ރަސްފަންނު މޫދުގައި ތޫނު އިތާތަކެއް. ސަމާލުވޭ!

ގިނަ ބަޔަކު މޫދަށް އެރި އުޅޭ ރަސްފަންނު މޫދަށްއެރޭ ސަރަހައްދުގައި ކޮޅަށް ތޫނުކޮށް ހުންނަ ވައްތަރުގެ، އިތާތަކެއް ހުރުމުން އެސަރަހައްދަށް މޫދަށް އެރޭ ފަރާތްތަކުން ސަމާލުވާން އެދިއްޖެއެވެ.

ޣިޔާސުއްދީން ސުކޫލުގެ ކުރީގެ ޕްރިންސިޕަލް އަލީ މުސްތަފާ ސޯޝަލް މީޑިއާގައި ކުރެއްވި ޕޯސްޓަކުން މިކަން ވަނީ އާންމުންގެ ސަމާލުކަމަށް ގެނެސްފައެވެ. މި ޕޯސްޓުގައި އޭނާ ވަނީ ރަސްފަންނު މޫދުގައި ހަދަމުން އަންނަ ރެސްޓޯރަންޓާ ދިމާލުގައި ގިނަ އަދަދަކަށް ތޫނު އިތާ ހުރިކަމަށް ހާމަކުރައްވާފައެވެ. އަދި އެ އިތާތައް ހުރީ މޫދު ވެލިގަނޑުގެ ތެރެއަށް ވަރަށް ބޮޑަށް ވަދެފައި ކަމަށް މުސްތަފާ ވިދާޅުވިއެވެ.

އެ އިތާތަކަކީ ކޮޅަށް ވަރަށް ތޫނުކޮށް ހުރި އިތާތަކެއްކަން ފާހަގަކުރައްވާ، އޭނާ ވަނީ މޫދުގެ ވެލިގަނޑުގައި ހިނގާއިރު، ފައި ހަލާކުވެދާނެތީ ސަމާލުވުމަށް އެދިފައެވެ. އަދި ހިކި ދިޔާގައި އެ ސަރަހައްދުގައި ހުސްފައިގައި އުޅޭއިރު ޚާއްސަ ސަމާލުކަމެއް ދިނުމަށް ވެސް އޭނާ ވަނީ އެދިފައެވެ.

މުސްތޮފާ ވިދާޅުވި ގޮތުގައި މިއީ ކެއުމަށް ބޭނުންކުރާ އިތައެކެވެ. އެ އިތާތަކުގައި އިންނަނީ ކުޑަ މަސްކޮޅެކެވެ. ނަމަވެސް، ގިނަ ބަޔަކު އެ ސަރަހައްދުން އިތާ ނަގާނަމަ، އެ ސަރަހައްދުގައި ހުރި އިތާތަކުގެ އަދަދު މަދު ކުރެވިދާނެކަން ވެސް އޭނާ ފާހަގަކޮށްފައިވެއެވެ.

މިކަމާ ގުޅޭގޮތުން ދައުލަތުގެ ކަމާބެހޭ އިދާރާއަކުން އަދި ވަކި އެއްޗެކޭ ބުނެފައެއް ނުވެއެވެ.

ރަސްފަންނަކީ އާއްމު ގޮތެއްގައި ގިނަ އަދަދެއްގެ އަންހެނުންނާއި ކުޑަކުދިން މޫދަށް އެރޭ ތަނެކެވެ. ކޮންމެ ދުވަހެއްގެ ހެނދުނާއި، މެންދުރު އަދި ހަވީރު ގަޑީގައިވެސް ގިނަ އަދަދެއްގެ އާއްމުން އެތަނަށް މޫދަށްއެރުމަށް ގޮސް އުޅެއެވެ.