ބޮޑު ޖަމާއަތުގައި ސިފައިންކުރި ފަތިސްނަމާދާއެކު ނަސްރުގެ ދުވަހުގެ ހަރަކާތްތައް ފެށިއްޖެ

ބޮޑުޖަމާއަތުގައި އިސްލާމީ މަރުކަޒުގައި ސިފައިން ކުރި ފަތިސްނަމާދާއެކު މިއަހަރުގެ ނަސްރުގެ ދުވަހުގެ ރަސްމީ ހަރަކާތްތައް ފެށިއްޖެއެވެ.

އިސްލާމީ މަރުކަޒުގައި ކުރި ފަތިސްނަމާދުގައި ސިފައިންގެ އެންމެ މަތީ ވެރިޔާ، ރައީސުލްޖުމްހޫރިއްޔާ ޑރ.މުހައްމަދު މުއިއްޒު ބައިވެރިވެ ވަޑައިގެންފައިވާއިރު ގިނަ އަދަދެއްގެ ސިފައިންނާއި އާއްމުންވެސް ބައިވެރިވިއެވެ. ބޮޑު ޖަމާއަތުގައި ކުރި ފަތިސްނަމާދަށްފަހު، ނަސްރުގެ ދުވަހުގެ ހަނދާނީ ބިނާގައި ދިދަ ޖެހުމާއި، ގާޑް މައުންޓް ކުރުމުގެ ހަރަކާތްވެސް ވަނީ ކުރިއަށްގެންގޮސްފައެވެ.

މި ހަރަކާތަށްފަހު ހެނދުނު 9 ޖަހާއިރު، ނަސްރުގެ ދުވަހުގެ ރަސްމީ ޖަލްސާ ކުރިއަށްދާއިރު، ދުވަހުގެ މުނާސަބަތުގައި ބާއްވާ އަސްކަރީ ހުށަހެޅުން އޮންނާނީ މިއަދު ހަވީރު 16:15 ގައި ޖުމްހޫރީ މައިދާނުގައެވެ.

މީގެ އިތުރުން ނަސްރުގެ ދުވަހުގެ މުނާސަބަތުގައި ހިންގާ ހަރަކާތުގެ ތެރޭގައި ހިމެނިގެން ގދ އަތޮޅު ތައުލީމީ މަރުކަޒާއި ތިނަދޫ ސިޓީގައިވެސް ވަނީ ހަރަކާތްތަކެއް ކުރިއަށްގެންދިއުމަށް ނިންމާފައެވެ. މިދުވަހުގެ މުނާސަބަތުގައި ބާއްވާ ސިފައިންގެ ފޮޓޯ މައުރަޒު ނޮވެމްބަރުމަހުގެ 7 ވަނަ ދުވަހު ގދ އަތޮޅު ތައުލީމީ މަރުކަޒުގައި ކުރިއަށްދާއިރު، 8 ވަނަ ދުވަހުގެ ހަވީރު ސިފައިންގެ އަސްކަރީ ހަވީރެއް ތިނަދޫ ސްޓޭޑިއަމްގައި ބޭއްވުމަށް ވަނީ ހަމަޖެހިފައެވެ.