ސަރުކާރުގެ ސިޔާސަތަކީ ހުރިހާ އިންޑަސްޓްރީއެއްގެ ބޭފުޅުންގެ އަޑުއަހައިގެން ކަންކަން ބައްޓަންކުރުން: ރައީސް މުޢިއްޒު

ސަރުކާރުގެ ސިޔާސަތުތައް ބައްޓަންކުރާނީ ކަމާބެހޭ ސިނާއަތްތަކުގައި މަސައްކަތްކުރާ ފަރާތްތަކުގެ އަޑުއަހައިގެން ކަމަށް ރައީސް ޑރ. މުޙައްމަދު މުއިއްޒު މިއަދު ވިދާޅުވެއްޖެއެވެ.

ރައީސް އޮފީހުގައި މިއަދު ބޮޑުކަންނެލީގެ މަސްވެރިންގެ ޔޫނިއަންއާ އެކު ބާއްވާ ބައްދަލުވުމަކަށް ވަޑައިގެންނެވުމުގެ ކުރިން ރައީސް މުއިއްޒު ވިދާޅުވީ، މުހިންމު ދެ ބައްދަލުވުމެއް ބާއްވަން ނިންމާފައިވާ ކަމަށެވެ. އޭގެ ތެރެއިން އެއް ބައްދަލުވުމަކީ ބޮޑު ކަންނެލީގެ މަސްވެރިންގެ ޔޫނިއަންއާ އެކު ބާއްވާ ބައްދަލުވުމެކެވެ.

"އެ ބައްދަލުވުމަށް އެ ޔޫނިއަންގެ ވަރަށް އިސް ބޭފުޅުން އެބ ވަޑައިގަންނަވާ. އަޅުގަނޑު ވަރަށް ލޫކު ފޯވާޑް ކުރަން އެ ބައްދަލުވުމަށް. ބޮޑު ކަންނެލީގެ މށްވެރިކަން ރާއްޖޭގައި ކުރިއަށް ގެންދިޔުމުގައި ސަރުކާރުގެ ސިޔާސަތަކީ އެ ކަމުގައި މަސައްކަތްކުރާ މަސްވެރިންގެ އަޑުއަހައިގެން ކުރިއަށް ދިއުން،“ ރައީސް ވިދާޅުވިއެވެ.

"ސަރުކާރުގެ އަމާޒަކަށްވާނީ އަދި ސަރުކާރުގެ ސިޔާސަތަކީ ވެސް ކޮންމެ އިންޑަސްޓްރީއެއްގައި ވެސް އެ އިންޑަސްޓްރީއެއްގައި މަސައްކަތްކުރާ ބޭފުޅުންގެ އަޑުއަހައިގެން ކަންތައްތައް ބައްޓަންކުރުން،"

ރައީސް ޑރ މުހައްމަދު މުޢިއްޒު

ރައީސް މުޢިއްޒު އިތުރަށް ވިދާޅުވީ، ދެވަނަ ބައްދަލުވުމުގައި ބައިވެރިވާނީ ގެދޮރުވެރިކަމާއި ބޯހިޔާވަހިކަމާ ގުޅޭ އެކިއެކި އެސޯސިއޭޝަންތަކާއި ކަމަަށެވެ. އެގޮތުން، ފަހި ޔޫނިއަން، ގިރާވަރު، މާލޭ ސިޓިޒަންސް އެސޯސިއޭޝަން، އަދި، ގުޅިފަޅު ރައްޔިތުންގެ އެސޯސިއޭޝަންގެ ބޭފުޅުންނާ ވެސް މިއަދު ބައްދަލުކުރައްވާނެ ކަމަށް ރައީސް ވިދާޅުވިއެވެ.

ރައީސް ވިދާޅުވީ އެ ބައްދަލުވުމުގައި ޔޫނިއަން ތަކުގެ ބޭފުޅުން ބޭނުންވާ ވަރަކަށް ވާހަކަދައްކައި، ކަންބޮޑުވުންތައް ހިއްސާކުރުމުގެ ފުރުސަތު ދެއްވާނެ ކަމަށެވެ.

"މި ހުރިހާ ޖަމިއްޔާތަކަކީ މި ހުރިހާ ކޮމިޓީތަކަކީ ވަރަށް ގިނަ ރައްޔިތުން ރެޕްރެޒެންޓް ކުރާ ބައެއް. އެހެންވީމާ އެ ބޭފުޅުންނާ ބައްދަލުވުމުން ވަރަށް ގިނަ ކަންކަން އެނގިގެންދާނެ،" ރައީސް މުޢިއްޒު ވިދާޅުވިއެވެ.

ރައީސް މިފަދައިން ވިދާޅުވެފައި ވާއިރު، ދާދިފަހުން ލޭނު އެޅުމަށް ހުޅުވާލަން ސަރުކާރުން ނިންމި ނިންމުމާ ގުޅިގެން ބޮޑު ކަންނެލީ ޔޫނިއަން އިން ކަންބޮޑުވުން ފާޅުކުރުމުން އެ ނިންމުމަށް އަމަލު ނުކުރައްވަނަ ރައީސް ނިންމެވިކަން ފާހަގަކޮށްލަންޖެހެއެވެ.