ފެންލައިޓުން ވަދެ މަރުގެ އިންޒާރުދީ ފޭރުނު ދެމީހުންގެ ބަންދަށް 15 ދުވަސް

މާފަންނު ސަރަހައްދުގެ ގެއަކަށް ވަދެ، ނިދާފައި ތިބި މީހުންގެ ކަރުގައި ވަޅި ޖައްސައި މަރާލާނެކަމުގެ އިންޒާރު ދީ، ކަރަންޓު ސާމާނުތަކެއް ފޭރިގަތް ކަމަށް ތުހުމަތުކުރެވޭ ދެ މީހަކަށް ކްރިމިނަލް ކޯޓުން މިއަދު 15 ދުވަހުގެ ބަންދު އަމުރެއް ނެރެފިއެވެ.

މި މައްސަލައިގައި ހައްޔަރުކޮށްފައިވަނީ މ. ދާރުލްގަރާރު، އިސްމާއިލް ވިޝާލް (30 އަހަރު) އާއި ވިދުވަރު، ބ. ދަރަވަންދޫ، ހުސައިން ޝާއިފް (32 އަހަރު) އެވެ.

ފުލުހުން މައުލޫމާތު ދީފައިވާ ގޮތުގައި، މި ދެ މީހުން ގެއަށް ވަދެފައިވަނީ ފާޚާނާގެ ފެންލައިޓުންނެވެ. އެއަށްފަހު ކޮޓަރީގައި ނިދާފައި ތިބި ދެ މީހެއްގެ ކަރުގައި ވަޅި ޖައްސައި، އެއްވެސް ހަރަކާތެއް ކޮށްފިނަމަ މަރާލާނެ ކަމަށް ބުނެ ބިރުދައްކާފައިވާ ކަމަށް ބުނެއެވެ.

ފޭރިގަތް ތަކެތީގެ ތެރޭގައި ދެ މޮބައިލް ފޯނާއި، ލެޕްޓޮޕެއްގެ އިތުރުން އެހެނިހެން ތަކެތި ހިމެނޭ ކަމަށާއި، މި ތަކެތި މިހާރު ވަނީ އަނބުރާ ހޯދާފައިވާ ކަމަށް ފުލުހުން މައުލޫމާތު ދީފައިވެއެވެ.

ފުލުހުން ބުނާ ގޮތުގައި، ތަކެތި ފޭރުމަށްފަހު އެ ދެ މީހުން ފިލައިގެން ގޮސްފައިވަނީ އަލުން ފާޚާނާއަށް ވަދެ، އެތެރެއިން ދޮރު ތަޅުލުމަށްފަހު ފެންލައިޓުން ނުކުމެގެންނެވެ.

ކޯޓުން ނެރުނު އަމުރުގައި މި ދެ މީހުންގެ މައްޗަށް ތުހުމަތުކޮށްފައިވަނީ ތޫނު ހަތިޔާރު ބޭނުންކޮށްގެން ބިރުދައްކައި ފޭރުމުގެ ކުށުގެ މައްސަލައިގައެވެ.