ތިނަދޫ ކައުންސިލުން އުސޫލަށް ތަބައެއް ނުވި، ފްލެޓް ދޭނެ މީހުން ކަނޑައަޅަން މިނިސްޓްރީން އުސޫލު ހަދަނީ

ތިނަދޫ ސިޓީ ކައުންސިލުން ޖަނަވަރީ 29, ގައި 200 ހައުސިން ޔުނިޓް ދޫކުރުމަށް ކޮށްފައިވާ އިއުލާންއަކީ މިނިސްޓްރީ އޮފް ކޮންސްޓްރަކްޝަން، ހައުސިން އެންޑް އިންފްރާސްޓްރަކްޗާ ލަފާ އަދި އެންޑޯސްކުރުމަކާއި ނުލައި ކޮށްފައިވާ އިއުލާނެއް ކަމުން މި އިއުލާނުގެ ދަށުން ކުރެވޭ އެއްވެސް މަސައްކަތެއް ބަލައިނުގަންނާނެ ކަމަށް އެ މިނިސްޓްރީން ބުނެފި އެވެ.

އެ މިނިސްޓްރީން މިއަދު ކުރި އިއުލާނެއްގައި ބުނެފައި ވަނީ ސަރުކާރުން އެންމެ އިސްކަންދޭ އެއް ސިޔާސަތަކީ، ކޮންމެ ރައްޔިތަކަށް އަސާސީ ބޯހިޔާވަހިކަން ފޯރުކޮށްދިނުން ކަމަށްވާއިރު، އެ ސިޔާސަތު ތަންފީޒު ކުރުން މަތިކޮށްފައިވަނީ އެ މިނިސްޓްރީއަށް ކަމަށެވެ.

އެގޮތުން މިނިސްޓްރީގެ މެންޑޭޓްގައި ރާއްޖޭގެ ހިޔާވަހިކަމާބެހޭ ގައުމީ ސިޔާސަތުގެ ދަށުން ހިޔާވަހިކަމުގެ ޕްރޮގްރާމްތައް ރާވައި ހިންގުމާއި، އެފަދަ ޕްރޮގްރާމްތަކުގެ މަސައްކަތްތައް ވިލަރެސްކުރުމާއި، ރާއްޖޭގެ ހިޔާވަހިކަމާބެހޭ ޤައުމީ ސިޔާސަތުގެ ދަށުން ކަނޑައެޅޭ މިންގަނޑުތަކާ އެއްގޮތްވާ ގޮތުގެ މަތިން ކޮންމެ ރައްޔިތަކަށްވެސް ދިރިއުޅުމަށް އެކަށޭނެ ފެންވަރުގެ ހިޔާވައްސެއް ލިބިދެވޭނެ ގޮތްތައް ރާވައި، އެކަމަށް މަގުފަހިކުރެވޭނެ ގޮތަށް ކަމާބެހޭ އުސޫލުތައް އެކުލަވައިލައި އެ އުސޫލުތައް ހިންގުން ހިމެނޭ ކަމަށެވެ.

މި މެންޑޭޓްގެ ދަށުން، ރާއްޖޭގެ އެކި ސަރަހައްދުތަކުގައި ހައުސިން ޔުނިޓްތައް އިމާރާތްކޮށް، ޔުނިޓްތައް ހަވާލުކުރުމަށް އުސޫލުތައް ކަނޑައެޅުމުގެ މަސައްކަތްތައް މިނިސްޓްރީން ކުރަމުންގެންދާކަމާއި، އޭގެ ތެރެއިން ތިނަދޫ ސިޓީގައި ސަރުކާރުން އިމާރާތް ކުރަމުންދާ 200 ހައުސިން ޔުނިޓްގެ މަޝްރޫއު އަކީ، މި މިނިސްޓްރީގެ ބެލުމުގެ ދަށުން ކުރިއަށް ގެންދާ އެއް މަޝްރޫއު ކަމަށް ބުންޏެވެ.

ސަރުކާރުން ކުރިއަށް ގެންދާ މިފަދަ ހައުސިން ޔުނިޓްތައް ދޫކުރުމަށް އެކުލަވާލަންޖެހޭ އުސޫލުތަކާއި މިންގަނޑުތައް ކަނޑައަޅަނީ މީގެކުރިން ވެސް މިނިސްޓްރީން އެންޑޯސްކޮށް ހުއްދަ ލިބިގެން ނަމަވެސް 29 ޖަނަވަރީ ގައި ތިނަދޫ ސިޓީ ކައުންސިލުން މިނިސްޓްރީގެ ހުއްދަ ނެތި ހައުސިން ޔުނިޓް ދޫކުރުމަށް އިއުލާން ކޮށްފައިވާ ކަމަށެވެ.

އެހެންކަމުން ތިނަދޫ ސިޓީ ކައުންސިލުން ކޮށްފައިވާ އިއުލާން ބާތިލްކުރުމަށް ކައުންސިލަށް އަންގާފައިވާކަމާއި އަދި ޔުނިޓްތައް ލިބޭފަރާތްތައް ކަނޑައެޅުމަށްޓަކައި ބޭނުންވާ އުސޫލު އެކުލަވާލުމަށްފަހު އެންޑޯސްކުރުމަށް މިނިސްޓްރީއަށް ހުށަހެޅުމަށްވެސް އަންގާފައިވާ ކަމަށެވެ.

"އެހެންނަމަވެސް، މިއަދާހަމައަށް ތިނަދޫ ސިޓީ ކައުންސިލަށް އެންގި އެންގުމާ އެއްގޮތަށް އަމަލުކޮށްފައިނުވާކަން ހިތާމައާއެކު ފާހަގަކުރަމެވެ,"

އެހެންކަމުން ތިނަދޫ ސިޓީ ކައުންސިލުން 29 ޖަނަވަރީ ގައި 200 ހައުސިން ޔުނިޓް ދޫކުރުމަށް ކޮށްފައިވާ އިއުލާންއަކީ މި މިނިސްޓްރީގެ ލަފާ އަދި އެންޑޯސްކުރުމަކާއި ނުލައި ކޮށްފައިވާ އިއުލާނެއް ކަމުގައިވާތީ، މި އިޢުލާނުގެ ދަށުން ކުރެވޭ އެއްވެސް މަސައްކަތެއް މި މިނިސްޓްރީން ބަލައިނުގަންނަ ކަމުގައި ދަންނަވަމެވެ.

އަދި ސަރުކާރުގެ ބޯހިޔާވަހިކަމުގެ ސިޔާސަތުގެ ދަށުން އިންސާފުވެރިކަމާއި ހަމަހަމަކަމާއެކު މި ހައުސިންގ ޔުނިޓްތައް ލިބޭ ފަރާތްތައް ކަނޑައެޅުމަށް އެކުލަވާލަންޖެހޭ އުސޫލުތައް އެކުލަވާލުމަށްފަހު ވީ އެންމެ އަވަހަކަށް އިޢުލާން ކުރުމަށް މަސައްކަތް ކުރަމުންދާ ވާހަކަ ދެންނެވީމެވެ.