނިކުފާނު ވަނީ އެމައްސަލަ އދ އަށް ވެސް ހުށައަޅާފައެވެ.