ރައީސް ޔާމީން އޮންނެވީ ނުރައްކާތެރި ކުށްވެރިން ތިބޭ ޖަލެއްގައި، ހަ ފޫޓު ގޮޅިއެއްގައި: އިދިކޮޅު

މަނީލޯންޑާގެ ދައުވާ ސާބިތުވެ، ފަސް އަހަރަށް ޖަލަށްލާފައިވާ ކުރީގެ ރައީސް އަބްދުﷲ ޔާމީން އަބްދުލްގައްޔޫމް، އޮންނެވީ ނުރައްކާތެރި ކުށްވެރިން ތިބޭ ޖަލެއްގައި، ހަ ފޫޓު ހަ ފޫޓު ގޮޅިއެއްގައި ކަމަށް އިދިކޮޅު ޖޮއިންޓް ކައުންސިލުން ބުނެފިއެވެ.

އިދިކޮޅު ޕީޕީއެމް އާއި ޕީއެންސީގެ ކައުންސިލުން މިހާރު ކުރިއަށް ގެންދާ ބައްދަލުވުމުގައި ވާހަކަ ދައްކަވަމުން ޕީއެންސީގެ ރައީސް އަބްދުއްރަހީމް އަބްދުﷲ ވިދާޅުވީ، ރައީސް ޔާމީން މިހާރު އޮންނެވި ޖަލަކީ ނުރައްކާތެރި ބޮޑެތި ކުށްވެރިން ބައިތިއްބާފައި ތިބި ޖަލެއްގެ، ކުޑަ ގޮޅިއެއްގައި ކަމަށެވެ. ގޮޅީގައި ހުރީ އޮށޯވެ ނުލެވޭވަރުގެ ކުޑަ ދަގަނޑު އެނދެއް ކަމަށާއި ގޮޅީގައި ބައި ބޭރުވާނެ އެއްވެސް ގޮތެއް ނެތް ކަމަށް އަބްދުއްރަހީމް ވިދާޅުވިއެވެ.

''ރައީސް ޔާމީން އޮންނެވީ ހަ ފޫޓު ހަ ފޫޓު ގޮޅިއެއްގައި، ދަގަނޑު އެނދެއް އެތާގަ ހުރީ، ފާހާނާ ފްލެޝް އެއް ނުކުރެވޭ، ފެން ބޭނުންކުރަނީ ޓައްޕަކަށް ފެން އަޅައިގެން. މިއީ އިންސާނިއްޔަތާ ހިލާފު އަމަލެއް.'' އަބްދުއްރަހީމު ވިދާޅުވިއެވެ.

އަބްދުއްރަހީމް މިހެން ވިދާޅުވި ނަމަވެސް ރައީސް ޔާމީން އޮންނެވީ ކޮން ޖަލެއްގައި ކަމެއް ހާމައެއް ނުކުރައްވައެވެ. އެނގިފައިވާ ގޮތުގައި ރައީސް ޔާމީން މިވަގުތު ހުންނެވީ މާލޭ ޖަލުގައެވެ.

އެބައްދަލުވުމުގައި ވާހަކަ ދެއްކެވި ބާރަށު ދާއިރާގެ ކުރީގެ މެންބަރު އަދި ޕީއެންސީގެ ނައިބު ރައީސް އިބްރާހީމް ޝުޖާއު ވިދާޅުވީ، ރައީސް ޔާމީން މިނިވަން ކުރަންދެން އިދިކޮޅުން ސިޔާސީ ހަރަކާތްތައް ކުރިއަށް ގެންދާނެ ކަމަށެވެ.

ބައްދަލުވުމުގައި ވާހަކަދެއްކެވި ހުރިހާ މެންބަރުންވެސް ވަނީ ރައީސް ޔާމީންގެ މައްޗަށް ކުރި ދައުވާއަކީ ސިޔާސީ ދައުވާއެއް ކަމަށާއި އެހެންވެ އެމަނިކުފާނު މިނިވަންކުރަން ޖެހޭ ކަމަށެވެ.