ރަމަޟާން މަހަށް ކޮންމެ ގޭބީސީއަކަށް ސަރުކާރުން ހަދިޔާކުރާ ހަނޑޫ އަދި ފުށް ބަހަން ތައްޔާރުވެއްޖެ!

ކުރިއަށް އޮތް ބަރަކާތްތެރި ރަމަޟާންމަހު ސަރުކާރުގެ ފަރާތުން ކޮންމެ ގޭބީސީއަކަށް ހަދިޔާ ކުރާ 10 ކިލޯ ބާސްމަތީ ހަނޑޫ އަދި 10 ކިލޯ ފުށް ބެހުމަށް އެސްޓީއޯއިން ތައްޔާރުވެއްޖެއެވެ.

މިގޮތުން މިކަމަށް އެކަށޭނަ މުދާ މިހާރު އެތެރެކޮށް ގުދަންކޮށް އަދި މީގެ އިތުރުން ބެހޭނޭ އިންތިޒާމުތައް މިހާރު ހަމަޖެއްސިފައިވާ ކަމަށް އެސްޓީއޯ އިން މިއަދު ވަނީ ބުނެފައެވެ.

އެސްޓީއޯއިން މިކަން ކުރިއަށް ގެންދަނީ ސަރުކާރުގެ ވުޒާރާތަކާއި، ކައުންސިލްތަކާއި، އަދި ބައެއް ޖަމިއްޔާތަކާއި މަޝްވަރާކުރެވި ގިނަ ބައެއްގެ އެހީތެރިކަމުގެ މަތިން ކަމަށް އެކުންފުނިން ބުނެފައިވެއެވެ.

މުދާދޫކުރުން ރޭވިފަވާގޮތްތައް:

- މާލޭސަރަހައްދުގައި މުދާ ދޫކުރާނީ މާލޭސިޓީ ކައިންސިލް ބެލުމުގެ ދަށުން

- މާލެ ސަރަހައްދުގައި މުދާ ދޫކުރަން ފަށާނީ 09 މާރިޗު 2024 އިން ފެށިގެން 16 މާރިޗް 2024 އަށް. (މުލަ ރޯދަ ދުވަސް އަދި ހުކުރު ދުވަހު މުދާ ބެހުމުގެ މަސައްކަތް މާލެ ސިޓީ ކައުންސިލުން ކުރިޔަށް ނުގެންދާނެ).

- ރަށްރަށަށް ގެންދާ މުދާ އެސްޓީއޯއިން ދޯނިތަކަށް ބަރުކުރަންވަނީ 06 މާރިޗު 2024އިން ފެށިގެން

-އަދި އެމުދާ ގޭބީސީ ތަކަށް ދޫކުރާނީ ރަށު ކައުންސިލުން

މީގެ އިތުރުން މާލޭ ސަރަހައްދުގައި މުދާ ދޫކުރަން ނިންމާފައިވާ ގަޑިތަކަކަކީ ހެނދުނު 10:00 އިން ހަވީރު 16:00 އަށެވެ. އަދި ރޭގަނޑު 20:30 އިން 23:00 އަށް ކަމަށާ އަދި ރޯދަމަހު މުދާ ދޫކުރުމަށެ ނިންމާފައިވާ ގަޑިތަކަކީ ހެނދުނު 9:30އިން މެނދުރު 13:00 އަށް، ރޭގަނޑު 21:00އިން 23:30 އަށް ކަމަށް ބުނެފައިވެއެވެ.

މުދާ ދޫކުރާ ޕޮއިންޓްތަކުގެ ގޮތުގައި ޖުމްލަ ހަތް ތަނެއް މާލެ ސަރަހައްދުގައި ގާއިމް ކުރެވިގެންދާނެ ކަމަށް އެސްޓީއޯއިން މައުލޫމާތު ދެއެވެ.

މިގޮތުން މާލެ ސަރަހައްދުގައި ގާއިމް ކުރެވޭ ޕޮއިންޓްތަކަކީ

މާލޭ ގަލޮޅު ދަނޑު

މާލޭ ސިޓީ ކައުންސިލުގެ އާންމު ހިދުމަތްތަކާއި ބެހޭބައި

މާލޭ ސޯޝަލް ސެންޓަރ

ވިލިމާލޭ ބިއްރި މިސްކިތް ހޯލް

ހުޅުމާލޭ ފޭސް 1 ގެ އުމަރު ޒާހިރު ބިލްޑިންގ

ހުޅުމާލޭ ފޭސް 2 ގެ ހިޔާ ފްލެޓް ޓަވަރ 10 ޔޫތް ސެންޓަރ

އެސްޓީއޯއިން ބުނެފައިވާގޮތުން، ސަރުކާރުން ދޭން ހަމަޖެހިފައިވާ ފުށާއި ހަނޑޫ ދޫކުރަން ހަމަޖެހިފައިވަނީ ދިވެހިންނަށް އެކަނިއެވެ. މިގޮތުން ދޫކުރާނީ ކަރަންޓް މީޓަރުގެ ނަންބަރ އަށް ބެލުމަށްފަހު ބަލާ އަންނަ ފަރާތުގެ ދިވެހިރައްޔިތެއްކަން އަންގައިދޭ އައިޑީ ކާޑް ނަންބަރު ނޯޓުކުރުމަށްފަހުގައި ކަމަށްވެސް ބުނެފައިވެއެވެ.