ދިރާސީ އަހަރު ޖަނަވަރީން ފެށިޔަސް އޭގެ ސަބަބުން 9,10 ގެ ދަރިވަރުންނަށް ބަދަލެއް ނާންނާނެ: މިނިސްޓްރީ

ތައުލީމީ އަހަރު 2026 ވަނަ އަހަރުގެ ޖެނުއަރީ މަހުން ފަށާ ގޮތަށް ނިންމި ކަމުގައި ވިޔަސް އޭގެ ސަބަބުން 9,10 ގެ ދަރިވަރުންނަށް ބަދަލެއް ނާންނާނެ ކަމަށް ތައުލީމާއި ބެހޭ ވުޒާރާއިން ބުނެފިއެވެ.

2026 ވަނަ އަހަރުން ފެށިގެން ދިރާސީ އާ އަަހަރުގެ ކިޔެވުން ޖެނުއަރީ ގައި ފަށާ ގޮތަށް ސަރުކާރުން ނިންމާފައިވަނީ އިއްޔެ ބޭއްވި ވަޒީރުންގެ ކެބިނެޓްގެ ބައްދަލުވުމުގައެވެ.

ދިރާސީ އައު އަހަރު ބަދަލު ކުރުމުގެ ކަންކަން ދާނީ ކުއްލި އަކަށް ނޫން ކަމަށާ، އެކަން ކުރިއަށް ގެންދާނީ އޭގެ ސަބަބުން ބެލެނިވެރިންނާއި ދަރިވަރުން އަދި ޓީޗަރުންނަށް ވެސް ދަތިތަކާއި ކުރިމަތިނުވާ ގޮތަށް ތައުލީމީ ކަލަންޑަރަށް މަދު މަދުން ގެނެވޭ ކުދި ބަދަލު ތަކާއި އެކުގައި ކަމަށް މިއަދުގެ ކެބިނެޓް ބައްދަލުވުމުގެ ނިންމެވި ނިންމުންތަކާއި ގުޅޭގޮތުން މަޢުލޫމާތު ދެއްވުމަށް ބޭއްވި ނޫސްވެރިންގެ ބައްދަލުވުމުގައި ވާހަކަ ދައްކަވަމުން، ޕްރިންސިޕަލް ސެކްރެޓެރީ ޓު ދަ ޕްރެޒިޑެންޓް އޮން ޕަބްލިކް ޕޮލިސީ، ޢަބްދުالله ނާޒިމް އިބްރާހީމް ވަނީ ވިދާޅުވެފައެވެ.

މިކަމާއި ގުޅިގެން ތައުލީމާއި ބެހޭ ވުޒާރާއިން ބުނީ މިބަދަލުގެ ސަބަބުން ގްރޭޑް 9 އަދި 10 ގައި ކިޔަވާ ދަރިވަރުންނަށް އެއްވެސް ބަދަލެއް ނާންނާނެ ކަމަށާއި ކުރިންވެސް ރޭވިފައިވާ ގޮތަށް އެ ދަރިވަރުން އޯލެވެލް އިމްތިހާނު ހަދާނީ މޭ/ޖޫން ގައި ކަމަށެވެ. އަދި ސިލަބަސް ކަވަރުކުރުމުގައި އެއްވެސް ވަރަކަށް ކްލާސްރޫމް ލާރނިންގ ޓައިމް ގެއްލިގެން ނުދާނެ ކަމަށް ވެސް އެ ވުޒާރާއިން ބުނެއެވެ.

5 ސެމިސްޓަރަށް ބަހާލައިގެން ކުރިއަށް ގެންދިޔުމަށް ރާވައި، މި ގެނެވުނު ބަދަލުގެ ސަބަބުން  ރާއްޖޭގެ ފިސްކަލްއަހަރާއި ތަޢުލީމީ އަހަރާއި އެލައިން ކުރެވި އޭގެ މަންފާ ސްކޫލް ހިންގުމުގެ ނިޒާމަށް ކުރާނެ ކަމަށް އެ ވުޒާރާއިން ދެކެއެވެ.

އަދި  ރަށުން ބޭރުގައި ޓުއަރިޒަމް ދާއިރާގައި މަސައްކަތްކުރައްވާ ބޭފުޅުންނަށް އަހަރުގެ ތެރެއިން ލިބިލައްވާ ޗުއްޓީތައް މިހާރު ލިބެމުންދާ މިންވަރަށްވުރެ މަދުވެގެން ނުދާނެ ކަމަށް ވެސް އެ ވުޒާރާއިން ވަނީ ބުނެފައެވެ.

މިކަމާއި ގުޅޭ އިތުރު މަޢުލޫމާތު ވުޒާރާގެ ފަރާތުން ޢާންމުކުރަމުން ގެންދާނެކަމަށް ބުންޏެވެ.